Read Pochuri Naga ATÜTSAR 14 Bible Online

ATÜTSAR 14 - Pochuri Naga bible

ATÜTSAR 14

¹Shinar vü kajiwa Amrafel, Ellasar vü kajiwa Ariok, Elam vü kajiwa Khedorlaomer thi Goiim vü kajiwa Tidal tsotho vü,

²Sodom vü kajiwa Bera, Gomorrah vü kajiwa Birsha, Adma vü kajiwa Shinab, Zeboiim vü kajiwa Shemeber thi Bela (jüma tü Zoar) kajiwa sie nü arie sa.

³Kaji münga hamari tü Sidim nyuo, (jüma tü Amtsü souzü) vünüh mari sezhuh khe.

⁴Mari tü mahvi türakünyi Khedorlaomer kütsü sa, thitü mahvi türakücheawa thuoüji mari sie saluo tewa.

⁵Mahvi türamzüwa thuoüji Khedorlamer thi kajiri ma siekütseri tü Ashterotkarnaim vü Refaim, Ham vü Zuzim, Shavehkiriathaim vü Emim,

⁶thi Edom küzhiho nyujiri vü Horri cham nü Elparam reza rüshu küju zhewa.

⁷Jüti sanü mari tü shele nü Enmishpat, Kadesh vü teru, thi Amalekra anyu aveh cham, thi jü mpa mükünyu Hazazontamar vü küpeh Amorri aveh nga cham.

⁸Thinü Sodom kajiwa, Gomorrah kajiwa, Adma kajiwa, Zeboim kajiwa thi Bela, (jüma tü Zoar) Zoar kajiwa tü tsezhuwa nü Sidim nyuo vünüh sarü,

⁹Elam kajiwa Khedorlaomer, Goiim kajiwa Tidal, Shinar kajiwa Amraf el thi Elasar kajiwa Ariok sie saluo, kaji müzü nüh kaji münga sie saluo.

¹⁰Sidim nyuo tü athsonyi zhikrie mpa, Sodom thi Gomorrah kajiri kütevü mari wuori thuoüji zhikrie jüri lovü küluket, thi küpari thuoüji küzhiho vü tekewa.

¹¹Thi mükünongüri nüh Sodom thi Gomorrah tsokrü aveh thi kütsaküzhu aveh vi nü tewa;

¹²jü mpa mükünyu mari tü Lot, Abram anü atsa, Sodom vü pehküveh thi ma tsokrüri nga ti vi nü tewa.

¹³Thinü küthi kütera nyi küsü nüh ru nü Abram, Ebriwa, Mamre Amorwa nguzheza kütuoh vü kürhowa vü zhüke aveh tsü. Mamre thi ma jie Eshkol thi Aner tü Abram sie zarike küsari.

¹⁴Abram tü ma zhü re nü küsi satewathuoh taküsa thsüra ünü ma zheh vünüh küwuo arie küsari jizhuh nü mari müzaküche nü türatüze sie nü mari zhe Dan küju wa.

¹⁵Thi ma nüh arüza vü ma rienyiri küsuo nü mari zhe taji chara kheh, ma thi ma sieperi nüh mari zhe Hoba, Damaska zhietü wuovü küju wa.

¹⁶Jüti sanü mari nüh atsokrü viteküwari aveh ngura le nü ma nüh ma zhü Lot thi ma tsokrüri, nyimzari thi anyiri aveh sieteru le.

¹⁷Ma nüh Khedorlaomer thi ma kaji ma sie kütseri cham nü teküru vü Sodom kajiwa tü Shav Anyuo (jüma tü Kajiwa Nyuo) vünüh ma mütu nti tsezhuwa.

¹⁸ Jüti küsa vü Salem vü Kajiwa Melkhizedek tü lohse thi akhah ti vi nü Abram vü ru. Melkhizedek tü Saküüwuowa Kümsie Tsa anavüwa.

¹⁹Thi ma nüh ma tsiatsü taji, “Saküüwuowa Kümsie Tsawa, Thajüwu thi azhih küsawa nüh tsia Abram kütsüwa saluo;

²⁰Thi Saküüwuowa kümsie Tsawa nüh noh mükünongüra nyiehvü saküükhrawa tü kütsia küvüwa saluo!” ti küza. Jüti küsa vü Abram tü zanyo aveh nga türake vü küsü vi ma tsü.

²¹Thinü Sodom kajiwa nüh Abram vü, “Atsokrü nü noh mpa nüh vimketü nga anyiri thuoüji hi tsüm le luo,” ti khuo.

²²Abram nüh rüle taji, “Saküüwuowa Kümsie Tsawa vünüh hi nüh küshie wieveh nü,

²³hi thuoüji alo lohso küsü nga nyutü jiküükruvüh li küsü nga thi noh zhi ta küsa zanyo küsü nga küviwa nyu, küpakenühnyunü hi nüh Abram sakünyirhie ta küsa noh nüh thama küüphrahte kenüh.

²⁴Hi thuoüji zanyo küsü nga küviwa nyu, thitü vizari nüh mowa tsathuoh ünüh hi nüh vi naveh, thi hi sie küwari müthoh tü Aner, Eshkol thi Mamre nüh küvi luo,” ti küza.