Read Pochuri Naga ATÜTSAR 23 Bible Online

ATÜTSAR 23 - Pochuri Naga bible

ATÜTSAR 23

¹Sara nüh kürho ma mahvi müzake mükeke nü türü rho.

²Thi ma tü Kanan zhih Kiriatharba, (jüma tü Hebron) vünüh süm; thi Abraham tü krie thi lorü nti wa.

³Jüti sanü Abraham tü sühra taji ma müjie küsü vünüh Hit atsari vü küüza,

⁴ “Hi tü alienyiri thi küpriküzhüri küsü sanü nohri azavü rho küveh wie; küchohwupe hi nga tsümo, jüti sanü eh notha müngu nüh sakümvü eh kümo küüchohwu mo,” ti khuo.

⁵Hit atsari nüh Abraham vü,

⁶“Hiri nüh küüza künaluo, eh vüwa; hiri zhievü noh tü kaji kükrü küsü. Tinü noh mpa nüh noh kürüka külotsatsa hiri lopie lovü noh kümo chohwu luo; hiri nyi küsü nga nüh noh vünüh ma lopie mütsü nüh küsawa nyu, nyutü noh kümo chohwu na küsa kükhewa nyu,” ti rületsü.

⁷Thinü Abraham tü sühra nü Hitri vü küngie tsuo.

⁸Thi ma nüh ma ri vü, “Hi tü eh notha müko nüh saküm eh sühle vü hi küüchohwuna küsa nohri müshe thuoüji eh zhü künatüluo, thi eh kenüh Zohar atsa Efron vü,

⁹ma zhuh nato vü alopie küsü pehküveh Makpela hi vü zhutsü üti küzatsü mo. Jüma vi rüku küsa na küsa kenüh noh türi vü nüh mame khemti küsa vünüh zhu hi vü tsü üti küzatüluo,” ti khuo.

¹⁰Jüti küsa vü Efron tü Hitri azavü nyi pehveh; thinü anyujiwa kheri vü anyi küturu Hitri aveh atüvü nüh Efron Hitwa nüh Abraham vü rüle taji,

¹¹“Nyu, eh vüwa, eh zhü künaluo; hi nüh eh nyira tsa atüvü nüh küza vehthuoh nü eh zhuhwa vi luo, thi jüla pehküveh lopiewa nga vi nü noh kümo chohwu luo,” ti küza.

¹²Thinü Abraham tü azhie jüla anyira tüvü nü küngietsuo.

¹³Jüti sanü azhie jüla anyira tüvü nüh Efron vü, “Thi nohri kümshe thuoüji, eh zhü künaluo; hi nüh azhuh mewa tsü naveh, tinü vi luo, jüüta thuoüji hi tü eh kümo jüla chohwu naveh,” ti küza.

¹⁴Efron nüh Abraham vü,

¹⁵“Eh vüwa, eh zhü künaluo; azhuh küsü ame kenüh rakasa müzamzü, thitü hisü azhievü tü jünüh mowati? Noh kümo chohwu luo,” ti küza.

¹⁶Thinü Abraham nüh nyie üti Efron vü küza; thi Efron nüh Hitra tüvü nüh küüza zake jüma tsothovü asü küsari nüh küüte kümjie rakasa müzamzü Abraham nüh Efron kenüh küte nü tsü.

¹⁷Jütisanü Efron azhuh Makpela Mamre zhieshu wuovü; lopie küpeh azhuhwa thi azhuh jüma lovü athsohri aveh thi azhie jüma aveh,

¹⁸Anyujiwa kheri lovü kütu Hitra tüvü nüh vi Abraham zhi küüsa khehm.

¹⁹Jüti küsa sevü Mamre zhieshu wuovü Makpela (Jümatü Hebron vü) lopie küpeh azhuhwa lovü nüh ma vüvüh Sara chohwum. Azhie hamatü Kanan vü.

²⁰Azhuh thi lopie jüma tü Hitri nüh Abraham azhi küüsam nü küchohwupe küüsa.