Read Plautdietsch (Low German) – De Bibel 1. Samuel 19 Bible Online

1. Samuel 19 - Plautdietsch (Low German) – De Bibel bible

1. Samuel 19

¹Saul säd to Jonatan un aul siene aunjestalde, daut see sullen David ombrinjen. Oba Jonatan, Saul sien Sän, jleicht David sea.

²Hee säd to David: Mien Voda, Saul, sieekjt eenen Wajch die omtobrinjen. Nu paus morjen zemorjes sea opp. Vestäakj die un komm nich äwadäl,

³un ekj woa met mienen Voda doa dicht bie oppe Stap komen un met am von die räden. Wan ekj irjent waut utfinjen kaun, woa ekj die daut sajen.

⁴Aus sikj daut don soo romneem, lowd Jonatan David ver Saul un säd: De Kjennich sull nich orrajcht jäajen dän Deena, David doonen. Hee haft die kjeen Schoden jebrocht; hee haft die väl jeholpen.

⁵Hee sad sien Läwen opp Spell aus hee dän Filista doot muak, un de HAR Israel don soo sea jewennen holp. Du sachst daut un freidsd die doatoo. Wuarom wurscht du die dan nu vesindjen un oschuldjet Bloot vejeeten? Wuarom wurscht du David ombrinjen, wan hee nich dän Doot vedeent haft?

⁶Un Saul horcht no Jonatan un hee vespruak am, daut soo secha aus de HAR läft, wudd hee David nich ombrinjen.

⁷Dan roopt Jonatan David un hee säd am aules waut see berät hauden. Un Jonatan brocht David no Saul un hee deend Saul soo aus verhäa.

⁸Doa wia noch wada een Kaumf met de Filista. Un David jinkj met de Truppen jäajen an. Hee schluach sea väl von dee doot, un de äwaje randen von am wajch.

⁹Dan kjeem een beesa Jeist vom HARN opp Saul, aus hee en sien Hus saut un dän Spies enne Haunt haud. David späld jrod met siene Hoap.

¹⁰Un Saul proowd David aun de Waunt naun to spalden met sien Spies. Oba David muak sikj ut däm Stich un de Spies bleef en de Waunt stäakjen. Dan rand David un Saul kunn am nich kjrieen.

¹¹Dee Nacht schekjt Saul no David sien Hus, daut see daut bewoaken sullen un am zemorjes ombrinjen kunnen. Oba Michal, David siene Fru, säd to am: Wan du nich dise Nacht dien Läwen ratst, dan woascht du morjen doot sennen.

¹²Un Michal leet David rauf ut een Fensta un hee rand wajch un see kjrieejen am nich.

¹³Un Michal neem een Aufgott un läd daut en daut Bad nenn. Dan läd see waut Kosenhoa om dän Kopp un läd noch waut Kjleeda doa nopp.

¹⁴Dan aus Saul siene Deena schekjt, daut see am nämen sullen, säd see hee wia krank.

¹⁵Oba Saul schekjt de Deena nochmol, daut see David selfst seenen sullen, un daut see am met Bad toopbrinjen sullen soo daut hee am kunn ombrinjen.

¹⁶Un aus de Deena nenn jinjen, sagen see dän Aufgott en daut Bad un daut Kjessen von Kosenhoa opp däm Koppenenj.

¹⁷Un Saul säd to Michal: Wuarom hast du mie soo hinjat Licht jefieet? Du hast mien Fient loten derchbrennen, daut ekj däm nich kjrie. Un Michal säd: Hee dreiwd mie, un säd hee wudd mie doot schlonen, wan ekj am nich gonen leet.

¹⁸Un David brocht sikj wajch un jinkj no Samuel en Rama. Hee vetald däm aules waut Saul jedonen haud. Un hee un Samuel jinjen no Najot un bleewen doa.

¹⁹Nu kjrieech Saul daut to hieren daut David bie Najot en Rama wia.

²⁰Dan schekjt Saul Deena daut see David faustnämen sullen. Un aus see de Grupp von Profeeten sagen, daut see räden waut nich äare ieejne Wieed wieren, un daut Samuel an leiden deed, kjeem Gott sien Jeist opp Saul siene Deena un dee räden uk, waut nich äare ieejne Wieed wieren.

²¹Aus Saul dit hieed schekjt hee aundre Deena, un dee räden uk waut nich äare ieejne Wieed wieren. Un Saul schekjt daut dredde mol Deena, oba dee räden uk waut nich äare ieejne Wieed wieren.

²²Dan jinkj Saul selfst no Rama un kjeem no dän Borm bie Sechu. Doa fruach hee, wua Samuel un David wieren. Un eena säd am: Dee sent bie Najot en Rama.

²³Un Saul jinkj no Najot en Rama un Gott sien Jeist kjeem uk opp am. Aus hee jinkj, räd hee waut nich siene ieejne Wieed wieren bat hee no Najot en Rama kjeem.

²⁴Un krakjt soo aus aundre Menschen bie soont äaren Rock aufneemen, deed Saul uk, un hee räd waut nich siene ieejne Wieed wieren, doa ver Samuel. Hee lach doa soo dän gaunzen Dach un de gaunze Nacht. Doawäajen woat emma jesajcht: Es Saul uk mank de Profeeten?