Read Pochuri Naga ATÜTSAR 27 Bible Online

ATÜTSAR 27 - Pochuri Naga bible

ATÜTSAR 27

¹Isaac tü khruo nü ma notha müngu nüh küphrühküm vü ma tsa kükhruowa Esau ji nü ma vü, “Eh tsa,” ti ji, thinü ma nüh, “Hitü hala pehveh,” ti küza.

²Jüti küsa vü Isaac nüh Esau vü, “Halie, hi tü khruomthuoh; hi tü eh küsü rülo müthsü.

³Jükenüh noh senyuseviri vi luo, noh shüchuku thi noh lawih viluo, ti sanü reza vü wa nü eh kenüh müsü sa viru hi tsüluo,

⁴Thi hi nüh kümngu kümjie vünüh shu nü viru hi küütsanü hi müjie küsü atüvü nüh hi nüh tsia noh küütsüluo,” ti küza.

⁵Jüti Isaac nüh Esau vü küza küveh vü Rebekah tü künapehveh. Jüti küsa vü Esau tü asa küzhu nü viru na küsakenüh reza vü tewa,

⁶Thinü Rebekah nüh ma tsa Jacob vü, “Noh pa nüh noh jie Esau vü küüza,

⁷‘Hi müjie küsü tüvü VÜWA atüvü nüh tsia noh tsü na küsakenüh noh wa nü asa küzhu nü shuküüngu nü hi küütsaluo,’ ta küzaveh!

⁸Tinü eh tsa hi nüh noh vü mowa küza naveh ünüh eh zhü künaluo.

⁹Nyihzhüza vü wa nü nyihzhüzah atsa künyi küruoru luo, noh pa külotsatsa vünüh hi nüh shuküüngu nü ma tsü naveh ünüh;

¹⁰Jüti sanü noh nüh viwa ma kütsanü ma müjie küsü atüvünüh tsia noh küütsü naveh ünüh,” ti küza.

¹¹Thitü Jacob nüh ma zah Rebekah vü, “Halie, eh jie Esau thuoüji ma satsa vü aküneh küshori, thitü hi thuoüji jüütanyu nüh asatsa rünyim.

¹²Tinü eh pa nüh hi thsütewa naveh, jüta sanü hi tü ma müraküveh kümjie sam naveh, thi hi tü kütsia küngu nyunü hi mpa hi vü küümzü samü naveh nüh,” ti küza.

¹³Thitü ma zah nüh ma vü, “Noh kümzüwa tü hi vü küürumluo,” ti rületsü.

¹⁴Thinü Jacob tü wa nü nyihzhüzah künyi küruo nü viru mazah tsü nü ma pa külotsatsa vünüh shuküüngu ke.

¹⁵Jüti sanü Rebekah nüh ma tsa kükhruowa Esau kruzhu kümhietsawa azheh lovü ma kütuoh vü küpehwa vi nü ma tsa kürünguowa Jacob küüzhu;

¹⁶Thi nyihzhüzah sahu vi ma pievü thi ma ke asakürünyi künehmüküshope vü thsetü;

¹⁷Jüti sanü ma nüh asa shuküngu küsawa thi lohse vi nü ma tsa Jacob ke vü tsü.

¹⁸Jüti sanü ma tü ma pa vü tu nü, “Eh pa,” ti ji, thinü ma pa nüh, “Hi hala pehveh; noh thawa lo, eh tsa?” ti küna.

¹⁹Thinü Jacob nüh ma pa vü, “Hi tü Esau noh tsa küwuokhuwa. Noh nüh mokümjie hi vü küza nüh jükümjie vünüh müsü sa vitsethuoh, tinü sühra shupeh nü hi nüh küzhuküru asa tsanü tsia hi tsüluo,” ti küza.

²⁰Thinü Isaac nüh ma tsa vü, “Mota hakümjie kümto nguralo?” ti küna. Jüti küüna vü Jacob nüh ma vü, “KüpakenühnyunüVÜWA noh Saküüwuowa nüh küsara vünüh satsü lie,” ti rületsü.

²¹Thinü Isaac nüh Jacob vü, “Noh tü eh tsa Esau tsa ünü nyunüh thsütoh na küsa kenüh hi vü shehnyi raluo, eh tsa,” ti küza.

²²Jüti küüza vü Jacob tü ma pa Isaac vü shehnyi wa ünü ma pa nüh ma pa vü, “Ajikhi nü Jacob jikhi kümjie wiethuoh, thitü ma ke künyi thuoüji Esau ake wiethuoh,” ti sa.

²³Jükenüh ma pa tü ma müthsü tohra nüh sam, küpakenühnyunü make künyi thuoüji ma jie Esau kümjie aküneh mpa, ti sanü tsia ma tsü.

²⁴Ma pa nüh Jacob vü, “Noh tü eh tsa Esau tsa wiethuoh ülo?” ti küna. Thinü Jacob nüh, “Ah wiethuoh,” ti rületsü.

²⁵Jüti rülekütsü vü Isaac nüh, “Vira hi tsüluo, thi hi tü eh tsa nüh münga küru tsanü tsia noh küütsüluo,” ti küza. Jüti sanü Jacob nüh asa viru ma tsü nü matü tsa; thi akhah nga viru nü ma tü zhu, ti sa.

²⁶Jüti sanü ma pa Isaac nüh ma vü, “Eh kütuoh vü ra nü hi kümetsüluo, eh tsa,” ti küza.

²⁷ Jükenüh ma tü ma pa vü shehnyiwa, thinü ma pa nüh makü me, jüti küsa vü ma tü ma tsa kruzhu rhe kürhekera nü tsia ma tsü nü ma vü, “No eh tsa rhe tü VÜWA nüh tsiakütsü reza rhe wiethuoh!

²⁸Saküüwuowa nüh tülü küzo vi noh kütsüwa saluo, azhih küthü vi ma kütsüwa saluo, thi luohshü thi akhah hozake vi noh kütsüwa saluo.

²⁹Nyiri nüh noh kütsü küsawa saluo, thi anyi kürhori tü noh tüvü küngie küruwa saluo. Noh jienüra nyiehvü avü saluo, thi noh zah atsari tü noh tüvü küngie küruwa saluo. Noh kümzüri vü kümzüwa waluo thi noh tsiakütsüri vü tsiatsüluo,” ti küza.

³⁰Isaac nüh Jacob vü akütsiawa kütsüjum nü krüke nü ma tüvü nüh alievü kuoshuwa ünü ma jie Esau tü ma saküüzhu vünüh shele ru nü azheh lovü turu.

³¹Ma nga ashie küüngu shu nü ma pa Isaac vü viru nü ma pavü, “Eh pa tü sühra shuküüpeh nü ma tsa nüh asa müngaküruwa tsa, jüti sanü noh tü tsia hi tsüluo,” ti küza.

³²Thinü ma pa nüh, “Noh tü thawa lo?” ti küna. Thinü Esau nüh ma vü, “Hi noh tsa küwuokhuwa Esau,” ti rületsü.

³³Jüti rülekütsü vü Isaac tü khieloti khekheti küshüh taji, “Thinü noh müjie küru tüvü thawa nüh müsüsa müngaviru nü hi küütsanü hi nüh tsia küütsümthuoh lo?” ti sa.

³⁴Thinü Esau nüh ma pa zhü küünara vü ma tü khieloti zienü krie taji ma pa vü, “Hi nga tsiatsüluo, O eh pa,” ti sa.

³⁵Thitü ma pa nüh, “Noh nü nüh kümramizhi aro viru nü noh kütsiawa vitewathuoh ünüh,” ti rületsü.

³⁶ Thinü Esau nüh ma pa vü, “Ma nyo Jacob ta ji küsatü mazhünyo khemta küsa vünüh jimsatü ülo? Küpakenühnyunü ma tü eh suope künyi keri vitewathuoh. Apokhuwa eh kükhruo suopewa vitewa, thi akünyiawa halie, eh kütsiawa vitewa lethuoh,” ti küza. Jüti sanü ma nüh shele, “Noh tü eh kenüh akütsia küsü nga satümveh wiethuoh ülo?” ti küna.

³⁷Isaac nüh Esau vü rüle taji, “Halie, hi nüh ma tü noh vüwa küüsamthuoh, thi ma nüri aveh vi ma siepe küüsamthuoh, aluoshü thi akhah aveh hi nüh ma vü phrakemthuoh nü. Jükenüh, eh tsa, hi nüh noh kenüh küsara mowa pehveh thuohlo?” ti rületsü.

³⁸ Thinü Esau nüh ma pa vü, “Eh pa, noh tü kütsia küsü mpa wiethuoh ülo? O, eh pa hi nga tsiatsümo, hi nga tsiatsü üti, eh pa,” ti sa. Jüti sanü Esau tü ma jikhi zie kümsie sheh nü krietewa.

³⁹ Jüti küsa vü ma pa Isaac nüh rüle taji, “Halie, noh nüh küpeh azhih thuoüji kümhiehwa nyuthuoh, thi noh nüh küpeh azhih thuoüji atülü vünüh aküzo kütsatüwa nyuthuoh.

⁴⁰ Noh tü noh nyuchuwa vünüh rho naveh, tü noh nü siepe sanaveh; thitü noh nüh prethuotewa thuoüji ma thsohkhuonyiwa noh kuvünüh küprethuora sanaveh,” ti küza.

⁴¹Jüti küüzavü Esau tü Jacob mürhütewa, küpakenühnyunü ma pa nüh kütsiawa vi ma nü tsiatsü küm kenüh, jükenüh Esau tü ma mpa ma jüle taji, “Eh pa kenüh küsü tsotho tü shehnyitsethuoh, tinü eh pa sümthuoüji hi nüh eh nü Jacob fethe naveh,” ti sa.

⁴²Thinü Esau azhü tü Rebekah nüh thsütera nü wa Jacob matsa kürünguowa küüji nü ma vü, “Noh jie Esau tü noh fethe nta müshe nü ma mpa müshe pehvehthuoh.

⁴³Jükenüh eh tsa, eh zhü küna nü sühra taji zhü eh jie Laban Haran vü tewaluo,

⁴⁴Thi rülo pike peh nü noh jie rükümtho küükrie chih luo;

⁴⁵Ma rüküshu thi noh nüh ma vü mowa sanüh müjie küüma küjunü jüla pehla luo, hi nüh anyi wuori küze nü ru noh küüsienaveh ünüh. Mokenüh eh tsa künyikhürü rülo küsü vünüh küümie na lo?” ti küza.

⁴⁶Thinü Rebekah nüh Isaac vü, “Hi tü Hitvühwa hama kenüh ehkürho münokemthuoh. Mükütüküzü Jacob nga hakümjie küsa Hitvüh, azhih hama vühri za thuoüji, eh kürho vü eh kenüh mowa kümhie pehvehthuoh lo?” ti küza.