Read Pochuri Naga ATÜTSAR 40 Bible Online

ATÜTSAR 40 - Pochuri Naga bible

ATÜTSAR 40

¹Hati küsa rülo pike sevü Egypt kajiwa ahuo thsekütsüwa thi alohse küvehwa masü tü masü vüwa, Egypt vü kajiwa mükülo sam.

²Jükenüh Faroah tü ma küüroh küsa künyi, ahuo thsekütsü levüwa thi lohse küveh levüwa masü vü arüshutewa,

³jüti sanü masü vi nü Josef nüh küsi saküveh rieh huo sierhüwa kürhoküsizheh lovü thsem.

⁴Thi mari tü rülo pike jüti kürü peh, thi rieh huo sierhüwa nüh Josef tü masü künowa küsa.

⁵Jüti sanü mari kürhoküsizheh lovü pehveh ünü Egypt kajiwa ahuo thsekütsüwa thi lohse küvehwa masü tü rüza küsü amoh küsüsü moh, thi masükhürü amoh nga mazhühnyo peh khe.

⁶Rüne vü Josef tü masü vü ru ünü masükhürü tü lorü nü küpehla ngu.

⁷Jükenüh ma nüh Faroah küüroh küsa künyi ma sie nü ma vüwa zheh küsi küsape lovü küpeh künyi vü, “Nohsü tü nosü nü mokenüh nyiehsho nü pehveh lo?” ti küna.

⁸Thinü masü nü mavü, “Hisü tü amoh sa ti, thitü nyi küsü nga nüh mazhühnyowa rülekütsü münyieti,” ti küza. Jüti rülekütsü vü Josef nüh masü vü, “Rüle kütsüra tü Saküüwuowa nyu ülo? Thinü hi nüh nohsü vü khuoveh, nohsü amoh vi hi vü küza luo,” ti khuo.

⁹Jüti küsa vü ahuo thsekütsü levüwa nüh ma moh Josef vü küza nü, “Eh moh vü rhelivi rhu küsü eh tüvü pehveh,

¹⁰thi rhelivi rhu vü atsuona küche pehveh; rhelivi rhu jüma tü shizhuru ünü kewu wie, thinü rhelivi khrü jümari tü netewa.

¹¹Jüti küsa vü Faroah ahuo tü eh ke vü viveh; thi hi nüh rheliviri la nü Faroah ahuo lovü zhethse, jüti sanü ahuowa viwa nü Faroah ke vü thse lie,” ti küza.

¹²Jüti küüza vü Josef nüh ma vü, “Mazhühnyowa thuoüji hama: Atsuona kücheri tü rülo küche;

¹³Rülo küche azhievü noh tü Faroah nüh noh lü khake nü noh vizhuwa khana noh küüroh vü thse le nü khanavü kümjie ma huo thsetsü le nathuoh.

¹⁴Thi noh kenüh zanyo küsara jüüta küsa vü noh tü hi müsheluo, tinü hi nüh noh vü zhieke nü khuoküveh thuoüji, ha hi tü mokümjie ünüh Faroah vü küza küthsütsü nü hi tü küsizheh hala nüh hi küüshu luo.

¹⁵Hi tü Ebrira zhih vünüh rühuru; thi hala nga hi tü zanyoküsü nga sakümsü müsa; hi vi nü zhikrie lovü küthse leh nyu,” ti küza.

¹⁶Jüti küsa vü, lohse küveh alüwa nüh amoh kürüle jüma kükato küthsüra vü ma nüh Josef vü, “Hi nga amoh küsü moh lie, hi tü eh moh vünüh lohse amülo küche eh lü rügivü nüh kha tse,

¹⁷Thi amülo anyiehtsawa lovü tü kütsavüh küpapa Faroah kenüh rüthsetse, thitü amüwa prüru nü eh lü rügi vünüh lohse jümari tsaveh lie,” ti küza.

¹⁸Jüti küüza vü Josef nüh ma vü, “Mazhühnyo thuoüji hama: amülo kücheri tü arülo küche;

¹⁹Arülo küche azhievü Faroah nüh noh vünüh noh lü khakütoke naveh thi athsoh rügivü nüh noh huthuom nü amüwari nüh noh satsa tsanaveh,” ti rületsü.

²⁰Jüti küsa vü rülo kücheawa Faroah küwuo rülo vü ma nüh ma sieperi aveh kenüh kütsazhu sa, thi ma sieperi azavü nüh ma nüh ahuo thsekütsü alüwa thi alohse küveh alüwa masü alü saküütoke.

²¹Thi ahuo thsekütsü lüwa thuoüji külole nü ahuo thsekütsü küüroh vü vithse le nü Faroah ahuo thse nü ma kevü tsü;

²²Thitü Josef nüh ma kürüle kümjie lohse küveh lüwa thuoüji huthuom.

²³Jüta sawie ketünga ahuo thsekütsü küjiwa tü Josef mümshe nüh ma kümam.