Read Plautdietsch (Low German) – De Bibel Openboarunk 10 Bible Online

Openboarunk 10 - Plautdietsch (Low German) – De Bibel bible

Openboarunk 10

¹Un ekj sach noch een aundren jewaultjen Enjel vom Himmel rauf komen, met eene Wolkj jekjleet un een Räajenboagen äwa däm Kopp. Sien Jesecht wia aus de Sonn un siene Been aus fieeje Feilen.

²Dee hilt een kjlienet opnet Buak en de Haunt, un sad sien rajchten Foot opp daut Mäa un sien linkjen Foot opp daut Launt,

³un schrieech met eene lude Stemm, soo aus wan een Leiw brelt. Un aus hee jeschräajen haud, auntwuaden säwen Jewitta.

⁴Aus nu de säwen Jewitta äare Stemmen hieren leeten, wia ekj jrod reed to schriewen. Oba eene Stemm vom Himmel säd to mie: Vesäajel, waut de säwen Jewitta jerät haben, un schriew daut nich opp!

⁵Un de Enjel, dän ekj opp daut Mäa un opp de Ieed stonen sach, hoof siene rajchte Haunt nopp nom Himmel.

⁶Un hee schwua bie däm, dee doa emma un eewich läft, dee dän Himmel un waut doabennen es jemoakt haft, un uk de Ieed un waut doabennen es, uk daut Mäa un waut doabennen es, daut doa kjeen Tietvetrakjen mea jeft,

⁷oba daut dan, wan de säwenda Enjel siene Trompeet blosen woat, dan es Gott sien Jeheemnis krakjt soo utjefieet, aus hee to siene Deena, de Profeeten, jesajcht haud.

⁸Dan räd de Stemm, dee ekj vom Himmel hieed, noch emol to mie un säd: Go no dän Enjel, dee opp daut Mäa un opp de Ieed steit, un nemm daut kjliene opne Buak ut siene Haunt!

⁹Un ekj jinkj no dän Enjel un säd to am: Jeff mie daut kjliene Buak! Un hee säd to mie: Nemm daut un at daut opp! Daut woat die betta em Buck kjremmen, wan die daut em Mul uk woat seet aus Honnich sennen.

¹⁰Un ekj neem daut Buakje ut dän Enjel siene Haunt un schlukt daut opp, un em Mul wia daut seet aus Honnich, oba aus ekj daut oppjejäten haud, kjremd mie daut em Buck.

¹¹Un hee säd to mie: Du motst noch emol von väle Menschen, Velkja, Nazionen, Sproaken un Kjennichs profeetisch räden.