Read Plautdietsch (Low German) – De Bibel 1. Samuel 3 Bible Online

1. Samuel 3 - Plautdietsch (Low German) – De Bibel bible

1. Samuel 3

¹De junga Samuel deend däm HARN unja Eli. Un en dee Tiet wia daut selden daut de HAR to wäm räd ooda en eenen Droom no wäm kjeem.

²Eene Nacht schleep Eli en sien Bad. Hee wia don aul meist blint.

³Samuel schleep en däm Tempel bie Gott siene Kjist. De Laump en daut Heilichtum brend noch, sest wia aules diesta.

⁴Dan roopt de HAR: Samuel, Samuel! Un Samuel säd: Ekj kom!

⁵un rand no Eli. Un hee säd: Hia sie ekj. Du roopst mie. Un Eli säd: Ekj hab die nich jeroopt. Go laj die wada dol. Un Samuel jinkj sikj wada dol lajen.

⁶Un de HAR roopt noch een mol: Samuel. Samuel stunt wada opp un jinkj no Eli un säd: Hia sie ekj. Du roopst mie doch. Un Eli säd: Jung, ekj hab die nich jeroopt. Go laj die wada dol.

⁷Samuel haud don noch kjeene Erfoarunk met däm HARN jehaut, un hee kjand däm HARN siene Räd noch nich.

⁸Un de HAR roopt Samuel toom dredden mol. Un Samuel jinkj no Eli un säd, Hia sie ekj. Du roopst mie. Dan wist Eli, daut de HAR Samuel jeroopt haud.

⁹Dan säd Eli to Samuel: Go un laj die dol, un wan hee roopt, dan saj: Räd HAR. Dien Deena horcht. Dan jinkj Samuel un läd sikj dol.

¹⁰Un de HAR kjeem un roopt aus de aundremol: Samuel, Samuel. Un Samuel säd: Räd, dien Deena horcht.

¹¹Dan säd de HAR to Samuel: Horch emol. Ekj woa waut en Israel doonen, daut dee waut daut hieren, daut woat enne Uaren zinjren.

¹²Aun dän Dach woa ekj aules, von Aunfank bat Enj, doonen waut ekj jäajen Eli un siene Famielje jerät hab.

¹³Un ekj saj wäajen Eli, daut ekj woa siene Nokomen opp emma bestrofen fa daut beese waut hee doch von siene Säns wist. Hee wist woo dee Gott lastren deeden un hee leet daut aula toch.

¹⁴Doawäajen saj ekj nu opp eenen Eit, daut de Sinden en Eli siene Famielje woa ekj nienich derch Opfa vejäwen.

¹⁵Samuel bleef em Bad bat zemorjes, un dan jinkj hee de Däaren opmoaken aum HARN sien Hus. Hee fercht sikj Eli to sajen, waut am wia kloa jemoakt worden.

¹⁶Oba Eli roopt Samuel: Samuel, mien Jung. Un Samuel säd: Hia sie ekj.

¹⁷Un Eli säd: Waut säd hee to die? Hool nuscht trigj. Mucht Gott siene Strof opp die komen, wan du mie nich aules sajchst, waut hee die säd.

¹⁸Un Samuel vetald am aules un hilt nuscht trigj. Un Eli säd: Daut es vom HARN. Lot am doonen waut am rajcht schient.

¹⁹Un de HAR wia met Samuel aus hee oppwoss. Hee leet aules soo utkomen aus Samuel daut säd.

²⁰Daut gaunze Israel, von Dan bat Beerscheba, jeewen Samuel de Aunerkjanunk aus däm HARN sien Profeet.

²¹De HAR kjeem emma wada no Samuel en Silo.