Read Pochuri Naga ATÜTSAR 15 Bible Online

ATÜTSAR 15 - Pochuri Naga bible

ATÜTSAR 15

¹Hama sevü Abram kümohtsa vünüh Saküüwuowa zhü ma vü ru nü, “Mükrütüm luo, Abram, hi tü noh johuowa wiethuoh ünüh, noh jisuo tü ji sheh wie nathuoh ünüh,” ti küza.

²Thitü Abram nüh, “O VÜWA Saküüwuowa, noh tü mowa vi hi tsü naveh lo, hi tü atsa münyie nüh sapehuom, thi eh ka küviwa tü Damaska vü Eliezer wie,”

³Thinü Abram nüh küüza, “Halie, noh tü atsa küsü nga hi mütsü, thi tükha küsü eh zheh vünüh küwuowa nüh eh ka küviwa sana thuohnü,” ti küza.

⁴Thi halie, VÜWA zhü ma vü ru le nü, “Anyi hamatü noh ka küviwa nyu, thitü noh mpa noh tsanüh noh ka küviwa sanaveh,” ti küza.

⁵ Jüti sanü VÜWA nüh ma sie alievü wa taji, “Noh tü Thajüwu vü noküze luo, thi awutsiri chienoluo, noh tü jümari chiekhehra naveh ünü nyu nüh,” ti küza. Thi ma nüh ma vü, “Noh küshuküra nga jüzake naveh,” ti küza.

⁶ Thinü ma tü VÜWA tsotüra, thi VÜWA nüh ma tü künyitsari ti ma vü chieke.

⁷Thi VÜWA nüh ma vü, “Hi tü VÜWA, Khaldeari Ur vünüh noh siezhuru nü azhie hama noh tsü nü noh küüvi nti küsawa,” ti küza.

⁸Thitü Abram nüh, “O VÜWA Saküüwuowa, azhih hama vi eh zhi sanaveh ta küsa hi tü khiela nüh thsüra naveh lo?” ti küza.

⁹Thitü VÜWA nüh ma vü, “Mieshüzah mahvi küche kükhruo küsü nyihsü awie mahvi küche kükhruo küsü thi nyihzhü küjiwa mahvi küche kükhruo küsü, ato mükhrietü küsü thi azheh mükhrietü kürünyi küsü ti hi vü viru luo,” ti küza.

¹⁰Jüti küüza vü Abram nüh hamari aveh vi ma vü ru nü kütethuo künyinyi sanü kütethuo küsüsü vi nü küwiejieluo sa, thitü amüwa künyi thuoüji mütethuo.

¹¹Thi asa rekütsari tü asa tsa nta prüturu, thitü Abram nüh jümari zhejam.

¹² Rünyi kuotetu ünü küzehngü shehke Abram vü teru, thinü halie, akükrü küji küsü thi aküzo küji küsü ma vü ru.

¹³ Thinü ma nüh Abram vü, noh küshukürari tü mari azhih mükünyu vü küzehri sanü jüla atükhari sanü mahvi müzamzü kümnomna ngu naveh ta küsa thsü toh luo,

¹⁴ Thitü mari vi tükha küsari vü hi nüh kümnomna tsü naveh, thitü jüma sevü thuoüji mari tü künyirhie khielota vi nü tsezhuru naveh.

¹⁵Thi noh thuoüji kürüzi pe noh pari vü tewa naveh, noh tü kükhruo shehke sevü nüh chohwu naveh.

¹⁶Thi mari tü awuhle müzüawa vünüh shele hala ru naveh; küpakenühnyunü Amorra khuke künakhie tü müjie küju kenüh.

¹⁷Jüti küsa vü rünyi tetu nü tsohzoteru ünü halie, zhürüluo anyikhu kükrü anyihküfü küsü thi anyihküjuzhu küsü asa tehthuo küsari azhievü kariwa.

¹⁸ Jüma rülo vü VÜWA nüh Abram sie kütsathuozhü sanü, “Noh küshukürari vü hi nüh azhih hama tsü naveh, Egypt rühgu vünüh rühgu küjiwa Eufrates küju,

¹⁹thi Kenra zhih, Kenizra zhih thi Kadmonra zhih,

²⁰Hitra zhih, Perizra zhih, Refaim zhih,

²¹Amorra zhih, Kananra zhih, Girgashra zhih thi Jebusra zhih aveh tsümthuoh,” ti küza.