Read Pochuri Naga ATÜTSAR 34 Bible Online

ATÜTSAR 34 - Pochuri Naga bible

ATÜTSAR 34

¹Lea nüh wuo nü Jacob kütsüwa Dina tü rülo küsü anyu jüma nyimzari no nti alievü wa;

²Hivri Hamor atsa Shekhem, jüma asuo kajiwa atsanüh Dina ngu ünü ma shoh nü wurie ma siezehm.

³Ma kümshe tü Jacob atsa Dina vü tewa; ma nüh rülawa lo nü ma vü azhü kürünyi ti küza.

⁴Jükenüh Shekhem tü ma pa Hamor vü sie jüle nü ma vü, “Rüla hama vi hi tsü nü eh vüvüh küüsaluo,” ti khuo.

⁵Jüti küsa vü Jacob tü Shekhem nüh ma tsa Dina sakümnemthuoh ta küsa künara; thitü ma tsa nyimpari tü ato vü anyihnyihri huopeh küm kenüh mari müjie küru küju nü küüjakünya müsanüh peh.

⁶Jüti küsa vü Shekhem apa Hamor tü Jacob jüle nti wa.

⁷Azhü jüma küünara vü Jacob tsari tü atovü nüh ru kheh, thi mari tü arümtho nü khieloti arüshu, küpakenühnyunü Jacob atsavühwa siezeh nü Israel nyiri müküchie küzhehphro müke sakütsü kenüh, thi hakümjie küsa tü küsaleh mükünyutsatsa kenüh.

⁸Thitü Hamor tü mari sie jüle taji, “Eh tsa Shekhem kürholi tü noh tsavühwa müngumthuoh; tinü hi nüh noh vü khuoküveh thuoüji ma vü tsü nü ma küüzam luo.

⁹Kürü nü küzaluo sam luo, noh tsavühri vi hiri tsüluo thi eh tsavühri nohri nüh vi luo.

¹⁰Nohri tü hiri vü nyirho naveh; thi azhih nga nohri kümshe küüsanaveh, hala rho nü asü sanü azhezhuh peh luo,” ti küza.

¹¹Shekhem nga Dina apa thi ma jieri vü küza taji, “Hi tü nohri notha vü eh kümngu küsaluo, thi nohri nüh momowa hi vü küza naveh ünüh hi nüh tsü wie naveh.

¹²Kümnyu küsa kütsüküsuo thi aküte küzake sakümsiengüveh ünüh sakümsie luo, thi nohri nüh momowa khuo naveh ünüh hi nüh tsü naveh, tinü rülawa mpa hi tsü nü eh vüvüh küüsam luo,” ti küza.

¹³Shekhem nüh Dina samsü küm kenüh Jacob tsa nyimpari nüh rieriekhri nü Shekhem thi ma pa Hamor vü rüle taji,

¹⁴“Ahu mükütsiri vü hiri tsevühwa tsüna küsa hiri nü müsara, küpakenühnyunü jütü mükümtse sakümthuoh kenüh.

¹⁵Hiri nüh nyie üta küsara thuoüji hama zhünyo vünüh nyie üta sa ra naveh, jüma thuoüji nohri nyimpari aveh thuoüji hiri kümjie sana küsa kenüh ahu tsi kheh luo.

¹⁶Jüta thuoüji nohri nga hiri vühri vi thi hiri nga nohri vühri vi ti sanü zaluora naveh, jüti sanü hiri tü nohri sierho nü hiri kürü anyi küsü sanaveh.

¹⁷Thitü nohri nüh hiri azhü küna nü ahu mütsi thuoüji hiri tsavühwa Dina sie nü tewa naveh,” ti küza.

¹⁸Mazhüri tü Shekhem thi ma pa Nahor sakülozhera.

¹⁹Jüti küsa vü Shekhem tü müküzhike wie thuoh nüh jütisa, küpakenühnyunü ma tü Dina lo küm kenüh. Hamor tharuo vü Shekhem nüh küsiake küvütsatsa küsa kenüh.

²⁰Jüti sanü Hamor thi ma tsa Shekhem masü tü anyujiwa kheri vü ru nü mari nyujiwa nyiri vü küza nü,

²¹“Anyi hamari tü hiri vü lohnashehm, tinü mari tü azhie hala kürho nü künyirhie küphahm luo, küpakenühnyunü halie, azhih tü makeri’a nüh ji shehveh; jüti sanü hiri nüh mari tsavühri za, thi mari nga hiri tsavühri za luo.

²²Thi hama küzhüthuo rügivü mpa nüh mari kümjie hiri nyimpari aveh nga ahu tsi, ti küsa vünüh anyi hamari tü hiri sie kürhora thi hiri sie anyi küsü küsara vü pehveh.

²³Ma ase-ashuhri, ma tsokrüri thi ma samwari tü ehzhiri müsa tüm naveh ülo? Jükenüh nyie ti sanü mari tü hiri sie kürho saluo,” ti zie nü küza.

²⁴Anyujiwa kheri vünüh tsezhu küwa nyimpari aveh tü Hamor thi ma tsa Shekhem masü azhü küna nü nyimpari küzake nüh akheri tsezhu wa nüh mari aveh thuoüji mari ahu tsi kheh.

²⁵Mari ahu tsi nü na wie küveh rülo kücheawa vü Dina aprah, Jacob atsa künyi Simeon thi Levi masü tü anyuchuwa vi nü anyujiwa vü ru nü münyishiwiethuoh nüh nyimpari aveh zothe khehm.

²⁶Masü nüh Hamor thi ma tsa Shekhem nga rehthem nü Shekhem zhelovü nüh Dina sie nü tewa.

²⁷Thi Jacob atsari tü rehtheküm ape vü ru nü küthsütoh vünüh zoriem, küpakenühnyunü mari tsehvüwa tü saküzükrü küm kenüh;

²⁸Mari nüh jümari anyihnyih, mieshümiesa, rawuhri, anyuji vü thi azhuh vü momowa pehveh ünüh vitewa kheh;

²⁹Mari künyirhie aveh mari atsari thi mari vüvühri retewa, azheh lovü küpeh zanyo aveh zoriemtü.

³⁰Jüti küsa vü Jacob nüh Simeon thi Levi vü, “Nohsü nü azhih hala kürhori vü saküümrhü sheh viru nü hi saküsühromthuoh, khinyi thuoüji Kanan nyiri thi Periz nyiri nüh hi mürhüm nathuoh, eh nyiri tü zülam, thi mükütüküzü mari sezhuh nü hi vü küroluo sa thi hi sie saluo thuoüji hi thi eh zhehlo aveh tü zoriem nathuoh nü,” ti küza.

³¹Thitü mari nüh, “Thinü hiri tü hiri tsehvüwa tü küüphroküphrievüh küüsam nathuoh ülo?” ti rületsü.