Read Pochuri Naga ATÜTSAR 42 Bible Online

ATÜTSAR 42 - Pochuri Naga bible

ATÜTSAR 42

¹Egypt vü atsuo pehveh ta Jacob nüh küthsüra vü ma nüh ma tsari vü, “Nohri tü mokenüh küsü nüh küsü noveh lo ti?” ti küza.

² Jüti küsa vü ma nüh, “Halie, hi nüh küünara Egypt vü atsuo pehveh ta, tinü nohri wa nü eh keri nüh süru luo, jüta thuoüji hiri tü müsü nüh rhora naveh ünüh,” ti küza.

³Thinü Josef jie türakeri tü Egypt vünüh atsuo sü nti wa.

⁴Thitü Jacob tü Josef anü Benjamin nü ma jieri vü nyi müküze nüh sa, küpakenühnyunü küsüro ma vü küru kükrü kenüh.

⁵Jükümjie Israel atsari tü atsuo sü nti nyuri vü nyiru, küpakenühnyunü kümkhuojih tü Kanan zhih vü jukümthuoh kenüh.

⁶Jüti küsa vü Josef tü azhih jüla kümükhrüwa sa pehveh, thi ma nüh azhih jüla nyiri aveh vü atsuo zhutsüveh. Thinü ma jieri tü ru nü mari mpa ma tüvü mari nyieh küngie nü azhih vü kükie tsuo.

⁷Jüti küsa vü Josef tü ma jieri ngu nü mari müjüra, thitü mari vü anyitheri kümjie sanü azhü kükrü ti phra. Ma nüh mari vü, “Nohri tü khievü nüh tse lo?” ti küna. Thinü mari nüh, “Kütsaküzhu sü nti hiri tü Kanan vünüh tse lie,” ti rületsü.

⁸Jükümjie vünüh Josef tü ma jieri thsüra, thitü ma jieri thuoüji ma müthsü nüh sam.

⁹ Jüti küsa vü ma tü ma moh makeri’a nüh kümoh müshekera nü mari vü, “Nohri tü nyuri kürieziri, eh zhihri küzake thachuveh ünüh ta riezi nta kütse wie,” ti phra.

¹⁰Thitü mari nüh ma vü, “Nyulie, vüwa, hiri tü noh sieperi kümjie vünüh kütsaküzhu sü nti kütse wie lie.

¹¹Hiri tü nyi küsü atsa wie, hiri tü künyitsari, tinü hiri tü aküziri nyu lie,” ti rületsü.

¹²Thitü ma nüh mari vü, “Nyu, nohri tü eh zhihri küthachu khiela pehveh ünüh no nta tseveh,” ti küza le.

¹³Thinü mari nüh ma vü, “Hiri, noh sieperi tü Kanan zhih vü nyi küsü atsa jününyi türakünyi, thitü ariepewa thuoüji nosü küju hiri apa vü nyi pehveh, thi küsü thuoüji münyiethuoh,” ti rületsü.

¹⁴Thitü Josef nüh shele mari vü, “Hi nüh nohri vü küzamthuoh nü nohri tü küriehziri wiethuoh.

¹⁵Hama vünüh nohri müteno naveh: Tinü hi nüh Faroah nüh rhoküveh üta, nohri anü riepewa hala müküru sevü nü nohri azhie hama ja nü müwara.

¹⁶Nohri azhütsa ünü nyu nüh thsütohna küsa kenüh nohri azhie vünüh anyi küze nü nohri anü sieküüru saluo, thi küpari thuoüji küsizheh lovü pehla naveh, jüta mükünyu nü Faroah nüh rhoküveh üta nohri tü kürieziri tsa wiethuoh,” ti küza.

¹⁷Jüti sanü Josef nüh mari aveh rülo küche küsizheh vü thsem.

¹⁸Thinü rülo kücheawa Josef nüh mari vü, “Hi tü Saküüwuowa krüveh, tinü nohri hama saluo.

¹⁹Nohri nüh nyitsa tsaveh üji nohri nyi küsü thuoüji nohri nüh pehküveh küsizheh lovü peh luo, thi küpari thuoüji nohri nüh kütsaküzhu süküsari vü nü mükhuojih nü rhoküveh nohri tharuori vü waluo,

²⁰Jüti sanü nohri anü ariepewa sie nü hi vü ru luo, jüta thuoüji nohri azhü tü mükürie thsüra naveh, thi nohri tü küsüwa nyu,” ti küza. Jüta küüza vü mari nga jüma müzhe.

²¹Jüti küsa vü mari tü küsü nüh küsü vü, “Küzhütsa zhü wiethuoh nü hiri tü hiri anü kenüh müküleh wiethuoh, jüma kenüh hiri kürho tü lokürü nguküveh wie, küpakenühnyunü ma nüh hiri vü kükhuovü hiri nüh mükünatü nüh sam nü, jükenüh lokürü hama hiri vü rumthuoh,” ti sa.

²² Jüti küsa vü Reuben nüh mari vü, “Jükenüh viza jüma vü müküleh müsa tümluo ti müküza ülo? Thitü nohri nüh eh zhü müküna nü. Jükenüh khinyi thuoüji ma züh küthuolevü pehmthuoh nü,” ti küza.

²³Mari tü Josef nüh mazhüri thsüveh ta küsa müthsü, küpakenühnyunü Josef thi mari azhievü azhüwa kürüle kenüh.

²⁴Jüti küsa vü ma tü mari vünüh küpa vü küprüke tewa nü krie taji sheleru mari jüle le. Jüti sanü ma nüh Simeon siezhuwa nü mari atüvü nüh ma phehte.

²⁵Jüsevü Josef nüh azah tsü nü atsuo zhie nü mari awe thseküprotsüluo, thi mari nyi küsüsü ame vi nü mari awe lovü thsem le tüluo, thi mari aletse kenüh ashie nga küvü luo, thi Josef nüh azah tsü. Hakümjie mari vü satsü.

²⁶Jüti sanü atsuo vi mari rawuh rügi vü akhuo satsü nü küzem.

²⁷Mari tü tseru taji mari nüh zeh nti küsa anyu ju nü mari nyiküsü tü ma we le nü ma rawuh shiekütsa nti sa ünü pesa tü ma we thsopo vü tiehnyie küsala ngura;

²⁸Thinü ma nüh ma jieri vü, “Eh pesa tü müvi nüh eh we thsopo vü thse nü tiehnyie sa leveh lie,” ti küza. Hala nüh mari luoveh tü ngothse tewa, jüti sanü mari khekheti küshüh nü küsü nüh küsü vü küprüke taji, “Hatü Saküüwuowa tü hiri vü mowa sasavehthuoh loti?” ti sa.

²⁹Mari ru Kanan vü mari apa Jacob ju ünü mari vü mowa sathuoh ünüh ma vü küza taji,

³⁰“Anyi, azhih jüla avü saküvehwa nüh hiri vü azhü rhiezasheh, thi hiri tü azhih jüla kürieziri satse ta phra.

³¹Thitü hiri nüh ma vü, ‘Hiri thuoüji künyitsari, hiri thuoüji kürieziri nyu;

³²Hiri tü jününyi türakünyi, thi apa küsü atsa wie; thitü nyi küsü thuoüji münyiethuoh, thi ariepewa thuoüji nosü küju nga Kanan vü hiri apa siepehveh,’ ti küza.

³³Thitü anyi, azhih jüla avü saküvehwa nüh hiri vü, ‘Hi nüh hala nüh nohri künyitsari ta thsüra naveh; tinü nohri jünüri nyi küsü hi vü küpehmla luo, thi küpari thuoüji kümkhuojih kenüh thohtsa küveh nohri tharuori vü atsuo vü nü tewaluo.

³⁴Thi nohri anü riepewa hi vü sieru luo; jüta thuoüji nohri tü aküziri nyu nü künyitsari ta hi nüh thsüra naveh, thi hi nüh nohri anü vizhutsülem naveh, thi jüti sanü nohri mpa azhih hala asü satsa mhieveh,’ ta küza lie,” ti küza.

³⁵Mari tü mari awe le ünü, halie, mari awe lovü mari nyi küsüsü pesa tü tieh nü awe lovü tüla kheh; jüti küsa vü mari apa nga thi mari nga mari pesa kütieh jümari ngu nü mari amüshe mürüzi nüh sa kheh.

³⁶Thinü mari apa Jacob nüh mari vü, “Nohri tü eh tsari hisie küvohrie khehm na savehthuoh: Josef münyiethuoh, Simeon nüh münyiethuoh, thi khinyi thuoüji nohri tü Benjamin sieleluo nta, hamari aveh hi vü tetsekhehthuoh nü,” ti küza.

³⁷Thinü Reuben nüh ma pa vü, “Hi nüh Benjamin noh vü sie shele müru thuoüji eh tsa nyimpa künyi fethem luo; tinü ma eh ke vü thsem luo, hi mpa nüh sie sheleru noh tsü naveh ünüh,” ti khuo.

³⁸Thitü Jacob nüh, “Eh tsa thuoüji nohri vü nyi müküzera, küpakenühnyunü ma jie Josef nüh sümthuoh, thi ma mpa nüh kükhe küsa wiethuoh nü. Nohri nüh tsewa na küsa lehkhuji vünüh ma vü küsüro ru thuoüji eh lüküpru vünüh nohri mpa nüh eh lo sakürü nü aküsü vü sieküwa wiethuoh,” ti rületsü.