Read Plautdietsch (Low German) – De Bibel Openboarunk 8 Bible Online

Openboarunk 8 - Plautdietsch (Low German) – De Bibel bible

Openboarunk 8

¹Aus daut Laum daut säwende Säajel opmuak, wort daut em Himmel ojjefäa eene haulwe Stund gaunz stell.

²Un ekj sach, daut de säwen Enjel, dee doa ver Gott stonen, säwen Trompeeten jejäft worden.

³Dan kjeem een aundra Enjel met eene goldne Komm un stunt ver däm Opfadesch. Däm wort väl Weiruak jejäft, met de heilje äare Jebäda opp dän goltbetroknen Opfadesch ver dän Troon to opfren.

⁴Un de Ruak von daut Weiruak jinkj met de heilje äare Jebäda toop ut dän Enjel siene Haunt nopp ver Gott.

⁵Dan neem de Enjel de Komm un feld dee met Fia vom Opfadesch un schmeet daut opp de Ieed, un dan rummeld un kracht daut. De Blitz strold un de Ieed bäbd.

⁶Dan muaken de säwen Enjel, dee de säwen Trompeeten hauden, sikj reed doamet to blosen.

⁷De ieeschta Enjel blosd siene Trompeet, un dan kjeem Hoagel met Fia un Bloot jemenjt, un daut wort rauf opp de Ieed jeschmäten. Un een Dreddel von de Ieed un een Dreddel von aulet jreene Graus vebrend.

⁸De tweeda Enjel blosd siene Trompeet, un dan wort soowaut aus een groota brennenda Boajch em Mäa jeschmäten. Un een Dreddel vom Mäa wort Bloot,

⁹un een Dreddel von aules waut em Mäa läwd jinkj doot, un een Dreddel von de Schäp worden en de Grunt jebrocht.

¹⁰De dredda Enjel blosd siene Trompeet. Dan foll een groota Stiern, brennent aus een Fiastock vom Himmel, un dee foll opp een Dreddel von de Wotastreem un opp de Wotakjwalen.

¹¹Un dee Stiern heet Bettanis. Un een Dreddel vom Wota wort soo betta, daut väl Menschen doavon storwen.

¹²Dan blosd de vieeda Enjel, un daut schluach een Dreddel von de Sonn, een Dreddel von de Mon un een Dreddel von de Stierns, soo daut dee aula een Dreddel diesta worden. Un soo wia een Dreddel vom Dach uk een Dreddel von de Nacht onen Licht.

¹³Un ekj kjikjt, un hieed een Odla medden derch däm Himmel flieejen, dee schrieech met lude Stemm: Wee, wee, wee fa dee, dee opp de Ieed wonen, wan see dee Trompeeten hieren woaren, dee de latste dree Enjel noch blosen motten!