Read Pochuri Naga ATÜTSAR 41 Bible Online

ATÜTSAR 41 - Pochuri Naga bible

ATÜTSAR 41

¹Mahvi künyi khem ti juküm sevü Faroah tü amoh küsü moh, thi ma tü Nile rühgu kütuoh vünüh wa nü tsie küveh moh,

²Thinü halie, riehrieh ta küsa küülie amieshü türü tü Nile rühgu lovü nüh shuru nü amüshüh mürhuo peh.

³Thinü halie, kümkhrimzie amieshü küpa türü jümara sevü nüh Nile rühgu lovü nüh shuru lehü taji amieshü shuküru khura kütuoh vü tsie.

⁴Thinü amieshü kümkhrimzie türüri nüh amieshü riehrieh ta küsa küülie türüri tsam. Jüti küsa vü Faroah tü josühra.

⁵Thitü ma tü zehketewa lehü nü amoh künyiawa salehü; thinü halie, kümro thi nekümhieke amütha arhu türü atsuona küsü vü peveh.

⁶Thinü halie, jümari asevü atsuo rhu küpa türü, kümthso thi zhieshu mürhü nüh saküsüzhiküm shizhuru le.

⁷Jüti küsa vü amütha ato kümsü türü nüh ato kümhie kümro thi nekümhieke türüri müzhum. Jüti küsa vü Faroah tü josühra ünü amoh sa la.

⁸ Thinü arüne vü ma müshe tü küraküpretewa, jüti küsa vü ma nüh anyi küze nü Egypt vü kümahtsa thi zanyoküthsüshehri küüjiru nü ma moh vi mari vü küza, thitü nyi küsü nga amohwa rüle Faroah müküthsüra nüh sam.

⁹Thinü Faroah ahuo thsekütsü lüwa nüh Faroah vü, “Hi tü nosü hi müküleh müshekerathuoh.

¹⁰Faroah nüh ma sieperi thi lohse küveh lüwa hisü vü arüshu nü hisü vi kürhoküsizheh, küsi kühuo alüwa zheh vü thsem.

¹¹Thinü hisü khürü rüza küsü vünüh amoh sa, thi hisü khürü amoh tü ma zhühnyo peh khe.

¹²Jüla Ebri vizari küsü kürhoküsizheh kühuo zhezhiwa siepe tü jüla hiri kürü peh; jüti küsa vü hisü nüh ma vü hisü amoh küza ünü mazhühnyowa tü ma nüh rületsü kheh, hisü nüh mokümjie vünüh moh ünüh jükümjie vünüh khem ta küzatsü.

¹³Ma nüh mokümjie vünüh hisü vü küza nüh jükümjie hi thuoüji eh küüroh vü vithse le thi lohse küvehwa thuoüji huthuom,” ti Faroah vü küza.

¹⁴Jüti küsa vü Faroah nüh anyi küze nü Josef küüji, thi mari nüh zhikrie lovü nüh shita ma siezhu; shuru nü ma tü ma khane sem taji ma thsümnyi khaphrüvü nü tu Faroah tüvü tsie.

¹⁵Thinü Faroah nüh Josef vü, “Hi tü amoh küsü moh lie, thitü nyi küsü nga nüh azhühnyo jüma rüle hi kütsü münyie nüh sam lie, thi hi nüh küünara noh tü amoh küna nü rüle tsüraveh ta künara nü,” ti küza.

¹⁶Thinü Josef nüh Faroah vü, “Jüma tü hi vünüh nyu, thitü Saküüwuowa nüh Faroah vü küütso vünüh rületsü wie naveh,” ti rületsü.

¹⁷Thinü Faroah nüh Josef vü, “Halie, eh moh vünüh hi tü Nile rühgu nyakuo vü tsieveh ünü;

¹⁸amieshü küülie thi riehriehta küsa türü Nile rühgu lovü nüh shuru nü wa amüshüh mürhuo pehveh;

¹⁹Thi jümari sevü amieshü momaküsa thi sünta küsa akütsi hi nüh Egypt zhih vü müküngusa türü nga shuru.

²⁰Thinü momaküsa thi sünta küsa türü nüh apokhu shuküru küülie türüri tsam,

²¹Thitü jümari tsam wie ketünga nyiküsü nga nüh jümari tsaküm müthsü, küpakenühnyunü amieshü jümari tü atükhuvü kümjie tsikümwie kenüh. Jüti küsa vü hi tü josühra.

²²Jüma sevü nga amütha rhu küsü vünüh nekümhieke thi kümro türü küpe ngu;

²³Thi jüsevü nga amütha ato türü, küwazhü, kümthso thi zhieshu mürhü nüh saküsüzhiküm ma seri vünüh shizhuru;

²⁴Thinü ato kümsü türüri nüh ato kümhie türüri müzhum lie, thi hi nüh hamari vi kümahtsari vü küzathuoh, thitü nyi küsü nga nüh jümari rüle hi kütsü münyie nüh sam,” ti küza.

²⁵Jüti küsa vü Josef nüh Faroah vü, “Faroah moh künyikhürü nga azhühnyo zarike wiethuoh; Saküüwuowa nüh Faroah vü ma nüh mowa sa üta nüh jüma kütsa sawievehthuoh.

²⁶Mieshü kümhie türüri tü mahvi türü, thi amütha kümhie türüri nga amahvi türü; amoh thuoüji azhühnyo zarike wie.

²⁷Mieshü akütsi türü jümari sevü nüh küruri tü amahvi türü, thi amütha ato türü shizhuru nü zhieshu mürhü nüh saküsüzhi küm nga mahvi türü. Jümari tü mahvi türü kümkhuojih.

²⁸Hi nüh Faroah vü küüza kümjie ma tü mowa müsaji mümhie nüh Saküüwuowa nüh Faroah vü kütsasa vehthuoh.

²⁹Egypt azhih vü mahvi türü küwale tsatsa ru naveh,

³⁰Thi jüma sevü thuoüji kümkhuojih mahvi türü ru nü Egypt azhih aveh vü khana küwale aveh kümakhehm naveh, küpakenühnyunü kümkhuojih nüh azhiewa tü zoriem naküvehthuoh kenüh,

³¹Jüti sanü kümkhuojih kenüh küwale mahviwa tü kümamnathuoh, küpakenühnyunü kümkhuojihwa tü küluolem naküveh kenüh.

³²Faroah moh künyikeri küshu nü kümoh thuoüji Saküüwuowa nüh sa nta küsawatü kürühkem wiethuoh, thi Saküüwuowa nüh jüma tü shita küürum nathuoh.

³³Jükenüh Faroah nüh anyi azhüküzhü thi zanyoküthsü küsü rüka nü Egypt zhih vü küsaluo.

³⁴Egypt azhih künote kenüh noh nüh anyiri chuh luo thi küwale mahvi türü tsotho vü kütsaküzhu vünüh küüsuo münga sanü vi luo.

³⁵Thi mahvi kümhie kütse tsothori vü mari kütsaküzhu anyiri vü küüvizhuh nü Faroah kükhra kükhu vünüh küüsazhuh luo thi kümhie ta kümshie luo.

³⁶Jüti sanü mahvi türü Egypt zhihvü kümkhuojih tsotho küju kütsaküzhu tü müshiesara naveh, jüta küsa vü nüh azhihwa tü külolera naveh,” ti küza.

³⁷Kümshe hamatü Faroah thi ma sieperi aveh alosaküzhera kheh.

³⁸Jüti küsa vü Faroah nüh ma sieperi vü, “Saküüwuowa Sietse küpeh anyi hakümjie küsa phahra naveh ünü nyu lo?” ti küna.

³⁹Thinü Faroah nüh Josef vü, “Saküüwuowa nüh zanyo hamari aveh noh vü küngu kümthuoh kenüh nyi küsü nga noh kümjie azhüküzhü kükato thi zanyoküthsü münyiethuoh;

⁴⁰ Tinü noh tü eh zheh nyievü küükete nathuoh, thi eh kajipewa mpa nüh noh nyieh vü küüjiluo küchie nüh eh nyiri aveh thuoüji noh zhü kükhu vünüh rho naveh,” ti küza.

⁴¹Jüma sevü nga Faroah nüh Josef vü, “Halie, hi nüh noh tü Egypt zhih aveh nyiehvü kümkhrüwa küsamthuoh ünüh,” ti küza le.

⁴² Jüti sanü Faroah nüh ma tüjü vünüh ma tüjükhe ajükie vizhu nü Josef tüjü vü kheketsü nü akruzhu mürilo nüh küto vi nü ma küüzhu thi suna narüzho vi ma ku vü thsetsü;

⁴³Thi ma rawuhkheka akünyia wa rügivü ma küüshupeh, jüti sanü mari tü ma tüvü zie taji, “Khotsüluo,” ti sa. Jüti sanü Josef tü Egypt zhih aveh nyiehvü kümkhrüwa küsa.

⁴⁴Jüma nyievü nga Faroah nüh Josef vü, “Hi tü Faroah, noh kümshe vünüh mükünyu nü nyi küsü nga Egypt azhih vü ake nga satü ajih nga satü müthsuokera,” ti küza.

⁴⁵Jüti sanü Faroah nüh Josef anyo Zafenat panea ti ji tsü; thi On navüwa Potifera tsavühwa Asenat vi ma tsü nü ma vüvüh küüsa. Thi Josef tü Egypt azhih aveh vü küzhuwa kheh.

⁴⁶Josef tü kajiwa Faroah küüroh vü kütu vü ma mahvi cherake thuoh. Josef tü Faroah atüvü nüh tsezhuwa nü Egypt zhih aveh vü wa.

⁴⁷Küwale mahvi türü tsotho vü azhihwa tü khieloti aluoshü pekütsü sa.

⁴⁸Egypt zhih vü khieloti kütsaküzhu zhi küveh mahvi türü tsotho vü Josef tü kütsaküzhu vizhuh nü anyujiri vü küsathe sa; azhuh khiekhiela anyuji kütuoh vü pehveh ünüh jümari vü sathe.

⁴⁹Jüti sanü Josef tü atsuo müküütorhüra ashünyi kümjie sathe.

⁵⁰Kümkhuojih mahviri müjie küru tüvü Josef tü atsa nyimpari künyi, Asenat Potifera On navüwa tsavühwa nüh wuo ma tsü.

⁵¹Thi Josef nüh ma tsa küwuo khuwa nyo Manase, Ebri vünüh Saküümawa ti ji, küpakenühnyunü ma nüh, “Saküüwuowa nüh eh kükho aveh thi eh pa azheh aveh nga saküüma kheh kümthuoh kenüh,” ti sa.

⁵²Atsa künyiawa anyo thuoüji Efraim, Ebri vünüh, kümzasie, ti ji, “Küpakenühnyunü Saküüwuowa nüh hi kümnomna vünüh saküümzahsie kütsü kenüh,” ti sa.

⁵³Egyptra zhih vü mahvi türü khieloti zhi nü zanyoküsara tsothowa tü jum,

⁵⁴ Thi Josef nüh küüza kümjie kümkhuojih mahvi türüawa tü teru. Azhih aveh vü kümkhuojih teru; thitü Egypt zhih vü thuoüji kütsaküzhu peh.

⁵⁵ Egypt zhih aveh vü kütsaküzhu münyie nüh sam ünü anyiri tü kütsaküzhu kenüh Faroah vü zie; thinü Faroah nüh Egypt nyiri aveh vü, “Nohri Josef vü waluo, thi ma nüh mowa küza naveh ünüh müzhe luo,” ti küza.

⁵⁶Jüti sanü kümkhuojihwa tü azhih aveh vü nyuohtewa ünü Josef tü aluo aveh sa kheh nü Egyptri vü zhutsü, küpakenühnyunü Egyptra zhih vü kümkhuojih tü küluole küm kenüh.

⁵⁷Jü mpa mükünyu azhih aveh vünüh kütsaküzhu sü nta Egypt vü Josef vü ru kheh, küpakenühnyunü kümkhuojihwa tü azhih aveh vü küluole küm kenüh.