Read Pochuri Naga ATÜTSAR 16 Bible Online

ATÜTSAR 16 - Pochuri Naga bible

ATÜTSAR 16

¹Abram vüvüh Sarai tü atsa küsü nga wuo nü ma mütsü. Ma tü Egyptri siepevüh küsü peh, ma nyo thuoüji Hagar;

²Thinü Sarai nüh Abram vü, “Halie, khinyi thuoüji hi tü atsa küünguna küsa VÜWA nüh khemtüthuoh, tinü noh tü eh siepevühwa vü waluo, ma nüh hi vü atsa ngutsü mhieveh ünüh,” ti küza. Thinü Abram tü Sarai nüh küüza kümjie küna.

³Jükenüh Abram mahvi türake Kanan vü küpeh sevü nüh ma vüvüh Sarai nüh ma siepevüh Hagar Egyptvühwa siewa ma vüpa Abram vü tsü nü ma müsüvüh küüsa.

⁴Thinü ma tü Hagar masüze, thi ma tü atsamoh; jüti küsa vü Sarai tü Hagar tsakümoh ngu ünü Hagar tü Sarai no nü ma müküchie sa.

⁵Jüti küsa vü Sarai nüh Abram vü, “Müküleh hi vü sakümwa tü noh vü küwawa saluo! Hi nüh eh siepevühwa vi nü noh tsü, thi ma tü atsa kümoh ngu ünü ma tü hi no nü müküchie sa. Hisü thawa nüh awuleh ünüh VÜWA mpa nüh hisü azhievü sathuokütsüwa saluo,” ti küza.

⁶Thitü Abram nüh Sarai vü, “Halie, noh siepevühwa tü noh kükhra vü pehveh; tinü ma vü noh kümshe saluo,” ti küza. Thinü Sarai tü Hagar vü siemükato nüh samü thi ma tü ma vünüh tewa.

⁷VÜWA zhüleri küsü tü Shur vü küwa leh reza vü ajupra küsü vünüh Hagar mütu.

⁸Thinü ma nüh, “Hagar, Sarai siepevühwa, noh tü khievü nüh tse, thi khievü wa nti tse lo?” ti küna. Jüti küünavü ma nüh, “Hi tü hi sieküpehvühwa Sarai vünüh shutetse lie,” ti rületsü.

⁹Thinü VÜWA zhülewa nüh ma vü, “Noh tü shele noh sieküpehvühwa vü waluo, thi ma kükhu vü pehle luo,” ti küza.

¹⁰VÜWA zhülewa nüh ma vü küza lehü taji, “Noh küshuküra tü nyi küsü nga nüh müküchierhüra hi nüh khielota saküzhitsü naveh,” ti küza.

¹¹Jüsevü nga zhülewa nüh, “Halie, noh tü atsamoh tseveh, thi noh tü nyimpari küsü wuo naveh, thi noh tü ma nyo Ishmael ta jinaveh; küpakenühnyunü VÜWA nüh noh lokürü kükrie küünatsüthuoh kenüh.

¹²Thi noh tsa tü rawuh küzah kükhrükhre anyi küsü sanaveh; ma ke tü anyiri aveh sie saluo nü rho naveh, thi anyiri aveh ake nga ma vü thse nü saluo naveh. Ma tü ma jienüri nga sie kato nü mürho nüh letsuo nü rho naveh,” ti küza.

¹³Jüti küsa vü Hagar nüh ma sie küjüle VÜWA anyo ji nü, “Noh tü nguküpeh Saküüwuowa,” ti sa, küpakenühnyunü ma nüh, “Hi tü Saküüwuowa ngutsamthuoh ülo thi ma nguküm sevü hi tü rho pehuowa nathuo ülo?” ti sa.

¹⁴Jükenüh ajuhkhre jüma tü Berlahairol, “Hi ngu nü rhoküpehwa Juhkhre,” ti ji. Jüma tü Kadesh thi Bered masü azhievü pehveh.

¹⁵ Jüti küsa vü Hagar tü atsa nyimpari küsü wuo Abram tsü; thi Abram nüh ma nyo Ishmael ti thoh.

¹⁶Hagar nüh Ishmael wuo nü Abram kütsü vü Abram tü mahvi zerake nü türothuoh.