Read Pochuri Naga ATÜTSAR 11 Bible Online

ATÜTSAR 11 - Pochuri Naga bible

ATÜTSAR 11

¹Tükhu vü thuoüji azhih aveh azhü küsü mpa thi zhünyo pikewie.

²Anyiri tü zhieshu wuovü nüh pri küru kümjie Shinar vü kütake ngu nü jüla rhotewa.

³Thinü mari tü küsü nüh küsü vü, “Raluo, hiri küveloh sa ünüh, jüma tü veh kükrü sheh naveh ünüh,” ti jüle. Jüti sanü mari tü küveloh vi nü aloh sa thi anyi vi nü küzhetevüh sa.

⁴Jüti sanü mari tü, “Raluo, hiri mpa nüh anyuji küsü sa ünüh, thi aloh nüh vi loju nü atülü küüju taji hiri mpa hiri anyo saküji ünüh, jüüta nyuthuoüji hiri tü azhih aveh vü vorieporie tewa naveh,” ti jüle.

⁵Jüti küsa vü anyira tsari nüh anyuji thi akhajie saküsawa no nti VÜWA tü turu.

⁶Thinü VÜWA nüh, “Halie, mari tü anyi küsü wiethuoh, thi mari tü azhü küsü mpa phraveh, mari nüh mowa sanaveh ünüh hama nüh apokhu saveh, thi mari nüh mowa sa nta sanaveh ünüh zanyoküsü nga müküsara münyie nüh satewanathuoh.

⁷Raluo, hiri wa nü mari azhü saküjakünya tsü nü mari küsü nüh küsü müküthsüluora satsüm ünüh,” ti sa.

⁸Jüti sanü VÜWA nüh jüla nüh mari saküporie nü azhih aveh vü küzem nü anyujiwa küsa külem.

⁹Jükenüh anyuji jüma anyo tü Babel ti jimtü, küpakenühnyunü VÜWA nüh jüla nüh azhih aveh azhü sakürüza kümtü kenüh; thi jüla nüh VÜWA nüh mari azhih aveh vü saküporiem.

¹⁰Hamari tü Shem küshukürari. Ajuh jiküm mahvi künyi sevü Shem mahvi müzake khruom chih ünüh Arpakshad apa sa. Thi Arpakshad wuo küm sevü Shem tü mahvi müzamnga rho, thi atsa nyimpari nga thi nyimzari nga ngu le.

¹¹Thi Arpakshad wuo küm sevü Shem tü mahvi müza münga rho, thi atsa nyimpari nga thi nyimzari nga ngu le.

¹²Arpakshad mahvi cherake nü münga khruom ünü atsa nyimpa Shela ti küsawa ngura;

¹³Shela wuoküm sevü Arpakshad tü mahvi müzamzü nü küche rho nü atsa nyimpari nga thi nyimzari nga ngule.

¹⁴Shela mahvi cherake rhoküm sevü ma tsa Eber ngura;

¹⁵Eber wuoküm sevü Shela tü mahvi müzamzü nü küche rho nü atsa nyimpari nga thi nyimzari nga ngu le.

¹⁶Eber mahvi cherake nü müzü juküm sevü atsa nyimpari küsü Peleg ti küsawa ngura;

¹⁷Peleg wuo küm sevü Eber tü mahvi müzamzü nü cherake rho nü atsa nyimpari nga thi nyimzari nga ngu le.

¹⁸Peleg mahvi cherake juküm sevü atsa nyimpari küsü Reu ti küsawa ngura;

¹⁹Reu wuo küm sevü Peleg tü mahvi müzakünyi nü tüguh rho nü atsa nyimpari nga nyimzari nga ngu le.

²⁰Reu mahvi cherake nü künyi juküm sevü atsa nyimpari küsü Serag ti küsawa ngura;

²¹thi Serag wuo küm sevü Reu tü mahvi müzakünyi nü türü rho nü atsa nyimpari nga thi nyimzari nga ngu le.

²²Serag mahvi cherake küm sevü atsa nyimpari küsü Nahor ti küsawa ngura:

²³thi Nahor wuo küm sevü Serag tü mahvi müzakünyi rho nü atsa küpari nga ngu le.

²⁴Nahor mahvi mükeke nü tüguh juküm sevü atsa nyimpari küsü Tera ti küsawa ngura;

²⁵thi Tera wuo küm sevü Nahor tü mahvi müzake nü türatüguh rho nü atsa nyimpari nga thi nyimzari nga ngu le.

²⁶Tera mahvi rürake rhoküm sevü nüh atsa nyimpari Abram, Nahor thi Haran ngura.

²⁷Hamari tü Tera küshukürari. Tera tü Abram, Nahor thi Haran apa; thi Lot apa tü Haran.

²⁸Haran tü ma pa Tera atüvü nüh ma küwuo pe Khaldeari azhie Ur vünüh süm.

²⁹Jüti küsa vü Abram thi Nahor masü tü vüvüh vi; Abram vüvüh anyo thuoüji Sarai, thi Nahor vüvüh anyo thuoüji Milka. Ma tü Haran atsa Milka thi Iska masü apa.

³⁰Thitü Sarai tü vükrem, atsa münyie nüh sam.

³¹Tera tü ma tsa Abram thi ma zhü Lot, Haran atsa thi ma jünyi Sarai, Abram vüvüh ti sie nü Kheldeari azhih Ur vünüh tse Kanan vü wa nti wa, thitü mari tü Haran vü ruju ünü jüla rhotewa.

³²Tera kürho mahvi müzakünyi nü münga jum nü Haran vünüh süm.