Read Pochuri Naga ATÜTSAR 28 Bible Online

ATÜTSAR 28 - Pochuri Naga bible

ATÜTSAR 28

¹Thinü Isaac tü Jacob ma vü jike nü tsia ma tsü taji ma vü azhühzho tsü nü, “Noh thuoüji Kananvühri müküvira.

²Jükenüh süra nü tse Padanaram noh zah apa Bethuel zheh vü waluo; jüti sanü noh zah ajie Laban tsavüh küsü vi nü noh vüvüh saluo.

³Saküüwuowa Kükhratsawa nüh tsiakütsüwa saluo, thi avi saküüpesheh tsüluo thi noh saküzhitsüluo; jüti sanü nohtü anyiri kürho hozake refü küüsaluo.

⁴ Ma nüh Abraham kütsiawa vi noh vü nga thi noh sekünyi noh tsatori vü nga kütsüwa saluo, thi Saküüwuowa nüh azhihvi Abraham kütsü noh nüh anyilieri küsü kümjie vünüh rhoküvehwa tü noh nüh müka naveh,” ti küza.

⁵Jüti sanü Isaac tü Jacob küzem, thi Jacob tü tse Padanaram vü Laban, Aramea atsa Bethuel, Rebekah aprah, Jacob ajie thi Esau azah zheh vü tewa.

⁶Jacob tü Isaac nüh tsiatsü nü Padaram vünüh avüvüh küüvinti küzemthuoh ta küsa Esau nüh thsüra, thi ma nüh tsiakütsüvü ma vü azhühzho tsü taji, “Noh tü Kananvühri küviwa nyu,” ta nga thsüra,

⁷Jüti sanü Jacob tü ma pa thi ma zah azhü küna nü Padaramvü tewa.

⁸Jüti küsa vü ma pa Isaac tü Kananvühri mülo ta küsa Esau nüh küthsüra vü,

⁹Ma tü Ishmael, Abraham atsa vü wa nü ma tsa Mahalat, Nebaioth za.

¹⁰Jüti küsa vü Jacob tü Beersheba jam nü Haran wuovü tewa.

¹¹Ma tü azhie küsü vü ru nü jüma rüza vü jüla zeh, küpakenühnyunü rünyi tekütu kenüh. Ape jüla nüh ma tü aloh küsü khuh vi ma lüche sanü zeh.

¹² Thinü ma moh vünüh apahti küsü roke nü azhih vünüh atülü wa küju moh; thi halie, Saküüwuowa zhüleri tü apahti jüla nüh kütsuokükhru sa peh!

¹³ Thinü halie, VÜWA tü ma kütuoh vü tsie nü, “Hi tüVÜWA, noh pa Abraham Saküüwuowa thi Isaac Saküüwuowa; noh nüh zehpehküveh azhihwa tü hi nüh noh thi noh tsatori vü tsünaveh;

¹⁴ Thi noh tsatori tü azhih vü azhitho zake sanaveh, thi noh tü kükrazhu nü zhietu thi zhieshu, thi zhietü thi zhieseh küju wa naveh; jüti sanü noh thi noh tsatori vünüh azhih vü atharuo aveh mari mpa nüh kütsia ngu naveh.

¹⁵Halie, hi nüh noh sietse wie naveh, thi noh khiekhievü wa naveh ünüh hi nüh rükiete naveh, thi hi nüh noh sie azhie hala rule wie naveh; küpakenühnyunü hi nüh noh vü mowaküza nüh jüma müjie küsaju nü noh küjawanyu,” ti küza.

¹⁶Jüti küsa vü Jacob tü ma küzeh vünüh sühra nü, “VÜWA tü azhie hala pehtsaveh; hi tü müthsü nüh saveh ünü,” ti sa.

¹⁷Jüti sanü ma tü krü taji, “Hamatü mowa kükrüküngoküsiake azhiethuoh lo! Hatü azhie küpa nyuthuoh nü Saküüwuowa azheh wiethuoh, thi atülü kheriwa wie thuoh,” tisa.

¹⁸Jüti sanü Jacob tü arüne kümto sühra nü aloh ma lüchesaküzehwa vi nü alokhuo tovüh küsü shie nü jüma rügi vü avüjuh züke.

¹⁹Thi ma nüh azhie jüma anyo, Saküüwuowa azheh, ti ji; thitü atükhuvü thuoüji anyuji jüma anyo tü Luz ta jila.

²⁰Jüti sanü Jacob tü küphrahzhuzhü küsü sataji, “Mükütüküzü Saküüwuowa nüh hi sietse thuoüji thi hi nüh wanakütse lehkhuji vü hi rükieriewu tsü, kütsaküzhu thi thsümnyi vi hi tsü,

²¹ti sanü eh luoveh rüzih nü eh pa zheh vü shelerura thuoüjiVÜWA tü eh Saküüwuowa sanaveh,

²²Thi aloh hama hi nüh tovüh shieküsawa tü Saküüwuowa zheh sanaveh; thi noh nüh momowa vi hi tsü naveh ünüh türake sanü küsü noh tsü naveh,” ti küza.