Read Plautdietsch (Low German) – De Bibel 1. Samuel 21 Bible Online

1. Samuel 21 - Plautdietsch (Low German) – De Bibel bible

1. Samuel 21

¹Un David stunt opp un veleet. Jonatan jinkj trigj no de Staut.

²Dan jinkj David no däm Priesta Ahimelech en Nob. Däm Priesta räajd daut opp, daut David doahan kjeem, un hee säd: Wuarom best du gaunz auleen jekomen.

³Un David säd to Ahimelech: De Kjennich haft mie no waut jeschekjt, un hee säd ekj sull kjeenem irjent waut sajen waut miene Oppgow es. Un miene Mana hab ekj no eene besondre Städ jeschekjt.

⁴Oba waut hast du hia fa Väarot? Jeff mie fief Brood un waut du sest noch hast.

⁵Un de Priesta säd: Ekj hab hia kjeen jeweeneljet Broot, bloos daut jeweide Broot. Du kaust daut haben, wan diene junge Mana sikj von Frues wajchjehoolen haben.

⁶Un David säd: Oba gaunz rein haben sikj miene Mana von Frues jehoolen. Daut doo wie emma, uk wan wie bie jeweenelje Oabeit sent. Aus ekj veleet wieren de Kjarpa von de Mana nich orrein. Wooväl sechra doch vondoag, daut wie dise Oppgow haben.

⁷Un de Priesta jeef am daut jeweide Broot, wiels doa kjeen aundret Broot wia, aus daut Broot von de Jäajenwuat. See hauden daut von däm Desch jenomen, wiels see aul freschet doahan jesat hauden.

⁸Doa wia dän Dach bie däm Priesta een Maun, dee eent von Saul siene Deena wia. Hee wia doa om eene jesazliche Sach to moaken. Sien Nomen wia Doeg un hee wia een Edomita, de väaschta von Saul siene Hoads.

⁹Un David säd to Ahimelech: Hast du hia een Spies ooda Schwieet, waut ekj brucken kaun? De Kjennich schekjt mie soo haustich wajch, daut ekj nich emol Tiet haud mien Schwieet ooda aundret Jewäa met to nämen.

¹⁰Un Ahimelech säd: Goliat, de Filista, dän du en daut Ieekjen Tol doot muakst, sien Schwieet es hia. Daut es en een Kodda enjerolt un licht doa hinja dän Efod. Wan du west dan nemm daut. Hia es kjeen aundret Jewäa. Un David säd: Doa es noanich een Schwieet soont aus daut. Jeff mie daut.

¹¹Un David muak sikj oppem Wajch un veleet dän Dach von Saul. Hee jinkj no däm Kjennich Achisch, dee en Gat wia.

¹²Un Kjennich Achisch siene Deena säden to am: Es dis David nich de Kjennich en daut Launt? Es dit nich deeselwja fa wäm see daunzten un sungen: Saul haft siene dusende jeschloagen, un David siene tieendusende?

¹³Dit beduad David sea, un hee wia Angst fa däm Kjennich Achisch.

¹⁴Hee stald sikj aundasch opp, un wan hee ver an wia, deed hee soo aus wan hee errsennich wia. Hee vekrauzt an daut Stautspuat, un leet sien Kjwiel velenjd sien Boat ranen.

¹⁵Dan säd Achisch to siene Mana: Kjikjt bloos. Dis Maun es errsennich. Wuarom hab jie am no mie jebrocht?

¹⁶Hab wie nich jenuach errsennje Menschen, daut disa uk noch mott ver mie komen? Mott hee en mien Hus nenn komen?