Read Pochuri Naga ATÜTSAR 43 Bible Online

ATÜTSAR 43 - Pochuri Naga bible

ATÜTSAR 43

¹Kümkhuojihwa tü azhih jüla müküzara nüh satewa.

²Jüti küsa vü mari nüh Egypt vünüh atsuo vüküruri aveh tsakhehm ünü mari apa nüh mari vü, “Wa le nü hiri kenüh kütsaküzhu pike sürule luo,” ti küza.

³Thitü Judah nüh ma vü, “Ma nüh hiri vü hamna tsükükheke sheh taji, nohri anü siemküru nü ru hi mütu nti müsa tüm üta.

⁴Jükenüh noh nüh hiri anü küze nta thuoüji hiri Egypt vü wa nü noh kenüh kütsaküzhu sünaveh;

⁵Thitü noh nüh ma müküze thuoüji hiri nü küwawa nyuthuoh, küpakenühnyunü nohri nüh nohri anü nohri vü siemru thuoüji ru eh tso müno tüm üta ma nüh hiri vü küüza kenüh,” ti küza.

⁶Thinü Israel nüh mari vü, “Nohri tü mokenüh noh nü küpa pehveh ti anyi jüma vü küza nü hi saküüsüroveh ti,” ti küza.

⁷Thitü mari nüh ma vü, “Küpakenühnyunü ma nüh hiri tü mokümjie ünüh ta küsa thi hiri jienü zhüku aveh küna taji, ‘Nohri apa tü khinyi nga rhowieveh ülo?’ Thi nohri anü wuori pehü veh ülo ta küna. Thi hiri tü ma nüh küünari rüle mütsü üji mümhie nüh sam. Thi ma nüh hiri anü sieru üta hiri vü küza na ta küsa khiela nüh hiri tü thsüna lo?” ti rületsü.

⁸Jüsevü nga Judah nüh ma pa Israel vü, “Atsa vizawa hi vü nyi küze luo, hiri tsetewaluo ünüh, jüta küsa vünüh hiri nga, noh nga thi kürünguori aveh nga müsüthuoh nüh rhora naveh.

⁹Hi mpa nüh ma nonaveh; thi ma tü eh ke vü sa wie naveh. Hi nüh ma sie sheleru noh tüvü müthse thuoüji hi mpa nüh küsuokürho kümsüwa vü naveh;

¹⁰Hiri tü hazake mükümnü tüla lekha künyikeri nga samla nathuoh nü,” ti küza.

¹¹Thinü mari apa Israel nüh mari vü, “Thinü jüta müsaji mümhietsa wiethuoh üji jüti saluo: tinü athsohvi kümhie kürükatsari nohri chükhu lovü thse nü vü tsuo anyi jüma te luo: jürezhi pike thi awejuh pike, anyi, rhengu, rükhahvi thi akha ti viwa tsüluo.

¹²Thi ame nga küüluoh vi nü waluo; khana awe nyiehvü tieh nü vüteküruwa nga viwa tsüm le luo, küpakenühnyunü jüma tü sazih sala mhie küveh kenüh.

¹³Nohri anü nga sie luo, thi sühra nü tse anyiwa vü waluo,

¹⁴Thi Saküüwuowa Kükhratsawa mpa nüh nohri vü anyi jüma tüvü kümze kütsüwa sanü nohri anü ma vü saküvehwa nga thi Benjamin nga ma nüh küüze lewa saluo. Ma mpa hi tü eh tsari kenüh lorü nü sütü sünathuoh ünüh,” ti küza.

¹⁵Jüti sanü mari tü aküte thi ame küütsa nga vi thi Benjamin sie ti sanü Egypt vü tsuo nü Josef atüvü tsie.

¹⁶Thinü Josef nüh Benjamin tü mari vü nyi kütse ngu ünü ma zheh vü kütsüküünawa vü, “Anyi hamari sie azheh lovü tu luo, thi asa küsü fethe nü shu taji küche luo, mari tü arülo vü hi sie nü ashie tsanaveh ünüh,” ti küza.

¹⁷Anyi jüma tü Josef nüh küüza kümjie sa thi mari jünüri sieru Josef zheh lovü sa.

¹⁸Mari jünüri tü Josef azheh vü sieteküwa kenüh krü taji, “Hatü küpakenühnyunü atükhuwa hiri awe lovü pesa thsekümtü le kenüh hiri sie azheh lovü savehthuoh, hakümjie vünüh hiri vü müküleh küphah lehkhuji ngura thi hiri nyiehvü kükhrara sanü hiri vi tükha sa thi hiri rawuhri prütewa na küsa kenüh wiethuoh,” ti sa.

¹⁹Jüta kümshe kenüh mari tü Josef azheh kühuowa vü wa nü mükhie kütuoh vünüh ma vü,

²⁰“Halie, eh vüwa, atükhuwa hiri tü kütsaküzhu sü nti ru;

²¹Thi shele kühu vü hiri nüh zeh nti küsape vü nü hiri awe leno khe ünü hiri ame tü küsü nga müküju müsathuoh nüh hiri awe thsopo vü tiehthse sala khe nü ngura nü nosü hiri nüh jüma vi shele tse kheh,

²²Thi kütsaküzhu nga küpa sü vü le nti ame küpa nga vitse. Thi thawa nüh amewa tü hiri awe lovü thsemtü le nüh hiri thuoüji müthsüthuoh nü,” ti küza.

²³Thinü asiepewa nüh mari vü, “Kümhieti münyie luo, azhümnyie mükrü tümluo, nohri Saküüwuowa thi nohri apa Saküüwuowa nüh nohkeri nüh apesawa tü nohri awe lovü thseshele sa la naveh ünüh; nohri amewa tü eh ke vü rututhuoh ünüh,” ti küza. Jüti sanü ma nüh Simeon siezhuru nü mari tsü.

²⁴Anyiwa nüh mari jünüri sie Josef zhehlo vü tu nü ajuh vi mari tsü thi mari tü mari ajih khrüm, thi asiepewa nüh rawuh shie vi mari rawuh küütsa,

²⁵Josef arülo vü ru na saküveh kenüh mari tü ma vü aküte zanyori küche, küpakenühnyunü mari tü jüla nüh ashietsa na ta küünara kenüh.

²⁶Jüti sanü Josef azheh vü ru ünü mari nüh aküte küche küsari azhehlo vü vituru nü ma tüvü nüh azhih vü küngie tsuo.

²⁷Thinü Josef nüh mari mhieveh ünü mokümjie ünüh ti küna taji, “Nohri nüh nohri apa kükhruowa zhüku küüza kümjie ma tü mhieveh tünüh, thi ma rho wieveh tünüh?” ti küna.

²⁸Jüti küüna vü mari nüh, “Noh siepe hiri apa tü mhieveh thi rho wievehlie,” ti rületsü. Jüti sanü mari tü malüri küngie tsuo nü ma siakesheh.

²⁹Jüti küsa vü Josef tü toke nü ma notha noküze ünü ma nü Benjamin ma zah atsa ngukera nü, “Hamatü nohri nüh küüzawa nohri anü riepewathuoh ülo? Saküüwuowa nüh noh küümzewa saluo, eh tsa,” ti küza.

³⁰Jüti küsa vü Josef tü ma nü küthomole kenüh müküzhikewiethuoh nüh kükriepe phahwa azeku lovü tu nü jüla nüh krie.

³¹Jüti sanü ma nyieh müzam nü ma kükriengü küzhi nü shuru taji, “Ashie thsera luo,” ti küza.

³²Mari nüh Josef küpa thsetsü, thi mari jünüri küüpa sathetsü, thi Egyptri ma sietsa küvehri athuo sathetsü ti sa. Küpakenühnyunü Egyptri tü Ebriri sie ashiekütsa akükhe küpeh kenüh mari vü nyi kütsawa nyu ta küsa kenüh.

³³Jüti sanü mari tü Josef vü küprüke nü shupeh, thi mari shuküpehvü muomuo shumpeh nüh rünguo kükhruo vünüh ri nü mari tü ngo müngu nü shupeh.

³⁴Mari küpari thuoüji Josef kütsape vünüh akhu thse, thitü Benjamin thuoüji küpari nyiehvü nüh müngakeri zhi nü thsekütsü sa. Jüti sanü mari tü ma sie zhu nü lozheloku.