Read Plautdietsch (Low German) – De Bibel Openboarunk 9 Bible Online

Openboarunk 9 - Plautdietsch (Low German) – De Bibel bible

Openboarunk 9

¹Dan blosd de fefta Enjel siene Trompeet; un ekj sach een Stiern, dee vom Himmel opp de Ieed jefollen wia. Un däm wort de Schlätel toom gruntloosen Aufgrunt jejäft.

²Un hee muak dän gruntloosen Aufgrunt op, un doa kjeem een Ruak rut aus wan een groota Owen rieekjat. Un von dän Ruak worden de Sonn un de Loft diesta.

³Dan kjeemen ut dän Ruak Graushoppa opp de Ieed nopp. Un dän wort soone Krauft jejäft, aus de Skorpionen opp de Ieed haben.

⁴Dän wort jesajcht, daut see äaren Schoden nich aun daut Graus opp de Ieed ooda Plaunten ooda Beem utrechten sullen, oba bloos aun dee Menschen, dee nich Gott sien Säajel aum Stiern hauden.

⁵An wort nich Krauft jejäft doottomoaken, oba fief Moonat to kjwälen. Äare Kwol wia soo aus wan een Skorpion stakjt.

⁶En dee Tiet woaren Menschen nom Doot sieekjen, oba woaren dän nich finjen. See wudden jieren stoawen, oba de Doot woat an ut däm Wäaj gonen.

⁷De Graushoppa sach daut soo aus Pieed, dee toom Kjrich reedjemoakt wieren. Waut see opp däm Kopp hauden, sach daut aus goldne Kroonen. Äare Jesechta sach daut aus Menschenjesechta.

⁸Äare Hoa sach daut aus Frueshoa, un see hauden Tänen aus een Leiw.

⁹Brostschilten hauden see, aus wan dee von Iesa wieren, un met äare Flichten muaken see een Jelud aus wan met een grootet Schoof Pieed un Woages toom Kjrich jejoacht wort.

¹⁰Zäajel hauden see aus Skorpionen, met Stachels doabennen. Un dee hauden Krauft en äare Zäajel, de Menschen fief Moonat to kjwälen.

¹¹Un aus äaren Kjennich, hauden see dän Enjel vom gruntloosen Aufgrunt, dee en hebräisch Abadon heet, un en griechisch Apolion. [3]

¹²Een Wee es nu jewast. Oba kjikj, doa komen noch twee mea.

¹³Dan blosd de sasta Enjel siene Trompeet; un ekj hieed eene Stemm von de vea Hieena aum goldnen Aultoa komen, dee ver Gott steit.

¹⁴Dee säd to dän sasten Enjel, dee de Trompeet haud: Lees de vea Enjel loos, dee bie dän grooten Wotastroom Eufrat jebungen sent.

¹⁵Dan worden de vea Enjel loosjeloten, dee doa reed wieren opp däm Joa, opp de Moonat, opp däm Dach un opp de Stund, een Dreddel von de Menschen doottomoaken.

¹⁶Un ekj hieed, daut daut eene Armee von 200.000.000 Soldoten opp Pieed wia.

¹⁷Un de Pieed sach ekj en eene Vision soo: Dee waut doabowen sauten, hauden fiaroode, bleiwelje, schwäwelblitt jäle Brostschilten, un de Pieed hauden Kjap aus Leiwskjap, un ut däm Mul spieejen see Fia, Ruak un Schwäwelblitt.

¹⁸Un derch dise dree Ploagen, Fia, Ruak un Schwäwelblitt, daut an ut äare Miela kjeem, wort een Dreddel von de Menschen dootjemoakt.

¹⁹Wiels äare Krauft haben see em Mul un en de Zäajel, wiels äare Zäajel sent soo aus Schlangen met Kjap, met dee see Schoden aunrechten.

²⁰Oba de äwaje Menschen, dee derch dise Ploagen nich wieren to doot jekomen, kjieeden doch nich om, daut see nich mea de Soton un äare selfstjemoakte Aufjetta von Golt, Selwa, Messinkj, Steen un Holt aunbäden, dee nich seenen, nich hieren uk nich gonen kjennen.

²¹See bekjieeden sikj uk nich, daut see opphieeden to morden, to stälen, un Zaubarie un Huararie to driewen.