Read Pochuri Naga ATÜTSAR 30 Bible Online

ATÜTSAR 30 - Pochuri Naga bible

ATÜTSAR 30

¹Rachel tü atsa küsü nga wuo Jacob mükütsü küngura vü ma jie Lea noküjizhitewa; jüti sanü ma nüh Jacob vü, “Hi nga atsa tsüluo, nyuthuoüji hi nü sünathuoh,” ti küza.

²Thinü Jacob tü Rachel vü arüshu taji, “Hi tü Saküüwuowa kümjie vünüh peh nü noh shiekuo vünüh noh tsa küngura aviwa khetemtü ülo?” ti küza.

³Rachel nüh shele, “Eh siepevühwa Bilha hala pehveh ünüh ma siezeh luo, jüti sanü ma tü eh kenüh atsa ngutüra naveh ünüh. Thi hi tü ma vünüh atsa pehra naveh,” ti rületsü.

⁴Jüti sanü Rachel tü ma siepevühwa Bilha vi Jacob tsü nü ma vü küüzeh.

⁵Thi Bilha tü atsamoh nü nyimpari küsü wuo Jacob tsü.

⁶Jüti küsa vü Rachel tü, “Saküüwuowa nüh hi notsüthuoh, thi eh jikhi nga künatsü nü atsa nyimpari küsü tsüthuoh,” tisa. Jükenüh Rachel nüh ma tsa anyo Dan, küümze vünüh notsü, ti ji.

⁷Rachel siepevühwa Bilha tü atsamoh le nü nyimpari akünyia wa wuo nü Jacob tsü lehü.

⁸Jüti küsa vü Rachel nüh, “Kükhra thse nü hi tü eh jie siesaluothuoh, thi charathuoh,” ti sanü Rachel nüh ma nyo Naftali, mazhünyo, Saluo, ti ji.

⁹Lea tü atsa wuhtuomthuoh ta küsa ma mpa ma küthsüra vü ma siepevühwa Zilpa vi nü Jacob tsü.

¹⁰Jüti sanü Lea siepevühwa Zilpa tü atsamoh nü nyimpari küsü wuo nü Jacob tsü.

¹¹Thinü Lea nüh, “Müngu kümhie,” ti sanü ma nüh atsawa nyo Gad, müngumhie ti ji.

¹²Lea siepevühwa Zilpa tü atsa akünyia wa wuo nü Jacob tsülehü.

¹³Thinü Lea nüh, “Hi tü loküzhewa! küpakenühnyunü nyimzari nüh hi tü külozhewa ta jinaküveh kenüh,” ti sanü ma nüh atsawa nyo Asher, külozhe, ti ji.

¹⁴Hiemtha kümahwie tsotho vü Reuben tü lahzhure azhuh vünüh ngura nü vi ma zah Lea vü ru. Thinü Rachel nüh Lea vü, “Noh tsa lahzhure hi nga pike tsü jie,” ti khuo.

¹⁵Thitü Lea nüh, “Noh nüh eh vüpa viteküwa tü azhünyo küzah ti müsheveh ülo? Thi khinyi nga noh tü eh tsa lahzhure vihü nti ülo”? ti rületsü. Thinü Rachel nüh, “Jüta thuoüji noh tsa lahzhure kenüh süta vü ma tü noh vü nyi zehra naveh,” ti rületsü.

¹⁶Jüti küsa vü Jacob tü münüleh vü azhuh vünüh ru ünü, Lea tü ma mütu nti alievü wa nü ma vü, “Noh tü hi vü müturuji mümhie; küpakenühnyunü eh tsa lahzhure nüh hi nüh noh müsa küsathuo kenüh,” ti küza. Jüti sanü jüma rüzavü Jacob tü Lea vü nyi zeh.

¹⁷Jüti küsa vü Saküüwuowa nüh Lea kükhuo künatsü nü Lea tü atsa nyimpari müngaawa wuo nü Jacob tsü.

¹⁸Thinü Lea nüh, “Saküüwuowa nüh eh kümlie tsüthuoh, küpakenühnyunü hi nüh eh siepevühwa vi eh vüpa kütsü kenüh,” ti küza. Jüti sanü Lea nüh ma tsa nyo Issachar, nyurazhi müsanü kümlie küngura, ti ji.

¹⁹Jüsevü nga Lea tü atsamoh le nü nyimpari türoawa wuo Jacob tsü hü.

²⁰Jüti küsa vü Lea nüh, “Saküüwuowa nüh zanyo kümhie sa hi tsüthuoh; khinyi thuoüji eh vüpa tü hi siake nathuoh, küpakenühnyunü hi nüh atsa nyimpari türo wuo ma kütsüthuoh kenüh,” ti sa. Jüti sanü Lea nüh atsawa nyo Zebulun, siake nü kütsü, ti ji.

²¹Jüma sevü Lea tü nyimzari küsü wuo, thi ma nyo tü Dina ti ji.

²²Jüti küsa vü Saküüwuowa nüh Rachel müshe taji ma kükhuo künatsü nü ma shiekuo saphietsü.

²³Ma tü atsamoh nü nyimpari küsü wuo taji, “Saküüwuowa nüh eh küzükrü vijamtü thuoh,” ti sa.

²⁴Thi ma nüh atsawa nyo Josef, ti ji nü, VÜWA tü atsa nyimpari kütsü phrele saluo, ti sa.

²⁵Rachel nüh Josef wuo küm sevü Jacob nüh Laban vü, “Hi küzem luo, jüti sanü hi tü hi mpa eh tharuo, eh nyu vü wanathuoh.

²⁶Hi nüh noh kütsü sanü küngura eh vüvühri thi eh tsari hi tsüm luo, hi nüh küzakele noh kütsü sathuoh ünüh noh mpa nüh thsüvehthuoh, tinü hi küzem luo,” ti khuo.

²⁷Thitü Laban nüh ma vü, “Noh nüh hi tü küüza nta thuoüji, hi tü noh kenüh VÜWA nüh tsia hi tsüthuoh ta küsa amahtsa vünüh thsürathuoh;

²⁸Kümlie noh nüh küngulehri chietsüluo, hi nüh noh tsüm naveh ünüh,” ti küza.

²⁹Jacob nüh ma vü, “Hi nüh mokümjie noh kütsü sanüh noh mpa nüh thsüveh, thi hi nüh noh nyihzhüri küno vünüh küzake jeshie wathuoh ünüh noh mpa nüh thsüveh.

³⁰Hi müjie küru tüvü nü noh tü pikempa pehla, thitü hi küru sevü thuoüji hozake zhitewathuoh; thi hi khiekhievü nga wa tü VÜWA nüh tsia noh tsü. Thitü khinyi thuoüji hi tü küsie eh zhehlonyula nonathuoh lo?” ti küza.

³¹Ma nüh, “Hi tü noh vü mowa tsü na lo?” ti küna. Jacob nüh ma vü, “Noh tü zanyo küsü nga hi kütsüwa nyu; mükütüküzü noh nüh eh kenüh jüta sa nta thuoüji hi tü noh anyihnyih riehkhuo avo sa thi huo le hü na nü:

³²Tinü nosü hi tü noh nyihzhüri azavü tse küüze luo, jüti sanü nyihzhü küruo, athsoshi küperi thi nyihzhüzah künyiri, thi nyihsü thsoshi küpe thi aküruori küürükazhu luo thi jümari vi hi tsü nü jümari nüh eh jisuo küüsaluo.

³³Hi tü nyitsa ünü nyu nüh noh mpa nüh thuotü vünüh eh zhiri no nta küru vünüh thsüra naveh ünüh. Mükütüküzü nüh eh zhiri azhievü aküruo thi athsoshi mükünyie nyihsü thi nyihzhüzah azhievü akünyi küpe mükünyie nguthuoüji kürühu ti chieke luo,” ti rületsü.

³⁴Thinü Laban nüh, “Mhie sheh! tinü noh nüh küüza kümjie saluo,” ti rületsü.

³⁵Thinü jüma rülo vü Laban nüh nyihsü avo kükhrüpuori; thi nyihsü awie küruo thi athsoshi küperi, kümji küperi aveh, thi nyihzhüzah akünyiri vi ma tsari nüh küünom;

³⁶Jüti sanü rülo küche zetse kükietuo vü tewa; thi Jacob tü Laban anyihnyih küpari aveh no.

³⁷Jüti küsa vü Jacob tü küzhirhüh athsoh kürho thi akhathsoh kürho thi wuhjinga arhu kürho akie aveh khu khehm nü athsoh jümari alievü chü sa.

³⁸Thi athsoh akie khu kümri ma nüh vi nü anyihnyihra tüvü arühgu lovü, anyihnyihri nüh ru ajuh zhuzhuti küsa vü sa, mari ajuh zhu nta ru nü jüla azah tsatsati,

³⁹jüti sanü anyihnyihri tü athsohri nato vünüh tsanü saküüriethuo, saküürüwuo thi athsoshi küüsasati.

⁴⁰Jüti sanü Jacob nüh nyihzhüzahri tü saküpa nü anyihnyihri tü küriethuo wuovü saküüprüke thi Laban nyihnyih akünyiri vü müsarü nüh sa. Jüti küsa vünüh ma anyihnyih thi Laban anyihnyih tü küpapa sa.

⁴¹Mükütüküzü anyihnyih küülieri tsa na saveh thuoüji Jacob nüh anyihnyihra tüvü athsohri ajuh küzhuku lovü thsethseti. Jüti küsa vünüh ma tü athsoshiri rügi vünüh tsatsa ti.

⁴²Thitü anyihnyih müküülieri thuoüji jüma rügi vünüh müküütsa; jüti sanü anyihnyih mükükrüri nü Laban azhi sa, thi kükrüri thuoüji Jacob azhi sasati.

⁴³Jüti sanü Jacob tü nyirhie sheh teru, anyihnyih saluo, siepevüh saluo, siepepa saluo, ut saluo thi rawuh saluo khieloti pehtewa.