Read Pochuri Naga ATÜTSAR 3 Bible Online

ATÜTSAR 3 - Pochuri Naga bible

ATÜTSAR 3

¹Saküüwuowa nüh reza vü kürho sakütsü aveh nyieh vünüh amüre nüh aro kümsütsawa sa. Amüre nüh nyimzawa vü, “Saküüwuowa nüh aphahri vü athsoh wuora vi mütsa tüm üta küza ülo?” ti küna.

²Thinü nyimzawa nüh, “Aphahri vü athsoh küpari avi aveh thuoüji tsa üta:

³thitü aphahri azhila vü küpeh athsohwa avi thuoüji mütsa tüm üta Saküüwuowa nüh küza, akütsa mpa nyu nü aküpa nga müpa tüm üta, Jü müüzhe thuoüji süna ta küza,” ti küza.

⁴Thinü amüre nüh nyimzawa vü, “Jütü azhütsa nyu, noh tü küsütsawa nyu:

⁵thitü küsie rülo vünüh noh nüh jüma tsa naveh ünüh noh notha tü pieteru na ta Saküüwuowa nüh küthsü kenüh, thi noh tü Saküüwuowa kümjie sateru nü kümhie thi kümsü thsüm nathuoh,” ti küza.

⁶Jüti küsa vü nyimzawa tü athsohwa no nü ma vi tü tsamhie shehnaküveh küthsü vü, thi ma notha vü noküzüsheh vü thi athsoh küsü nüh nyi küsü sakümtsa shehra naküveh küngu vü, nyimzawa tü athsoh jüma avi la nü tsa, thi ma vüpa vü nga tsü, thinü ma nga tsa.

⁷Jüti küsa vü masükhürü notha tü pieteru, thinü masü tü anyiju küpehla thsü. Thi masü tü ampah nyawa müzhurü nü athsü müthoh sanü masü kürütso satsawa hiete.

⁸Thinü masü tü VÜWA Saküüwuowa nüh münüleh küüji tsotho vü aphahri vü kütse khi künara; jüti küsa vü Adam thi Eve masü tü VÜWA Saküüwuowa tü vü nüh küthi nti aphahri athsohza vü peh.

⁹Thinü VÜWA Saküüwuowa nüh Adam ji taji ma vü, “Noh tü khiela pehveh lo?” ti küna.

¹⁰Thinü ma nüh, “Hi tü aphahri vünüh noh jikhi thsüthuoh, thitü hi tü krüküm sa, küpakenühnyunü hi tü eh satsa anyiju küsa kenüh, jükenüh hi tü hi mpa nüh küthiveh lie,” ti küza.

¹¹Thinü Saküüwuowa nüh, “Thawa nüh noh tü noh satsa anyiju pehveh ta noh vü küza lo? Hi nüh mütsa tüm üti noh vü azhükütsü thsohviwa noh tü tsa ülo?” ti küna.

¹²Thinü anyiwa nüh, “Noh nüh eh nyina sa üta sieru hi vü kütsü nyimzawa nüh athsohviwa hi tsü nü hi nüh tsalie,” ti küza.

¹³Jüti küsa vü VÜWA Saküüwuowa nüh nyimzawa vü, “Noh tü mokenüh hati samthuoh lo?” ti küna. Thinü nyimzawa nüh, “Amre nüh hi müra lie, thi hi nüh tsam lie,” ti rületsü.

¹⁴Thinü VÜWA Saküüwuowa nüh amre vü, “Noh nüh hama sakümthuoh kenüh noh thuoüji samwa aveh nyie vü nga nüh, thi reza vü asa aveh nyieh vü nga nüh müzümthuoh; noh tü noh vo vünüh zhu nathuoh, thi noh kürho vü arülo aveh azhitho tsatse naveh:

¹⁵Thi hi nüh nyimzawa nohsü azhie vü mükünongü thsetsü naveh, thi noh vünüh shuküruri thi ma vünüh shuküruri azhie vü nga mükünoluongü thsetsü naveh; mari nüh noh lü küünyikhrie naveh, thi noh nüh mari mühtse küümko naveh,” ti küza.

¹⁶Thi Saküüwuowa nüh nyimzawa vü, “Hi nüh noh lokürü saküzhitsü naveh, noh tsakümoh sakükhotsü naveh. Noh tü atsaküwuo vü münomna nü wuo naveh, thitü jütawie ketünga noh kümngu tü noh vüpa vü peh wie naveh, thi noh vüpa nüh noh nyieh vü kete naveh,” ti küza.

¹⁷Jüsevü ma nüh Adam vü nga, “Noh nüh noh vüvüh zhü künaküm kenüh thi athsohvi hi nüh mütsa tüm üti küüzawa tsaküm kenüh noh kenüh azhihwa tü müzümthuoh, noh tü noh kürho küju münomna nü noh vo phahtsa naveh.

¹⁸Arüzhü thi asheshiri tü noh kenüh küüsho naveh; thi noh tü areza vü küsho areri tsanaveh.

¹⁹Noh tü noh rüshi vünüh noh vo phahtsa naveh; noh tü azhih nüh sa thi noh satsa azhih müjie küjele küju nü jüta vünüh noh vo phahtsa naveh,” ti küza.

²⁰Jüti küsa vü Adam tü ma vüvüh nyo Eve ti ji, mazhünyo thuoüji ma tü anyiri aveh azahwa küsa kenüh.

²¹VÜWA Saküüwuowa nüh Adam masü nyipari kenüh asahu nüh akruzhu sanü vi masü küüzhute.

²²Jüti sanü VÜWA Saküüwuowa nüh, “Halie, anyiwa tü hiri azhie vü küsü kümjie kümsü thi kümhie thsümthuoh. Ma tü kürho athsoh aviwa nga latsanü ma tü küsuokürho müküürhora,” ti küza.

²³Jüti sanü ma satsa küsa azhihwa vünüh küüroh tsa nti Eden phahri vünüh VÜWA Saküüwuowa nüh ma tü zhezhum.

²⁴Thi ma zhezhujam nü Eden phahri zhieshu wuovü zhüleri küsü sa, thi anyuchu anyihküju küsü nü kürho thsohwa lehkhuji huoküpeh.