Read Plautdietsch (Low German) – De Bibel 1. Samuel 1 Bible Online

1. Samuel 1 - Plautdietsch (Low German) – De Bibel bible

1. Samuel 1

¹Doa wia een jewessa Maun von Ramatajim Zofim en de Boaj en Efraim, dee heet Elkana. Hee wia von däm Staum Efraim un sien Voda wia Jeroham, un sien Grootvoda wia Elihu. Un Elihu sien Voda un Grootvoda wieren Tohu un Zuf.

²Elkana haud twee Frues un dee heeten Hana un Peninna. Peninna haud Kjinja oba Hana haud kjeen Kjint.

³Elkana jinkj Joa fa Joa emma pinkjlich von siene Städ no Silo, daut hee aunbäden un Opfa brinjen kunn ver däm HARN, dee aules rejieet. En Silo wieren Eli siene twee Säns, Hofni un Pinhas, de Priesta fa däm HARN.

⁴Dän Dach wan Elkana sien Opfa muak, jeef hee Stekja von daut Opfa no Peninna, siene Fru, un no aul äare Säns un Dajchta.

⁵Un wan hee Hana uk goot wia, jeef hee ar bloos een Stekj, wiels de HAR ar kjeen Kjint jejäft haud.

⁶Peninna dan deed Hana sea veachten un beleidjen, wäajen de HAR ar kjeen Kjint jejäft haud.

⁷Dit wort jieda Joa. Jiedatsmol, wan see no däm HARN sien Hus jinjen, poakad Peninna doa soo väl aun, daut Hana nich äten kunn un eefach hielen must.

⁸Un äa Maun, Elkana säd to ar: Hana, wuarom hielst du? Un wuarom atst du nuscht? Wuarom best du soo bedrekjt? Sie ekj die nich mea wieet aus tieen Säns?

⁹Eemol, aus see en Silo jejäten un jedrunken hauden, jinkj Hana vom Desch. Eli, de Priesta, saut jrod bie däm Däarenpost von däm HARN sien Hus.

¹⁰Hana wia sea jeschloagen un bäd däm HARN aun unja betre Tronen.

¹¹See muak een Vespräakjen en äa Jebäd un säd: HAR, dee aules rejieet, wan du werkjlich mien Älent aunseenen wurscht un fa mie, diene Deenarin, enstonen wurscht, un du mie eenen Sän jäwen wurscht, HAR, dan woa ekj am die jäwen soo lang aus hee läft. Un däm woaren niemols siene Hoa aufjeschnäden woaren.

¹²Aus see doa soo ver däm HARN bäd, beoobacht Eli äa Mul.

¹³Hana muak een stellet Jebäd. See rieed bloos äare Leppen, oba äare Stemm wia nich to hieren. Aus Eli daut sach, docht hee see wia bedrunken.

¹⁴Un hee säd to ar: Woo lang woascht du hia heichlen? Du best bedrunken! Wacht bat du bie dien Vestaunt best.

¹⁵Oba Hana säd: Nä, mien Har. Ekj sie eene sea vestemde Fru. Ekj hab kjeen Wien ooda aundret stoakjet jedrunken. Ekj läd hia miene Seel op ver däm HARN.

¹⁶Mien Har, du sust nich soo prost von mie denkjen. Ekj hab hia dise gaunze Tiet mien Älent ver däm HARN jebrocht.

¹⁷Dan säd Eli to ar: Dan go en Fräd. Mucht Israel äa Gott die daut jäwen om waut du jebät hast.

¹⁸Un see säd: Muchst du emma soo jenstich to mie sennen. Un see jinkj trigj un eet, un wia nich mea soo truarich.

¹⁹Tiedich aum näakjsten Morjen wieren see opp un bäden noch wada ver däm HARN. Dan jinjen see trigj no Rama. Elkana un Hana vehilden sikj aus Maun un Fru, un de HAR wia bedocht om ar.

²⁰Un Hana wort schwanga un kjrieech om eene Tiet eenen Sän. See jeef am dän Nomen Samuel, wiels, un soo säd see, Ekj hab däm HARN doano jefroacht.

²¹Dan kjeem dee Tiet wada wua Elkana un aul siene Menschen no Silo jinjen om dän HARN äa jeweeneljet Opfa fa daut Joa un daut vesproakne Opfa to brinjen.

²²Hana oba, jinkj ditmol nich. See säd to äaren Maun: Wan ekj am ieescht nich mea selfst besorjen doo, dan woa ekj am nämen, soo daut hee ver däm HARN komen kaun un doa de gaunze Tiet bliewen.

²³Un äa Maun wia daut goot. Hee säd: Doo daut soo aus die daut rajcht schient, un wacht bat hee von die aufjewant es. Soo lang aus däm HARN sien Wellen jedonen woat.

²⁴Aus Samuel dan een poa Joa oolt wia, brocht Hana am no Silo. See neem uk eenen dree joaschen Boll, eenen Pinjel Mäl, un een Lada voll Wien. Soo brocht see Samuel no däm HARN sien Hus, soo junk aus de Jung uk noch wia.

²⁵Doa schlachten see dän Boll un brochten daut Kjint no Eli.

²⁶Un Hana säd to Eli: Entschulj mie, mien Priesta. Oba kaust du die daut noch denkjen aus ekj een poa Joa trigj hia ver die stunt un bäd dän HARN aun? Ekj sie dee Fru,

²⁷un dit es daut Kjint wua ekj don om bäd. De HAR haft mie jejäft no waut ekj fruach.

²⁸Un nu brinj ekj am no däm HARN. Soo lang aus hee läft, jehieet hee däm HARN. Un see kjneeden sikj aula ver däm HARN.