Read Plautdietsch (Low German) – De Bibel Openboarunk 4 Bible Online

Openboarunk 4 - Plautdietsch (Low German) – De Bibel bible

Openboarunk 4

¹Aus dit äwa wia, kjikjt ekj un sach doa ver mie em Himmel eene Däa opstonen. Un dee Stemm, dee ekj aul ea haud soo aus eene Trompeet to mie räden hieet, säd: Komm nopp hiahäa, un ekj woa die wiesen, waut nu no dit passieren mott.

²Un soo wia ekj uk fuaz em Jeist. Un doa, ver mie, wia een Troon em Himmel, opp dän eena setten deed.

³Un dän, dee doabowen saut, sach daut soo aus een Jaspies un Sarder; un om dän Troon wia een Räajenboagen, dän daut soo sach aus een Smaracht.

⁴Un om dän Troon wieren 24 aundre Troons, un opp de Troons sauten 24 Eltestasch, met witte Kjleeda aunjetrocken. Dee hauden goldne Kroonen opp de Kjap.

⁵Un von dän Troon kjeemen Blitzstrolen un Jewittaschläaj un Stemmen; un ver dän Troon brenden säwen Lichta, daut Gott siene säwen Jeista sent.

⁶Ver dän Troon wia waut, daut et soo sach aus een Glausmäa von Kristal, un medden aum Troon un om dän Troon wieren vea Tieren, von väaren bat hinjen voll Uagen.

⁷Un daut ieeschte Tia sach daut aus een Leiw, un daut aundre Tia wia soo aus een Kaulf, un daut dredde haud een Jesecht aus een Mensch, un daut vieede Tia wia soo aus een flieejenda Odla.

⁸Un dee vea Tieren hauden jieda sas Flichten, wieren runtom voll Uagen, soogoa unja de Flichten, hauden Dach un Nacht nich Ru un säden: Heilich, heilich, heilich es de aulmajchtja Gott un Har, dee doa wia, dee doa es, un dee doa kjemt.

⁹Un wan de Tieren däm lowden, ieeden un dankten, dee opp däm Troon saut, dee von Eewichkjeit to Eewichkjeit läft,

¹⁰follen de 24 Eltestasch ver däm dol, dee opp däm Troon sett, un bäden dän aun, dee doa von Eewichkjeit to Eewichkjeit läft, un schmeeten äare Kroonen ver dän Troon han un säden:

¹¹Du best daut wieet, oo Har, Harlichkjeit un Iea un Krauft to nämen, wiels du aules jemoakt hast. Derch dienen Wellen es aules doa un jemoakt worden.