Read Plautdietsch (Low German) – De Bibel 1. Samuel 5 Bible Online

1. Samuel 5 - Plautdietsch (Low German) – De Bibel bible

1. Samuel 5

¹Aus de Filista Gott siene Kjist faustneemen, druagen see dee von Eben Eser no Aschdod.

²Un de Filista druagen Gott siene Kjist en daut Hus von äaren Aufgott, Dagon, un saden dee biesied Dagon han.

³Oba dän näakjsten Dach tiedich, aus de Lied von Aschdod oppstunden, sagen see Dagon omjefollen met sien Jesecht oppe Ieed ver däm HARN siene Kjist. Un see hoowen am aun un rechten am wada opp.

⁴Oba dan aum tweeden Dach, aus see kjikjen jinjen, wia Dagon wada opp de Ieed jefollen ver däm HARN siene Kjist. Un Dagon sien Kopp un siene beid Henj wieren auf un lagen enne Däa, un bloos de Kjarpa von Dagon wia gaunz.

⁵Daut es wuarom de Priesta fa Dagon un aule waut en daut Hus fa däm Aufgott Dagon nengonen, nich opp de Schwal staupen bat opp dän vondoagschen Dach.

⁶De HAR bestroft de Lied en Aschdod un enjst an. Hee jeef de Lied Schwäaren, beides dee waut en Aschdod wonden un dee en de Omjäajent.

⁷Un aus de Menschen en Aschdod sagen, waut doa wort, säden see: De Kjist fa de Israeliten äa Gott saul nich lenja bie ons bliewen, wiels de Israeliten äa Gott ons Dagon un onse Menschen bestroft.

⁸Un see kroagden aul de Volkjsleida von de Filista toop un fruagen sikj, waut see met de Kjist fa de Israeliten äa Gott doonen sullen. Un see meenden see wudden dee no de Staut Gat droagen; un see druagen de Kjist fa de Israeliten äa Gott doa han.

⁹Doch aus see dee doahan jenomen hauden, kjrieejen see däm HARN siene Macht to feelen un see enjsten sikj sea. De Lied kjrieejen doa uk Schwäaren, de junge krakjt soo aus de oole.

¹⁰Dan schekjten see Gott siene Kjist no Ekron. Oba de Menschen en Ekron grunsten fuaz un säden: Nu haben see ons de Israeliten äa Gott siene Kjist jebrocht, daut wie un de Lied en onse Omjäajent stoawen sellen.

¹¹Doaropp roopten see noch eemol aule Volkjsleida von de Filista toop, un see säden: Well wie de Kjist fa de Israeliten äa Gott wajchschekjen, doahan wua dee hanjehieet. Dan woa wie veleicht nich mea dise Doodes mank ons haben. En de gaunze Staut enjsten de Lied sikj aul grulich, wiels Gott siene Macht doa soo sea bewäsen haud.

¹²Un dee waut nich storwen, kjrieejen de Schwäaren. De Lied schrieejen no de Jetta om Help.