Read Plautdietsch (Low German) – De Bibel Openboarunk 20 Bible Online

Openboarunk 20 - Plautdietsch (Low German) – De Bibel bible

Openboarunk 20

¹Dan sach ekj een Enjel vom Himmel rauf komen, dee haud dän Schlätel fa dän gruntloosen Aufgrunt un eene groote Kjäd en de Haunt.

²Hee jreep dän Droak, de oole Schlang, daut es de beesa Fient un de Soton, un bunk am opp 1.000 Joa.

³Hee schmeet am em Aufgrunt nenn un schloot dän too un trock een Säajel bowen äwa, daut hee nich kunn gonen de Velkja veleiden, bat dee 1.000 Joa äwa wieren. Nohäa mott hee noch eene korte Tiet loosjeloten woaren.

⁴Ekj sach Troonen, wua dee bowen sauten, dän daut Machtrajcht jejäft wia to rechten. Un ekj sach dee äare Seelen, dee wäajen äa Zeichnis fa Jesus un wäajen Gott sien Wuat wieren dootjemoakt worden, un dee nich daut Tia un sien Bilt aunjebät hauden, un dee sien Tieekjen nich aum Stiern ooda opp de Haunt jenomen hauden. Dee kjeemen toom Läwen un rejieeden met Christus toop 1.000 Joa.

⁵De aundre Doodje oba kjeemen nich wada toom Läwen bat dee 1.000 Joa om wieren. Dit es daut ieeschte Oppstonen.

⁶Seelich un heilich sent dee, dee met de ieeschte toop oppstonen. Äwa dee haft de tweeda Doot kjeene Krauft; un see woaren Gott un Christus siene Priesta sennen, un 1.000 Joa met am toop rejieren.

⁷Un wan dee 1.000 Joa äwa sent, woat de Soton ut siene Gruft rut un friejeloten woaren.

⁸Un hee woat en aule vea Rechtungen oppe Ieed gonen de Velkja to veleiden, un no Gog un Magog, dee tooptobrinjen to kjriejen. Äare Zol es soo aus de Saunt aum Mäa.

⁹Un see jinjen äwa de gaunze Ieed doaropp loos un trocken runtom de heilje äa Loaga un om de leewe Staut. Dan oba kjeem Fia von Gott von em Himmel [11] un muak een Enj met an.

¹⁰Un de beesa Fient, dee an veleid, wort em Fia un Schwäwelsee nenn jeschmäten, wua daut Tia un de Läajesprofeet wieren, un dee woaren Dach un Nacht von Eewichkjeit to Eewichkjeit jekjwält woaren.

¹¹Un ekj sach een grooten, witten Troon un dän, dee doabowen saut. Himmel un Ieed fluagen von am wajch un wieren nich mea to finjen.

¹²Un ekj sach de Doodes, kjlien un groot, ver Gott un dän Troon stonen, un doa worden Bieekja opjemoakt. Dan wort noch een Buak opjemoakt, un daut wia daut Läwensbuak. Un de Doodes worden doano jerecht, waut en dee Bieekja von äare Woakjen jeschräwen stunt.

¹³Un daut Mäa jeef de Doodes rut, dee doabennen wieren, un de Doot un de Hal jeewen de Doodes rut, dee doabennen wieren, un jieda eena wort doano jerecht waut siene Woakjen jewast wieren.

¹⁴Un de Doot un sien Rikj worden em Fiasee nenn jeschmäten. Dit es de tweeda Doot.

¹⁵Un wan irjentwäm sien Nomen nich em Läwensbuak jeschräwen stunt, wort dee em Fiasee jeschmäten.