Read Plautdietsch (Low German) – De Bibel Openboarunk 12 Bible Online

Openboarunk 12 - Plautdietsch (Low German) – De Bibel bible

Openboarunk 12

¹Dan kjeem em Himmel een grootet Tieekjen verendach: eene Fru met de Sonn bekjleet, un de Mon unja äare Feet, un opp däm Kopp eene Kroon von 12 Stierns.

²See wia schwanga un schrieech en groote Kwol, aus daut to Jeburt kjeem.

³Dan kjeem em Himmel een aundret Tieekjen verendach: een groota, rooda Droak, dee haud säwen Kjap un tieen Hieena, un opp siene Kjap säwen Kroonen.

⁴Sien Zoagel reet een Dreddel von de Stierns aum Himmel met sikj un schmeet dee opp de Ieed. Un de Droak stald sikj ver de Fru, dee daut Kjint to Welt brinjen sull, om daut opptofräten, wan daut wudd jebuaren sennen.

⁵Un see brocht een Sän to Welt, dee aule Velkja met eene Iesastang rejieren woat. Un äa Kjint wort nopp jenomen no Gott un sienem Troon.

⁶Un de Fru fluach en de Wiltnis nenn, wua Gott een Plauz fa ar reedjemoakt haud, wua see 1.260 Doag vesorcht sull woaren.

⁷Un em Himmel bruak een Kjrich ut: Michael un siene Enjel kjriejden jäajen dän Droak un siene Enjel.

⁸Oba de Droak un siene Enjel veluaren, un fa an wia em Himmel kjeene Städ mea jebläwen.

⁹De groota Droak wort rut jestat, dee oole Schlang, dee de beesa Fient un Soton jenant woat, un de gaunze Welt veleit. Hee wort met siene Enjel toop rauf opp de Ieed jeschmäten.

¹⁰Dan hieed ekj em Himmel eene lude Stemm sajen: Nu es onsen Gott siene Radunk, siene Krauft, sien Rikj un sien Christus siene Krauft jekomen, wiels nu es onse Breeda äa Vekjläaja, dee an Dach un Nacht ver Gott vekloagd, rauf jeschmäten.

¹¹Un see haben derch daut Laum sien Bloot un daut Wuat wuafäa see enstunden, äwa am jewonnen, un an wia daut bat aum Doot nich om äa Läwen to doonen.

¹²Nu freit junt, jie Himmel un dee doabennen wonen! Oba wee dee, dee opp de Ieed un opp daut Mäa wonen, wiels de beesa Fient es no junt rauf jekomen un es schrakjlich wuttent, wiels hee weet hee haft mau eene korte Tiet.

¹³Un aus de Droak sach, daut hee opp de Ieed nopp jeschmäten wia, vefoljd hee de Fru, dee dän Jung to Welt jebrocht haud.

¹⁴Oba de Fru worden twee Flichten von een grooten Odla jejäft, daut see no äaren Plauz en de Wiltnis flieejen kunn, wua see dree un een haulf Joa vesorcht woat, un wua de Schlang ar nich aunjriepen kaun.

¹⁵Dan spieech de Schlang een Wotastroom ut däm Mul, de Fru hinjaraun, daut see doavon sull metjeräten woaren.

¹⁶Oba de Ieed kjeem de Fru to Help un muak äa Mul op un schlukt dän Stroom opp, dän de Droak ut sien Mul schoot.

¹⁷Dan wia de Droak rietent doll äwa de Fru, un jinkj doaropp loos, jäajen äare äwaje Nokomenschoft to kjriejen, dee Gott siene Jebooten jehorcht haben un aun äa Zeichnis fa Jesus fausthoolen.