Read Pochuri Naga ATÜTSAR 22 Bible Online

ATÜTSAR 22 - Pochuri Naga bible

ATÜTSAR 22

¹ Hamari sevü Saküüwuowa nüh Abraham müte nü ma vü, “Abraham,” ti ji. Thinü ma nüh, “Hi hala pehveh,” ti küza.

² Thinü Saküüwuowa nüh, “Noh tsa, noh nüh küümze tsawa Isaac sie luo, thi Moria azhih vü wa nü aküzhi küsü hi nüh noh vü küzana küsa pe vünüh kütso kükhurü saluo,” ti küza.

³Jüti küsa vü Abraham tü rüne kümto sühra nü ma rawuh küzahwa rügi vü ape khake nü viza künyi thi Isaac sie, jüti sanü kütso kükhurü kenüh athsoh mürieh vü ti sataji Saküüwuowa nüh ma vü küüza azhievü tewa.

⁴Rülo kücheawa Abraham tü ma lü toke nü noküze ünü azhiewa tü kületsuo vü ngura.

⁵Thinü Abraham nüh viza künyi vü, “Nohsü thuoüji rawuh küzahwa sie nü hala pehla luo; hi thi Isaac thuoüji pike tsekewa nü kükhurü sanü shele nohsü vü ru naveh ünüh,” ti küza.

⁶Jüti sanü Abraham nüh tso nü kükhurü sana küsa thsoh vi nü ma tsa Isaac rügi vü thse, thi ma nüh ma ke vünüh anyih thi anyuküzahwa vi ti sanü masü tü kürü wa.

⁷Thinü Isaac nüh ma pa vü, “Eh pa,” ti küji vü ma pa nüh, “Whie[9], eh tsa, hi hala tse,” ti küza. Jüti küsa vü Isaac nüh ma pa vü, “Halie, anyih thi athsoh thuoüji vihtsethuoh; thitü tso nü khurüna küsa kenüh nyihzhüzah nü khiela pehveh lo?” ti küna.

⁸Thitü Abraham nüh, “Eh tsa, Saküüwuowa ma mpa nüh tso nü kükhurü nyihzhü thuoüji küchetsü naveh,” ti rületsü. Jüti sanü masü tü kürütse wa.

⁹ Masü tü Saküüwuowa nüh azhie ma vü küüzape vü ruju ünü Abraham tü kükhurüpe küsü sanü kütsothsoh tü kümhieti sanü ma tsa Isaac küri taji kükhurüpe athsoh rügi vü küüzeh.

¹⁰Jüti sanü Abraham tü ma ke viwa anyu shozhu nü ma tsa rehthe luo nti sa.

¹¹Thitü atülü vünüh VÜWA zhülewa nüh, “Abraham, Abraham,” ti ji. Thinü ma nüh, “Hi hala peheveh,” ti küza.

¹²Thinü zhülewa nüh, “Noh vizawa kürholi mvi tümluo, jü mpa mükünyu ma vü zanyo küsü nga müsa tümluo; küpakenühnyunü noh nüh noh tsa küümzewa mükürüpa wiethuoh nüh küsa küngu vünüh noh tü Saküüwuowa krüveh ta küsa khinyi thuoüji hi nüh thsüvehthuoh ünüh,” ti küza.

¹³Jüti küsa vü Abraham nüh toke nü noküze ünü halie, ma sevü nyihzhüvo küsü are küjepruke lovü ma rütsü hake nü pehla; thinü Abraham nüh wa shohru nü ma tsa müthoh vünüh jüma vi nü kütso kükhurü sa.

¹⁴Jüti sanü Abraham nüh azhie jüma nyo tü, “VÜWA thuoüji küchekütsüwa,” ti ji. Jükenüh khinyi küju wie nga, “VÜWA küzhi vünüh jüma tü küchetsü wie naveh,” ta phrahte wieveh.

¹⁵Jüti küsa sevü VÜWA zhülewa nüh atülü vünüh lekha künyiawa Abraham ji taji,

¹⁶ “Hi mpa nüh küshie wie naveh nü, VÜWA nüh küzaveh, küpakenühnyunü noh nüh hama sathuoh, thi noh nüh noh mpa noh tsa wie nga vi mküshele kenüh,

¹⁷ Hi nüh tsia noh tsütsa wie naveh, thi atülü vü wutsiri kümjie thi juhküji nato vü ashünyi kümjie noh tsatori saküzhitsü naveh. Thi noh tsatori nüh mari mükünongüra kheri küüvi naveh,

¹⁸ Noh tsatori vünüh azhih vü akuoküjiri aveh mari mpa mari tsiatsü naveh, küpakenühnyunü noh nüh eh jikhi küüna kenüh,” ti küza.

¹⁹Jükenüh Abraham tü shele viza künyi vü teru, jüti sanü masü tü sühra nü kürü Beersheba vü rhotewa.

²⁰Hamari sevü Abraham nüh küünara, “Halie, Milka nga atsa wuo nü noh nü Nahor tsüsa vehthuoh:

²¹Uz nüh küwuo khuwa, Buz thuoüji ma nü, Kemuel thuoüji Aram apa,

²²Khesed, Hazo, Pildash, Jitlaf, thi Bethuel,” ti küza.

²³Bethuel tü Rebekah apa. Hamari tüze tü Milka nüh wuo Nahor anü Abraham tsü.

²⁴Jümpa mükünyu ma müsüwa Reuma nüh Teba, Gaham, Tahash thi Maka wuo.