Read Plautdietsch (Low German) – De Bibel Openboarunk 14 Bible Online

Openboarunk 14 - Plautdietsch (Low German) – De Bibel bible

Openboarunk 14

¹Dan kjikjt ekj un sach, daut Laum opp däm Zions Boajch stonen, un met am 144.000, dee sien Nomen uk sien Voda sien Nomen opp äare Stierns jeschräwen hauden.

²Un ekj hieed eene Stemm vom Himmel soo aus von een grootet Wota, oba uk soo aus wan daut lud rummeld. De Stemm dee ekj hieed, wia soo aus wan Hoapenspäla äare Hoapen spälen.

³Un see sungen een nieet Leet ver de Tieren un ver de Eltestasch. Un daut Leet kunn kjeena lieren, buta de 144.000, dee von de Ieed loosjekoft wieren.

⁴Dit sent dee, dee sikj nich met Frulied veorreinicht haben, wiels dee haben sikj reinjehoolen, un gonen daut Laum hinjaraun, wuaemma daut hanjeit. Dee sent von mank de Menschen loosjekoft aus Ieeschtlinjsfrucht fa Gott un daut Laum.

⁵En äa Mul worden kjeene Läajes jefungen, wiels see sent oschuldich ver Gott sien Troon.

⁶Dan sach ekj noch een Enjel medden derch däm Himmel flieejen, dee haud een eewjet Evangelium, dee to prädjen, dee opp de Ieed wonen, daut es, aule Menschen von aule Velkja, Raussen, Stam un Sproaken,

⁷un säd met lude Stemm: Fercht Gott un jäft am de Iea, wiels siene Tiet to rechten es jekomen! Un bät dän aun, dee Himmel un Ieed un Mäa un de Wotakjwalen jemoakt haft!

⁸Un doaropp kjeem een aundra Enjel un säd: Dee es jefollen, Babel de groote Staut es jefollen, wiels see aule Velkja äaren jlieejenden Huarenwien haft to drinkjen jejäft.

⁹Un hinja dän kjeem een dredda Enjel un säd met lude Stemm: Wan irjentwäa daut Tia un sien Bilt aunbät, un sien Tieekjen aum Stiern ooda aun de Haunt nemt,

¹⁰dee saul uk Gott sien jlieejenden Wien drinkjen, dän hee onen jedempelt en sien Oajakuffel nenn jegoten haft, un woat ver de heilje Enjel un ver daut Laum met Fia un Schwäwel jekjwält woaren.

¹¹Un von doa wua see jekjwält woaren, kjemt de Ruak emma un eewich. Doa es Dach un Nacht kjeene Ru fa dee, dee daut Tia un sien Bilt aunbäden, ooda fa däm dee sien Nomestieekjen aunnemt.

¹²Hia brukt daut de heilje äare Jedult! Hia sent dee, dee Gott siene Jebooten un dän Gloowen aun Jesus hoolen!

¹³Dan hieed ekj eene Stemm vom Himmel to mie sajen: Schriew: Seelich sent de Doodje von nu aun, dee em Harn stoawen. Jo, sajcht de Jeist, daut see von äare Oabeit reiwen, wiels see nämen äare Woakjen met sikj.

¹⁴Dan kjikjt ekj un sach ver mie eene witte Wolkj. Un opp de Wolkj saut eena, dee soo wia aus een Menschensän, met eene goldne Kroon opp däm Kopp un eene schoape Sans en de Haunt.

¹⁵Dan kjeem een aundra Enjel ut däm Tempel rut, un schrieech met lude Stemm to däm, dee opp de Wolkj saut: Schlo met diene Sans nenn un fang aun to arnten. Daut es Tiet to eifsten, wiels de Arnt opp de Ieed es äwariep!

¹⁶Un dee, dee opp de Wolkj saut, hold ut un trock siene Sans äwa de Ieed un haud de Arnt bennen.

¹⁷Dan kjeem noch een Enjel ut däm Tempel em Himmel rut, un dee haud uk eene schoape Sans.

¹⁸Een aundra Enjel jinkj vom Aultoa ut. Dee haud de Jewault äwa däm Fia un schrieech met lude Stemm to däm, dee de schoape Sans haud: Schlo met diene schoape Sans nenn, un schnied de Pungels vom Wienstock opp de Ieed, wiels de Druwen sent riep!

¹⁹Un de Enjel schluach met siene Sans äwa de Ieed un saumeld de Druwen un schmeet dee en Gott siene groote Wienpras, wua see en siene Rach, soo aus de Druwen en de Wienpras utjeklunjt woaren.

²⁰Dee worden buta de Staut en de Wienpras utjeklunjt. Un daut Bloot rand ut de Pras rut, bat daut de Pieed bat aun de Teem kjeem 1.600 Stapwäaj [7] lank.