Read Plautdietsch (Low German) – De Bibel Rut 4 Bible Online

Rut 4 - Plautdietsch (Low German) – De Bibel bible

Rut 4

¹Boas jinkj dän Morjen un sad sikj opp däm jeweeneljen Vesaumlungsplauz met de aundre Mana bie daut Stautspuat dol. Dan kjeem dee, von wäm Boas ea jerät haud, dee de ieeschte Fliet haud fa Rut opptokomen. Boas roopt am un säd: Komm sat die hia dicht bie ons dol. Dee kjeem uk fuaz un sad sikj dol.

²Dan kroagd Boas tieen von de Stautsvodasch, daut see sikj dicht bie an dol saden. Aus aule sikj hanjesat hauden

³säd Boas to däm Maun, dee sien Frintschoft wia: Nu daut Noomi von Moab trigjekomen es, well see Elimelech, dee ons Frintschoft es, sien Flekj vekjeepen.

⁴Ekj docht mau du sust daut weeten, daut du däm hia ver aul dise Stautsvodasch kjeepen kust, wan du west. Du best daut ieeschte, waut en de Famielje aun de Rieej es dän to kjeepen. Ekj well mau weeten auf du dän west, wiels wan nich, dan sie ekj daut näakjste aun de Rieej. Jana säd: Ekj woa dän kjeepen.

⁵Dan säd Boas: Wan du daut Flekj von Noomi kjafst, dan nemst du die uk äwa, daut du fa Rut, de moabitische Wätfru von Noomi äa vestorwna Sän, oppkomen woascht un ar eenen Sän jäwen woascht, dee dit Flekj kjrieen woat.

⁶Dan säd jana: En däm Faul, lot ekj mie daut rajcht vebie gonen. Wan dit Flekj dan nich en miene Famielje blift, dan saj ekj to die, kjeep däm. Soo kaun ekj dän nich kjeepen.

⁷Aus hee to Boas soo säd, Kjeep däm, dan neem hee siene Schoo auf un jeef Boas dee. Frieejoa wan eena en Israel een Haundel muak ooda sien Rajcht aufjeef, jeef dee wäa waut aufjeef, siene Schoo no däm, dee daut neem. Dan wist jieda eena daut de Haundel foadich wia.

⁹Un Boas säd to de Stautsvodasch un aule waut doa wieren: Jie sent vondoag Zeijen daut ekj aul daut Launt, waut Elimelech, Kiljon un Machlon jehieed, von Noomi jekoft hab.

¹⁰Ekj hab uk Rut, de moabitische Fru, dee Machlon siene Fru wia, aus miene Fru nenjenomen om dän Famielje Nomen wieda to droagen met daut Launt. Wie wellen Elimelech sienen Nomen en onse Famielje un en dise Staut nich utstoawen loten. Jie aula sent vondoag Zeijen.

¹¹Un de Vodasch un aule waut doa toohorchten säden: Wie sent Zeijen. Mucht de HAR Jnod jäwen, daut diene Fru kunn soo sennen aus Rahel un Lea, derch woone daut gaunze Israel aufstaumen. Wie wenschen die, daut du en Efrata goot buaren kust, un en Betlehem goot aunjeseenen woascht sennen.

¹²Muchten de Nokomen, dee du von dise junge Fru kjrichst, soo sennen aus de Famielje von Perez, Juda un Tamar äa Sän.

¹³Doamet neem Boas Rut no Hus un see wia siene Fru. De HAR jeef sienen Säajen doatoo, daut see schwanga wort un eenen Sän kjrieejen.

¹⁴De Nobafrues säden dan to Noomi: Wie preisen däm HARN, daut hee die nich onen Nokomen jeloten haft. Mucht hee en gaunz Israel aunjeseenen sennen.

¹⁵Diene Schwieedochta, dee die soo goot es, es die nu mea wieet aus säwen Säns. Dee haft die nu een Grootsän jejäft, dee die nieet Läwen jeft, un dee en diene elre Joaren fa die oppkomen woat.

¹⁶Noomi neem daut Kjint oppe Schoot un fläajd daut.

¹⁷De Räd mank de Nobafrues wia, daut Noomi eenen Sän haud. See jeewen am dän Nomen Obed. Obed wort de Voda to Isai, un Grootvoda to David.

¹⁸Dee waut von Perez no de Rieej bat David aufstaumen, sent, Perez, Hezron, Ram, Aminadab, Nachschon, Salmon, Boas, Obed, Isai, un David.