Read Pochuri Naga ATÜTSAR 45 Bible Online

ATÜTSAR 45 - Pochuri Naga bible

ATÜTSAR 45

¹ Josef tü ma kümshewa ma kütuoh vü pehküvehri atüvümüküzhira nüh sa, jükenüh zie taji, “Anyiri aveh hi vünüh tewaluo,” ti sa. Jüti sanü Josef nüh ma mpa ma vi ma jienüri vü küthsü küveh vü nyiküsü nga ma kütuoh vü müpeh nüh sam.

²Ma nüh zie nü kükrie vünüh Egyptri nga thi Faroah azhehlori aveh nga künake tewa.

³Thinü Josef nüh ma jieri thi ma nü vü, hi tü Josef thuoh, eh pa khinyi nga rho wieveh la? ti küna. Thitü ma jieri tü ma zhü mürülera nüh sam, küpakenühnyunü mari tü ngothse ünü ma tüvü azhü müphrara nüh küsa kenüh.

⁴Jüti küsa vü Josef nüh ma jienüri vü, “Hi nüh nohri vü khuoveh, tinü eh kütuoh vü raluo,” ti küza. Thinü mari nga ma zhüküna nü ma shehnyi ru. Jüti küsa vü Josef nüh mari vü, “Hi tü nohri anü, nohri nüh Egyptri vü zhukümwa thuoh.

⁵Jükenüh hi havü zhuküm kenüh nohri luoveh mümsü tümluo, nyutü nohri küsü nüh küsü vü arümshu tümluo; küpakenühnyunü hi tü anyira kürholi küülole nta Saküüwuowa nüh nohri tüvü nüh hi hala küze küsa kenüh,

⁶küpakenühnyunü kümkhuojih tü azhih hala jisü mahvi künyi tekütsethuoh kenüh, thi khinyi nga mahvi münga pehüveh, thi jüma tsothovü küüroh nga müsara thi kümahwie nga müsara nüh samwie naküveh kenüh.

⁷Thi Saküüwuowa nüh nohri tüvü hi küüze thuoüji nohkeri nüh zanyo sasala nü azhih vü nohri küümtu sana küsa kenüh, thi nohkeri nüh anyi hozake nga kürhora sana küsa kenüh.

⁸Jükenüh nohri nüh hi hala müküze nü Saküüwuowa nüh küüzewie, thi ma nüh hi tü Faroah vü apa küsü küüsa, ma zheh aveh vü avü thi Egypt azhih aveh vü takrüwa küüsa saveh.

⁹ Jükenüh nohri shiti eh pa vü wa nü ma vü, noh tsa Josef nüh küzaveh, Saküüwuowa nüh hi Egypt zhih aveh vü avü küüsamthuoh, jükenüh müküzhiketü hi vü raluo;

¹⁰Nohri Goshen azhih vü küürho naveh, noh thi noh tsari thi noh tsara tsari, noh seshuhri, noh mieshümiesari thi noh zhiri aveh thuoüji eh kütuoh vü küüpeh naveh;

¹¹Hi nüh nohri vü kütsaküzhu totsü wie naveh, küpakenühnyunü khinyi nga kümkhuojihwa tü mahvi münga pehü küveh kenüh, noh thi noh zhehlori aveh thi noh zhi aveh tü kümkhuo vü müpeh nüh sana küsa kenüh,” ti küza.

¹²Josef nüh küza lehü taji, “Nohri notha nga thi eh nü Benjamin notha nga eh po nüh nohri vü phrahte küveh ngu khehvehthuoh.

¹³Egypt vü eh kümhie küzake nüh thi nohri nüh küzake nguthuoh ünüh aveh eh pa vü küza luo. Pre luo thi eh pa sie hala ru luo,” ti küza.

¹⁴Jüti küza nü Josef tü ma nü Benjamin ku rügi vü khahke nü krie thi Benjamin nga ma lü Josef ku rügivü khahke nü krie, ti sa.

¹⁵Jüti sanü Josef tü ma jieri aveh küme tsü nü mari kheke nü krie; jüsevü nüh ma jieri tü ma küjüle sa.

¹⁶Zhülewa Faroah zheh jutewa ünü Faroah nga thi ma sieperi aveh nga lozhe kheh.

¹⁷Jüti küsa vü Faroah nüh Josef vü, “Noh jienüri vü hama sa üti küza luo, Nohri ase-ashuh akhuo saküvü nü shele Kanan zhih vü wa üti küza luo;

¹⁸Thi nohri apa thi nohri zhehlori sie nü hi vü ru luo, hi nüh Egypt vü azhih kümhie tsawa vi nohri tsü naveh ünüh, thi nohri azhih jüla nüh kütsaküzhu kümhietsari vi nü küürho naveh ünüh,” ti küza.

¹⁹Azhü hakümjie nga mari vü tsü nü küüsaluo, “Akheka nga Egypt vünüh viwa nü nohri tsari thi nohri vüvühri thi nohri apa ti vüküru luo.

²⁰Noh zhiri vü pehküvehri kenüh zanyoküsü nga müshe kütsaza müsa tüm, küpakenühnyunü Egypt vü azhih kümphahtsawa tü nohri azhi küsana küveh kenüh, ti küza üti,” küza.

²¹Jüti küsa vü Israel atsari tü azhü jüma müzhe, thi Josef tü Faroah nüh küüza kümjie akheka thi lehkhuji vü kenüh mari kütsaküzhu tsü.

²²Thi mari küpari vü thuoüji thsümnyi tsü khe, thitü Benjamin vü thuoüji rakasa müzaküche thi thsümnyi münga ti tsü.

²³Ma pa vü thuoüji zanyo hamari tsü küze: Egypt tsokrü kümhie rawuhvo türake, atsuo rawuh awie akhuo türake, lohse thi Egypt vü küru vü ma letse kenüh kütsaküzhu ti tsü küze.

²⁴Jüti sanü ma tü ma jienüri tseshu küzem. Mari tseshu tewaluo nti küsa vü ma nüh ma jienüri vü, “Lehkhuji vü nohri müsaluo tümluo,” ti küza.

²⁵Jüti sanü mari tü Egypt vünüh tseshuwa Kanan zhih vü ma pa Jacob vü teru.

²⁶Thi mari nüh ma vü, “Josef thuoüji rho wieveh, thi ma thuoüji Egypt zhih aveh nyiehvü takrüwa saveh,” ti küza. Thinü ma luoveh tü ngothsetewa, küpakenühnyunü ma tü mari mütsotüra nüh saküm kenüh.

²⁷Thitü Josef nüh mari vü küza üta mari vü küüza azhü aveh ma vi küza kheh thi akheka ma vü üta Josef nüh küüzewa ngu ünü mari apa Jacob sietse tü rhoru le;

²⁸Jüti sanü Israel nüh, “Eh kümngu hama nyievü münyiethuoh; eh tsa Josef tü khinyi nga rho wieveh üji, hi müjie küsü tüvü hi wa nü ma no naveh,” ti sa.