Read Pochuri Naga ATÜTSAR 25 Bible Online

ATÜTSAR 25 - Pochuri Naga bible

ATÜTSAR 25

¹Jüsevü Abraham tü vüvüh küpa Ketura ti küsawa vi le.

²Ma nüh Zimran, Jokshan, Medan, Midian, Ishbak thi Shua wuo nü Abraham tsü.

³Jokshan tü Sheba thi Dedan apa. Dedan atsari thuoüji Ashurim, Letushim thi Leumim.

⁴Midian atsari thuoüji Ef a, Efer, Hanok, Abida thi Elda. Hamari aveh Ketura atsa kheh.

⁵Abraham tü ma zhi küpeh aveh vi Isaac tsü kheh.

⁶Thitü ma müsüra tsari vü thuoüji zanyo vi aküte mpa sa; thi ma rhoküveh vünüh atsa jümari thuoüji zhieshu wuovü anyu zhieshu vü küpehri vü küze nü Isaac vünüh küükietuom.

⁷Abraham kürho mahvi tü müzake rürake nü münga rho.

⁸Abraham tü khruo kümhie mahvi vünüh ma rütho küsah sehkhe sanü khruomze nü süm, thi ma nyiri vü ma kümowa tü küüngu kheh.

⁹Jüti sanü ma tsa Isaac thi Ishmael masü tü Hitri Zohar atsa Efron azhuh Mamre zhieshu wuovü Makpela lopie vünüh ma chohwum,

¹⁰Azhuh jüma tü Abraham nüh Hitri vünüh sü. Abraham tü jüla nüh ma vüvüh Sara masü chohwum.

¹¹Abraham süküm sevü Saküüwuowa nüh tsia Isaac tsü, thi Isaac tü Berlahairoi vü rho.

¹²Hamari tü Egyptvühwa Hagar, Sara tükhavüh rülavüwa, atsa Abraham vü wuokütsüwa Ishmael küshukürari.

¹³ Hamari tü Ishmael tsara nyo, aküwuo vünüh müzhe nü küji: Nebaioth, Ishmael atsa küwuokhuwa; thi Kedar, Adbel, Mibsam,

¹⁴Mishma, Duma, Masa,

¹⁵Hadad, Tema, Jetur, Nafish, thi Kedema.

¹⁶Hamari tü Ishmael atsari thi manyori, manyuri thi mari kürünape, mari kuoh müzhe nü kajitsa türakünyi küvizhu.

¹⁷Ishmael kürho mahvi tü müzake cherake nü türü sanü ma rütho küsah sehkhe sanü süm nü ma kümowa tü ma jienürivü küüngu kheh.

¹⁸Ma jienüri tü Havila vünüh Shur küju Egypt wiejie nü Assiria wuovü rho kheh; ma tü ma nyiri aveh sie porie nü rho.

¹⁹Hamari tü Abraham atsa Isaac küshukürari: Abraham tü Isaac apa.

²⁰Isaac tü ma vüvüh küvi vü ma mahvi zürake thuoh, Betguel atsa Laban tsehvüwa, Padanaram vü anyu Aramean vü kürhori.

²¹Isaac tü ma vüvüh Rebekah kenüh VÜWA vü kükhuo sa, küpakenühnyunü ma tü vükre küm kenüh; thinü VÜWA nüh ma kükhuo künatsü nü ma vüvüh Rebekah tü atsamohra.

²²Rebekah tü atsa künyi morhie; thinü atsa künyi tü mavolovü nüh khieloti saluopeh; jüti küsa vü Rebekah nüh, “Hakümjie sana küsanü hi tü mokenüh rhoveh lo?” ti sa. Jükenüh ma tü VÜWA vü küna nti wa.

²³ Thinü VÜWA nüh ma vü, “Noh shiekuo lovü akuoküji künyi tüveh, noh vünüh nyi künyi wuona küsa künyi tü küsuom naveh; küsüwa tü küpawa nyieh vünüh khra naveh, kükhruowa nüh rünguowa kütsü sanaveh,” ti küza.

²⁴Jüti sanü Rebekah tü küwuo leh tsotho teru nü wuo ünü, halie, ma shiekuo lovü tü küwushie tüla.

²⁵Küwuo khuwa thuoüji ma satsa mürumwuo, ma satsa aveh tü athsü küneh küpewa kümjie; jükenüh mari nüh ma nyo tü Esau, mazhünyo, (aküneh küzhuluo) ti vünüh thoh.

²⁶Jüsevü nüh ma nü wuoturu, thi küturu vü ma ke tü Esau mütseh küjehphoke nü turu; thi ma nyo thuoüji Jacob, amütseh nyutü nyura müthoh, ti ji. Rebekah nüh masü küwuo vü Isaac tü mahvi rorakethuoh.

²⁷Atsa hamasü khruoküsüra vü Esau thuoüji asa zhethsü sheh, reza vü küüzhu lotewa, thitü Jacob thuoüji tsüke nü juhthsüzheh lovü küpeh sa.

²⁸Isaac tü Esau lomü, küpakenühnyunü ma nüh küzhu nü asa vüru kütsatsa tiküsa kenüh; thitü Rebekah thuoüji Jacob küülo sa.

²⁹Küsükeri Jacob tü awih shu pehveh ünü azhuh wataji avorümake nü ru.

³⁰Thinü ma nüh Jacob vü, “Hi tü rümakem wiethuoh, tinü noh nüh awih kürü wuo shuküveh pike rakütsa jie,” ti khuo. (Jükenüh ma nyo tü Edom, kürüwuo ti ji).

³¹Thinü Jacob nüh ma vü, “Pokhuwa noh kükhruo suopewa hivü zhu tsüluo,” ti khuo.

³²Jüti kükhuo vü Esau nüh, “Halie, hi tü sü nta savehthuoh nü, tinü eh kenüh kükhruo suope tü mowa sana lo?” ti sa.

³³ Thinü Jacob nüh, “Apokhu sa hi vü küshietsü chih luo,” ti khuo. Jüti kükhuo vü Esau tü küshie nü ma kükhruo suopewa Jacob vü zhutsam.

³⁴Jüti sanü Jacob nüh lohse thi wihjuh khe matsü, thi ma tü jüma tsa thi müzho ti sanü sühra nü tewa. Jüti küsa vünüh Esau tü ma kükhruo suopewa kulem.