Read Pochuri Naga ATÜTSAR 13 Bible Online

ATÜTSAR 13 - Pochuri Naga bible

ATÜTSAR 13

¹Jü sevü Abram tü ma vüvüh, ma zhi aveh vi thi Lot ti sie nü Egypt vünüh shutewa taji Negeb vü tetu.

²Abram tü mieshü-miesah, raka thi suna nyirhie sheh.

³Ma tü Negeb vünüh Bethel vü wa, thi tükhu vü ma nüh wa nü kürhokhu azhie Bethel thi Ai azhie vü,

⁴ma nüh apokhu vü kükhurüpe küsakhuwa vü wa; thi jüti sanü Abram tü jüla nüh VÜWA nyo küji sa.

⁵Lot, ma vü nyiküwawa nga anyihzhü, ase-ashuh thi juhthsüzhehri peh,

⁶jükenüh masü kenüh are kümrhuope mütse nüh sanü kürü müpehra nüh satewa, küpakenühnyunü masü ase-ashuh tü küzhile kenüh,

⁷jüti küsa vü ma seshuh kühuori thi Lot seshuh kühuori azhie vü müka nüh satewa. Jüti küsa tsothovü Kananri thi Perizri tü azhih jüla rhopeh wieveh.

⁸Thinü Abram nüh Lot vü, “Hisü azhievü thi hisü ase-ashuh kühuori azhie vü müküka müküpeh tümluo, küpakenühnyunü hisü tü küshuküturi wiethuoh nü.

⁹Noh tüvü azhie aveh noh mpa nüh ngumveh ülo? Noh mpa hi vünüh küpatewaluo. Noh nüh azhu wuovü tseke nta tü hi nüh azhie wuovü tseke tewa nathuoh; nyutü noh nüh azhie wuovü tseke nta tü hi nüh azhu wuovü tseke nathuoh,” ti küza.

¹⁰ Thinü Lot tü toke nü noküze ünü Jordan nyuo Zoar küju azhie aveh vü rherho nü ajuh pehküveh, VÜWA phahri kümjie thi Egypt vü kümjie ngura; hamatü Sodom thi Gomorrah müjie küzorie tüvü thuoh.

¹¹Jükenüh Lot tü Jordan anyuo wuovü rüka vi nü zhieshu wuovü tseketewa; jüti sanü masü tü poriem.

¹²Abram thuoüji Kanan zhih vü pehtewa thi Lot thuoüji anyuo vü anyujiri aza vü rho thi ma juhthsüzheh tü Sodom kütuo vü sa.

¹³Sodomri tü khuke müsüm thi VÜWA tüvü kükhiemuo küji küsari.

¹⁴Lot nüh Abram sie porie küm sevü VÜWA nüh ma vü, “Noh notha toke nü noh nüh tsieküveh vünüh zhieseh vü thi zhietü vü, thi zhieshu vü thi zhietu vü noküze luo;

¹⁵ küpakenühnyunü noh nüh ngu küveh azhie aveh noh vü thi noh tsatori vü küsuokürho tsü naveh.

¹⁶Hi nüh noh tsatori tü azhih zhitho zake satsü naveh; thi nyi küsü nüh azhih zhitho chiera thuoüji noh tsatori nga küchiera sanaveh.

¹⁷Sühra nü azhih hi nüh noh vü tsü na saküveh achu thi aveh vü tsewaluo, küpakenühnyunü jü aveh hi nüh noh vü tsü na saküveh kenüh,” ti küza.

¹⁸Thinü Abram tü ma küpehpewa kütsele nü Mamre vü nguzheza vü pehtewa, thi jümari tü Hebron vü; thi ma tü jüla nüh kükhurüpe sanü VÜWA tsü.