Read Pochuri Naga ATÜTSAR 2 Bible Online

ATÜTSAR 2 - Pochuri Naga bible

ATÜTSAR 2

¹Jüti vünüh atülü thi azhih aveh tü sa kheh.

² Rülo türüawa nüh Saküüwuowa tü ma küüroh sekhera, jüti sanü ma nüh küsa küürohri vünüh rülo türüawa ma tü münyie.

³Thi Saküüwuowa nüh rülo türüawa tü tsiatsü thi sakümtsetsü, küpakenühnyunü Saküüwuowa nüh küüroh saküru aveh vünüh kümnyie kenüh.

⁴Azhih thi atülü haküthse vünüh sa.

⁵Atükhu vü azhih vü apra thi are aviküpe ato vü küpehri tü müshi, küpakenühnyunü VÜWA Saküüwuowa nüh atsorü mükütsü kenüh, thi Jüma tsotho vü thuoüji nyi küsü nga nüh küroh kütsa mükünyie kenüh.

⁶Thitü akuza küsü azhih lovü nüh shuru nü azhi anyieh aveh vü zü küjietsü.

⁷ Thinü VÜWA Saküüwuowa nüh azhih azhitho vünüh anyiri sazhu nü kürho rüthowa ma nyaku lovü sahketsü, jütiküsa vü anyiwa tü kürholi küpeh anyi küsü sateru.

⁸Thi VÜWA Saküüwuowa nüh Eden zhietu wuo vü phahri küsü satsü; jüti sanü ma nüh anyi saküsawa vi jüma lovü sa.

⁹ Azhih lovü nüh Saküüwuowa nüh anotha vü noküzü thi vi nü ashie küsara kümhieri satsü. Thi phahri zhila vü kürho athsoh thi kümsümhie zanyoküthsühra thsoh nga sasa.

¹⁰Rühgu küsü Eden vü nüh lizhuru nü aphahriwa saküüjie; thi Eden alie vü lizhuru nü müzü jopruo wa.

¹¹Jopruoküwa pokhuwa anyo thuoüji Pishon, hama nüh Havila azhie, suna küpehpe aveh lita.

¹²Thi azhie jüma suna tü mhiem, zanyo arheküüngu thi aloh amekükhrawa nga peh.

¹³Thi rühgu künyiawa nyo thuoüji Gihon, rühgu hama juh nüh Kush zhie aveh lita.

¹⁴Thi rühgu kücheawa nyo thuoüji Tigris, rühgu hama tü Assiria zhieshu wuo vü likewa. Thi rühgu müzüawa thuoüji Eufrates.

¹⁵VÜWA Saküüwuowa nüh anyiwa tü aphahri vü küüroh thi küühuo nti ma vi wa nü Eden phahri vü thse.

¹⁶Thinü VÜWA Saküüwuowa nüh anyiwa vü, “Aphahri lovü athsohvi küpari thuoüji noh mpa noh müshe sanü tsa mhieveh:

¹⁷thitü kümsü thi kümhie küthsürawa thsohvi[6] thuoüji noh mütsara; küpakenühnyunü noh nüh jüma kütsa rülovünüh noh tü sütsa wie naküveh kenüh,” ti küza.

¹⁸Thinü VÜWA Saküüwuowa nüh, “Anyiwa[7] tü ma mpa küsa mümhie wiethuoh, ma küükratsü na küsa küsü hi nüh satsü naveh,” ti küza.

¹⁹Jüti küsa vü VÜWA Saküüwuowa nüh azhih vi nü asa ato vü küpehri aveh thi amürhü vü prükütse amüwari aveh sanü mari anyo mokümjie vünüh ji naveh nti anyiwa vü sieru: thi anyiwa nüh akürho samwari anyo moti ji tsü nüh jükümjie vünüh müzhetewa.

²⁰Jüti sanü anyiwa nüh ase-ashuh anyo aveh thi amürhü vü prükütse amüwa aveh thi ato vü küpeh asa anyo aveh thohtsü kheh. Thitü anyiwa kenüh thuoüji ma kükratsüna küsa kükato küsü nga münyie nüh sam.

²¹Thinü VÜWA Saküüwuowa nüh anyiwa küzehmophokem nü ma münyuorü küsü vizhu nü ma thsopo vü küpetemtü.

²²Anyiwa vünüh münyuorü küvizhuwa vi nü VÜWA Saküüwuowa nüh nyimzari küsü sanü sieru anyiwa vü tsü.

²³Thinü anyiwa nüh, “Hama tü khinyi thuoüji arü nga ehrü wiethuoh, thi asatsa nga eh satsa wiethuoh, ma tü ‘Nyimzawa’ ta ji naveh, küpakenühnyunü ma tü nyimpawa vünüh küvizhu kenüh,” ti küza.

²⁴ Jükenüh nyimpari tü ma pa thi ma zah jam nü ma vüvüh vü küpeketewa nathuoh, thi masü tü satsa küsü sam nathuoh.

²⁵Masükhürü, nyimpawa thi ma vüvüh nga thsüküüzhu müsanüh anyiju[8] wie, thitü masü tü müzükrü wie.