Read Plautdietsch (Low German) – De Bibel 1. Samuel 27 Bible Online

1. Samuel 27 - Plautdietsch (Low German) – De Bibel bible

1. Samuel 27

¹Een Dach meend David: Ekj woa secha noch een Dach unja Saul siene Macht omkomen. Waut kunn ekj bäta doonen aus no de Filista Jäajent ranen? Dan woat Saul oppjäwen met mie en Israel sieekjen, un dan woat hee mie nich jriepen kjennen.

²Un David un siene 600 Mana muaken sikj opp un jinjen no Maoch sienen Sän Achisch, dee Kjennich en Gat wia.

³David un siene Mana wonden dan bie Achisch en Gat. Jieda Maun haud siene Famielje doa, un David haud siene twee Frues, Ahinoam von Jesreel un Abigajil von Karmel, dee Nabal siene Fru jewast wia.

⁴Aus Saul hieed, daut David no Gat jetrocken wia, proowd hee am nich mea to finjen.

⁵Un David säd to Achisch: Wan wie kjennen frädlich toop wonen, dan jeff mie eene Städ en eent von diene Aunsiedlungen oppem Launt, daut ekj doa won. Wuarom sull ekj en diene Hauptstaut wonen?

⁶Un Achisch jeef am dan de Staut Ziklag. Von don aun es Ziklag noch emma unja een judschen Kjennich jewast.

⁷David wond 16 Moonat en de Filista äare Jäajent.

⁸David un siene Mana äwafollen de Lied en Geschur, Girsi, un Amalek, dee doa aul lang jeläft hauden. See äwafollen de Siedlungen von Schur gaunz bat Ägipten.

⁹Wan David en eene Jäajent wäm äwafoll, leet hee kjeene Menschen doa aum läwen. Oba hee neem äare Schop, äa Vee, äare Äsels un Kameelen un äare Kjleeda. Dan kjeem hee wada trigj no Achisch.

¹⁰Un Achisch fruach am dan: Wua hab jie vondoag wäm äwafollen? Un David säd dan, hee wia en daut Launt em Sieden von Juda jewast, ooda daut Launt em Sieden, wua de Jerachmeelita wonen, ooda uk em Launt em Sieden wua de Kenita sent.

¹¹David leet doa kjeene Menschen aum Läwen. Soo kunn kjeena no Gat gonen un sajen, waut doa werkjlich jeworden wia un weeten loten waut hee werkjlich deed. Dit deed hee de gaunze Tiet aus hee en de Jäajent von de Filista wond.

¹²Soo kjeem daut, daut Achisch een vetruen en David kjrieech. Hee jleewd daut David vedorf sikj daut soo mank de Israeliten, daut hee opp emma wudd am tru bliewen.