Read Plautdietsch (Low German) – De Bibel 1. Samuel 31 Bible Online

1. Samuel 31 - Plautdietsch (Low German) – De Bibel bible

1. Samuel 31

¹Un en dän Kaumf tweschen de Israeliten un de Filista, musten de Israeliten ranen. Väle storwen biem Boajch Gilboa.

²De Filista holden Saul un siene Säns en, un see schluagen Jonatan un Abinadab un Malkischua, Saul siene Säns, doot.

³De Kaumf jinkj schlajcht fa Saul, un waut Kjrieja met Boages un Feilen fungen am un velazten am.

⁴Dan säd Saul to sien Schiltdroaga: Nemm dien Schwieet un stäakj mie doamet, daut dise onbeschnädne nich komen un mie stäakjen un sikj äwa mie Spos moaken. Oba de Schiltdroaga deed daut nich, hee enjst sikj too sea. Dan neem Saul daut Schwieet un schmeet sikj doa nopp.

⁵Oba aus de Schiltdroaga sach daut Saul stoawen deed, neem hee sien Schwieet un schmeet sikj doa nopp, un storf doa met Saul.

⁶Daut es woo Saul un sien Schiltdroaga storwen. Un siene dree Säns un aul siene Mana storwen aula aun dän selwjen Dach.

⁷Un de Mana en Israel, dee von de aundre Sied vom Jesreel Tol wieren, un dee waut von äwa däm Jordan wieren, hieeden, daut de Armee jerant haud un daut Saul un siene Säns doot wieren. Dan veleeten see äare Städa un randen uk. Un de Filista kjeemen un siedelden en dee Städa

⁸Dän näakjsten Dach, aus de Filista kjeemen om de jefolne Kjrieja to bestälen, fungen see Saul un siene dree Säns opp däm Gilboa Boajch.

⁹See hakten sien Kopp auf un neemen sien Jereetschoft, un schekjten eene Norecht no aul de Filista äare Städa, om de goode Norecht no aule Jetta un Menschen to brinjen.

¹⁰See neemen Saul sien Kjrichsjereetschoft no däm Tempel von Astarte un see hongen sien Kjarpa opp aun de Mia rom Bet Schean.

¹¹Oba aus de Lied von Jabesch en Gilead hieeden, waut de Filista met Saul jedonen hauden,

¹²jinjen äare browe Mana enne Nacht un neemen Saul sienen Kjarpa un uk dee von siene Säns von de Mia bie Bet Schean, un see neemen dee no Jabesch un vebrenden dee doa.

¹³Dan begrowden see de Knoakes, waut äwajebläwen wieren, unja dän Tamariskenboom en Jabesch. Dan fausten see fa säwen Doag.