Read Plautdietsch (Low German) – De Bibel 1. Samuel 16 Bible Online

1. Samuel 16 - Plautdietsch (Low German) – De Bibel bible

1. Samuel 16

¹Un de HAR säd to Samuel: Samuel, woo lang woascht du äwa Saul truaren, no däm daut ekj am tosied jesat hab aus Kjennich äwa Israel? Nemm dienen Huarn un fell däm met Eelj un go no Isai von Betlehem. Ekj hab mie beschloten daut eent von däm siene Säns saul Kjennich sennen.

²Un Samuel säd: Woo kaun ekj doahan gonen? Wan Saul daut to hieren kjricht, woat hee mie ombrinjen. Un de HAR säd: Nemm die eene junge Koo vom Vee met, un saj du best jekomen om een Opfa fa däm HARN to moaken.

³Lod Isai en to daut Opfamol, un ekj woa die doa weeten loten, waut du doonen saust. Du saust fa mie däm ensaulwen, däm ekj die wiesen woa.

⁴Un Samuel deed waut de HAR am säd. Aus hee no Betlehem kjeem, kjeemen de Stautsvodasch am ut Angst entjäajen. See fruagen am auf hee frädlich no an kjeem.

⁵Un hee säd: Jo, ekj well een Opfa moaken fa däm HARN. Moakt junt rein un dan ät jie daut Opfamol met mie toop. Un hee lod Isai un siene Säns en un sach doano daut dee sikj rein muaken, daut see kunnen to daut Opfamol komen.

⁶Aus dee dan kjeemen un hee dän Eliab sach, säd Samuel to sikj selfst: Dee, wäm de HAR jesaulft well haben, steit nu secha ver am.

⁷Un de HAR säd to am: Recht die nich no woo am daut lat, ooda doano woo groot hee jewossen es. Disen hab ekj tosied jesat. De HAR recht nich soo aus de Mensch deit. Een Mensch sitt woo eena von buten lat; oba de HAR kjikjt no daut Hoat.

⁸Dan roopt Isai dän Abinadab, daut dee ver Samuel kjeem. Un hee säd: De HAR haft disen uk nich jewält.

⁹Dan leet Isai Schama väakomen. Un hee säd: De HAR haft disen uk nich jewält.

¹⁰Un Isai leet säwen von siene Säns ver Samuel komen, oba hee säd: De HAR haft dise uk nich jewält.

¹¹Un Samuel säd to Isai: Sent dit aul diene Säns? Un Isai säd: Doa es noch ons jinjsta, David. Dee deit Schop heeden. Un Samuel säd to Isai: Schekj doahan, daut dee häa kjemt. Wie woaren ons nich hansaten, ea dee es häa jekomen.

¹²Un hee schekjt doahan un leet däm komen. De jinjsta wia rodlich un haud dache Uagen; am leet daut schmock. Un de HAR säd to Samuel: Nu sto opp, un saulw däm en. Dit es de rechtja.

¹³Un Samuel neem dän Huarn met de Eelj, un saulwd David doa en, aus hee doa mank siene Breeda wia. Un däm HARN sien Jeist bewees sikj en Krauft opp David von däm Dach aun. Un Samuel jinkj trigj no Rama.

¹⁴Nu kjeem daut, daut däm HARN sien Jeist Saul veleet. Un een beesa Jeist vom HARN kjeem un juach am Forcht en.

¹⁵Un Saul siene Deena säden to am: Horch emol. Doa es een beesa Jeist von Gott, dee die soo enjsten deit.

¹⁶Lot onsen Harn sajen, daut een Mensch saul jesocht woaren, dee goot kaun met de Hoap spälen. Dan wan de Jeist von Gott die aunfajchten deit, kaun dee spälen, un du woascht die wada goot feelen.

¹⁷Un Saul säd to siene Deena: Got un sieekjt mie soonen Mensch un brinjt däm häa.

¹⁸Un eena von de aunjestalde säd: Ekj hab eenen Sän von Isai von Betlehem jeseenen, un dee es sea jeschekjt met siene Hoap. Daut es een browa Maun un een Kjrieja. Hee kaun goot räden un am lat daut goot. Un de HAR es met am.

¹⁹Dan schekjt Saul Mana daut dee no Isai jinjen un säden: Schekj mie dienen Sän David, dee bie de Schop es.

²⁰Un Isai belod een Äsel met Broot un een Lada voll Wien un eene junge Kos, un schekjt dee met sienen Sän David no Saul.

²¹Un David kjeem no Saul un wort däm sien Deena. Saul jleicht David sea, un hee stald am aun aus eena von dee, dee sien Jewäa druagen.

²²Un Saul schekjt eene Norecht no Isai un fruach auf David nich bie am bliewen kunn un am deenen kunn, wiels am dän jefoll.

²³Un jiedatsmol wan de beesa Jeist, dän Gott schekjt, opp Saul kjeem, neem David de Hoap un späld doabowen. Dan feeld Saul sikj wada bäta un de beesa Jeist veleet am.