Read Plautdietsch (Low German) – De Bibel Openboarunk 15 Bible Online

Openboarunk 15 - Plautdietsch (Low German) – De Bibel bible

Openboarunk 15

¹Dan sach ekj noch een grootet wundavollet Tieekjen em Himmel: Säwen Enjel hauden de latste säwen Ploagen, wuamet Gott sien Oaja toom Enj kjemt.

²Un ekj sach waut, aus wan een glausnet Mäa met Fia jemenjt wia. Un dee, dee en dän Kaumf jäajen daut Tia un sien Bilt un daut Tieekjen un de Nomenzol jewonnen hauden, stunden aun daut glausne Mäa met Hoapen von Gott en de Henj,

³un see sungen daut Leet von Gott sienen Kjnajcht Moses, un von daut Laum, un säden: Groot un wundavoll sent diene Woakjen, Har, aulmajchtja Gott! Diene Wäaj sent jerajcht un woarhauftich, du Kjennich äwa aule Velkja. [8]

⁴Wäa sull die nich ferchten, oo Har, un dienen Nomen veharlichen? Wiels bloos du best heilich! Aule Velkja sellen ver die komen aunbäden, wiels diene jerajchte Uadeelungen sent verendach jekomen.

⁵Aus dit äwa wia, kjikjt ekj un sach, daut em Himmel daut Aulaheilichste em Tempel opjemoakt wort.

⁶Un ut däm Tempel kjeemen de säwen Enjel, dee de säwen Ploagen hauden, un schlockwitte Kjleeda von Lienzeich aunhauden, un om de Brost een goldnen Gort jebungen.

⁷Un eent von de vea Tieren jeef de säwen Enjel säwen goldne Kommen voll von Gott sien Oaja, dee von Eewichkjeit to Eewichkjeit läft.

⁸Un de Tempel wia voll Ruak von Gott siene Harlichkjeit un von siene Krauft, un kjeena kunn em Tempel nenn gonen, bat de säwen Ploagen äwa wieren, dee de säwen Enjel brochten.