Read Pochuri Naga ATÜTSAR 18 Bible Online

ATÜTSAR 18 - Pochuri Naga bible

ATÜTSAR 18

¹Arülo vü rünyi küsa tsotho vü nguzheza vü juhthsüzheh lehpie vü Abraham tü pehveh ünü VÜWA ma vü ru.

² Ma tü toke nü noküze ünü, halie, nyi küche ma tüvü tsie pehla. Abraham nüh mari küngu vü ma tü ma lehpie vünüh zhüwa mari mütu thi azhih vü küngietsuo taji,

³“Eh VÜWA, hi tü noh notha vü küütso pehveh üji noh siepewa vünüh kari temwa tüm mo.

⁴Hi nüh ajuh pike viküüru nü nohri ajih küükhrüm luo, thi athsoh kükhu vü münyie pehla luo,

⁵Thi hi nüh lohse pike viru naveh, jüti sanü nohri mpa nohri sakürüthara taji nohri mpa tseküwa le saluo, küpakenühnyunü nohri nüh noh siepewa zheh vü küruthuoh kenüh,” ti küza. Thinü mari nüh, “Nyieluo, noh nüh küüza kümjie saluo,” ti küza.

⁶Jüti sanü Abraham tü juhthsüzheh lovü Sara vü prelepreza tu nü, “Shishiti küüto küche vünüh ahie neh nü kümhietsatsa vünüh lohse veh luo,” ti küza.

⁷Jüti küzam nü Abraham tü mieshüzah vü zhüwa nü mieshüzah kürünyi küülie küsü viru taji ma siepewa vü tsü nü ma nüh pre taji küüshu.

⁸Jüti sanü Abraham nüh tünüjuh küsuo thi tünüjuh thi mieshüzah sa shuküsa viru mari tüvü satü; thi mari nüh tsaküveh vü ma tü athsoh kükhu vünüh mari kütuo vü tsie peh.

⁹Jüsevü mari nüh ma vü, “Noh vüvüh Sara tü khiela pehveh lo?” ti küna. Thinü ma nüh, “Halie, ma thuoüji juhthsüzheh hama lovü pehveh,” ti rületsü.

¹⁰ Thinü VÜWA nüh ma vü, “Hi nüh pasüh vü sheleru tsawie naveh, thi Sara tü atsa nyimpari küsü ngu naveh,” ti küza. Jüti küüza vü Sara tü juhthsüzheh lehpie vünüh küna pehveh.

¹¹Jü tsotho vü Abraham thi Sara masü tü khruomthuoh, mahvi nga hozake vü tewathuoh; thi Sara tü nyimzara wuleh nga müsanüh lemthuoh.

¹² Thinü Sara tü ma mpa nüh kükhri taji, “Hi nüh khruoküm sevü nüh thi eh vüpa nüh khruoküm vünüh hi tü eh satsa loküzhe pehra naveh ülo?” ti sa.

¹³VÜWA nüh Abraham vü, “Mokenüh Sara tü, hi tü khinyi nü khruomthuoh, tinü hi tü atsa ngura naveh ülo, ta sanü kükhriveh lo?

¹⁴ VÜWA kenüh zanyo kükho pehveh ülo? Hi nüh noh vü küüza tsotho vü, pasüh vü noh vü ru naveh, thi Sara tü atsa nyimpari küsü ngu naveh,” ti küza.

¹⁵Thitü Sara tü kürü taji, “Hi tü mükükhri wie lie,” ti küza, küpakenühnyunü ma tü krüküm kenüh. Thitü VÜWA nüh ma vü, “Nyu, noh tü kükhri tsa wiethuoh,” ti küza.

¹⁶Jüti sanü anyi küche jümari tü jüla nüh tewa, thi mari tü Sodom wuovü notewa; thi Abraham tü lehkhuji vü mari noküze nti mari vü nyiwa.

¹⁷Thinü VÜWA nüh, “Abraham tü akuoh aküji thi kükrü, thi ma vünüh azhih vü akuohküjiri aveh tü kütsia ngura naveh ta küsa ngu nü,

¹⁸ Hi tü hi nüh mowa sana saveh ünüh Abraham vünüh küthi kümleh ülo?

¹⁹Jüta küsaleh nyu, küpakenühnyunü hi nüh ma rüka küsa kenüh, ma sevü kütse ma tsari vü thi ma zhehlori vü ma nüh azhü kütsü nü mari tü künyitsa thi kümsho vünüh VÜWA lehkhuji vü küüpeh na küsa kenüh thi jüta küsa vünüh VÜWA nüh Abraham vü mowa phrahteke saveh ünüh jüma ma vü satsü naküveh kenüh,” ti küza.

²⁰Thinü VÜWA nüh Abraham vü, “Sodom thi Gomorrah vü phraküümsü küüluole kenüh thi mari kükhiemuo küjile kenüh,

²¹Hi vü krie nü zie küüze kümjie mari aveh nga jüta sakhehmthuoh ünü mota nüh hi nüh wa no naveh, jüsevü hi nüh thsü naveh,” ti küza.

²²Jüti sanü anyi jümari küche tü jüla nüh küprüle nü Sodom vü tewa; thitü Abraham thuoüji VÜWA tüvü peh wie.

²³Jüti küsa vü Abraham tü VÜWA vü shenyiru nü ma vü, “Noh tü künyitsari nga kükutekurüri sie zoriem nti saveh ülo?

²⁴Mükütüzü anyuji hama lovü künyitsari nyi tünyieke pehwie ketünga zoriem wie nü künyitsa tünyiekeri tü mükülole nüh sa nti ülo?

²⁵Künyitsari tü kümsüküsari sie zothem nü künyitsari nga kümsüküsari kümjie küüsam naveh ülo, jüta thuoüji azhih aveh ashih nga jüta müsatüm naveh ülo?” ti küza.

²⁶Thinü VÜWA nüh, “Künyitsari tünyieke anyujiwa vü künguratüla mariehri vünüh azhie aveh nojatsü naveh,” ti rületsü.

²⁷Thinü Abraham nüh, “Halie, hi tü VÜWA sie jüle nti hi mpa hi khakeveh, hi tü mowa lo, hi tü azhitho thi aweji wie.

²⁸Mükütüküzü nüh künyitsari nyi tünyieke münyie wie ketünga zürake nü münga mpa wie nga pehveh üji, münga nüh tünyieke müju wieketü nga noh tü zoriem wie nathuoh ülo?” ti küna. Thinü ma nüh, “Zürake nü münga mpa nga hi nüh ngura thuoüji küzorie nyu,” ti rületsü.

²⁹Abraham nüh VÜWA vü shele, “Thinü zürake mpa wie nga ngura thuoüji,” ti küza. Thinü ma nüh kürüle, “Zürake pehveh üji jüma kenüh hi nüh küzoriewa nyu,” ti rületsü.

³⁰Thinü Abraham nüh, “Hi tü phrahte wie hü naveh, tinü VÜWA tü arü müshu tümluo. Mükütüküzü cherake mpa wie nga pehveh üji,” ti küza. Thitü ma nüh, “Mükütüküzü cherake hi nüh ngura thuoüji hi nüh jüta küsawa nyu,” ti rületsü lehü.

³¹Thinü Abraham nüh shele, “Hi nüh hi mpa VÜWA vü hi saküphrahte peh huo vehthuoh, thitü mükeke mpa wie nga nguveh üji,” ti khuo. Thitü VÜWA nüh, “Mükeke mpa wie nga pehveh üji makeri nüh hi nüh küzoriewa nyu,” ti rületsülehü.

³²Thitü Abraham nüh shele, “O, VÜWA tü lomküra müsatümünyinü, hi nüh küsükeri phrahte le wie hü naveh. Tinü türake mpa wienga nguveh üji,” ti khuo. Thinü VÜWA nüh ma vü, “Türake mpa wie nga nguveh üji makeri nüh anyuji jüma küzoriewa nyu,” ti rületsü.

³³Jüti sanü VÜWA tü Abraham sie jülejum ünü ma nüh wa nti küsa pe vü tewa; thi Abraham nga ma küpehpe vü shele tewa.