Read Pochuri Naga ATÜTSAR 47 Bible Online

ATÜTSAR 47 - Pochuri Naga bible

ATÜTSAR 47

¹Jüti sanü Josef tü Faroah vü wa nü ma vü, “Eh pa thi eh jienüri tü mari mieshümiesa thi mari seshuh thi mari tsokrü aveh vi nü Kanan vünüh teruthuoh; thi mari tü khinyi thuoüji Goshen zhih vü pehveh,” ti küza.

²Thi ma jünüri azhievü nüh ma nüh nyi münga sie nü Faroah vü wa.

³Faroah nüh ma jienüri vü, “Nohri küüroh nü mowa lo?” ti küna. Thinü mari nüh Faroah vü, “Hiri apa kümjie noh sieperi tü nyihzhü kühuori khehwielie,” ti rületsü.

⁴Mari nüh Faroah vü küzalehü taji, “Hiri tü azhih hala rho nti tse, küpakenühnyunü Kanan zhih vü kümkhuojihwa küluoleküm kenüh tinü noh siepera mieshümiesari kenüh are münyie, jükenüh noh sieperi tü Goshen zhih vü ra küürho üti noh vü khuoveh lie,” ti küza.

⁵Thinü Faroah nüh Josef vü, “Noh pa thi noh jienüri tü noh vü rupehvehthuoh.

⁶Egypt zhih tü noh tüvü pehveh, tinü noh pa thi noh jienüri tü azhih kümphahtsawa vü küüpeh luo, mari tü Goshen zhih vü küüpeh luo, thi mari azhievü wuori küsara anyi pehveh üji eh mieshümiesa nga küünoluo,” ti küza.

⁷Jüti küsa vü Josef nüh ma pa Jacob sieru Faroah tüvü sa, thi Jacob nüh tsia Faroah tsü.

⁸Thinü Faroah nüh Jacob vü, “Noh kürho rülo mahvi küzakethuoh lo?” ti küna.

⁹Jüti küüna vü Jacob nüh Faroah vü, “Eh küpri kürho mahvi thuoüji müzake nü cherakethuoh; khanavü eh nyiri kümjie nyu nüh eh kürho mahvi thuoüji züla thi mümhie,” ti rületsü.

¹⁰Jüti küzam nü Jacob tü tsia Faroah tsüm nü ma tüvü nüh shutewa.

¹¹Jüti sanü Faroah nüh azhükütsü üta Josef nüh ma pa thi ma jienüri sie nü Egypt zhih vü asuope azhih kümphahtsawa Rameses azhih wuovü tsü.

¹²Thi Josef nüh ma pa, ma jienüri thi ma pa zhehlori aveh vü kükhruowa vünüh rünguotsawa küju atharuo küzhi küzüla sanü kütsaküzhu totsü kheh.

¹³Kümkhuojihwa tü küluoleküm kenüh azhih aveh vü kütsaküzhu münyie nüh sam, jükenüh Egypt zhih vü thi Kanan zhih vü kümkhuojihwa kenüh rho lorü sheh tewa.

¹⁴Jüti küsa vü Josef nüh Egypt zhih vünüh thi Kanan zhih vünüh atsuo küzhu vünüh ame küngura aveh vizhuh nü Faroah zheh vü viru.

¹⁵Thinü Egypt thi Kanan zhih vü ame zhutsa khehm ünü Egyptri aveh tü Josef vü ru nü, “Ashie vi hiri tsüluo, mokenüh hiri tü noh tüvü nüh süna lo? küpakenühnyunü hiri ame tü aveh shuküze kheh kümthuoh kenüh,” ti küza.

¹⁶Thinü Josef nüh, “Nohri ame münyiethuoüji kümzhiluo sanaveh, tinü hi nüh kütsaküzhu vi nohri tsü naveh thi nohri nüh nohri mieshümiesa tsüluo,” ti küza.

¹⁷Jüti küüzavü mari nüh mari mieshümiesari viru Josef tsü, thi Josef nüh mari rawuh, ashuh-awu, ase-ashuh thi rawuh küzahri vi nü kütsaküzhu küümzhi: Thi jüti sanü jüma mahvi vü Josef nüh kütsaküzhu mari vü tsü thi mari mieshümiesa vi nü müzhi kütsa sa.

¹⁸Jüma mahvi jum ünü, jüma mahvi anyieh mari tü ru nü, “Hiri tü eh vüwa vünüh küüthiwa nyuthuoh nü hiri ame zhutsa khehmthuoh, thi hiri seshuh nga hiri vüwa zhi küüsa khehmthuoh; khinyi thuoüji hiri tü hiri vüwa tüvü eh satsari thi eh azhihri küchie nüh zanyoküsü nga münyiethuoh.

¹⁹Noh tüvü hiri tü mokenüh sü na lo, hiri thi ehzhihri nga: ehsatsari thi ehzhihri vi nü kütsaküzhu vi hiri vü tsüluo, hiri thi ehzhihri nga Faroah tükha sa kheh nathuoh; hiri müsü nüh rho na küsa kenüh atsü vi hiri tsüluo, jüta küsa vü nüh ehzhihri tü reza küjawa nyuthuoh,” ti küza.

²⁰Kümkhuojihwa tü küluole küm kenüh Egyptri tü mazhihri zhu kheh thi Josef nüh jümari aveh Faroah kenüh sü kheh. Jüti sanü azhih aveh tü Faroah zhi satera kheh.

²¹Thi anyiri thuoüji Josef nüh Egyptri aveh vi tükha küüsa kheh.

²²Azhih jüma levüri azhih mpa nüh müküsü wie, küpakenühnyunü levüri thuoüji Faroah vünüh kütsü kenüh, Jüti sanü Faroah nüh aküte kütsü vünüh mari tü kürho kenüh, jükenüh mari thuoüji mazhihri müzhu.

²³Jüti küsa vü Josef nüh anyiri vü, “Halie, nosü hi nüh Faroah kenüh nohri nga thi noh zhihri nga sümthuoh. Khinyi thuoüji atsü vi nü azhuh vü zhuh luo.

²⁴Thi kümahwiera vü suope münga sanü suope küsü thuoüji Faroah suope sanaveh, thi suope müzü thuoüji nohzhiri saluo, thi jüma thuoüji azhuh vü atsü kenüh, thi noh keri nüh, thi noh zhehlori kenüh, noh tsari kenüh,” ti küza.

²⁵Thinü mari nüh, “Noh nüh hiri kürho küloletsüthuoh; hiri tü hiri vüwa tüvü küümzerawa saluo, tinü hiri thuoüji Faroah tükha sa wie nathuoh,” ti küza.

²⁶Jüsevü Josef nüh Egypt zhih vü levüra zhih vi Faroah azhi müküsa wie küchie nüh küpari vü thuoüji suope münga sanü küsü thuoüji Faroah azhi ti küsa khonyo samtü kheh, thi khonyo jüma tü nosü nga vimzho wieveh.

²⁷Jüsevü Israel tü Egypt zhih Goshen vü rho, azhezhuh pehra, thi avi pesheh thi hozake saküzhira.

²⁸Thi Jacob tü Egypt zhih vü mahvi türatürü rho; thi Jacob kürho mahvi tü küsaji müzake zürake nü türü.

²⁹ Jüti küsa vü Israel tü aküsü tsotho shehnyi teru ünü, ma nüh ma tsa Josef ji nü ma vü, “Hi tü noh notha vü küütso pehveh üji noh ke eh thüchi azhievü thse nü hi Egypt vü küchohwuwa nyu ti küsa küzhütsa vünüh küshie nyi nü,

³⁰Eh pari khiela chohwusaveh ünüh hi tü jüla chohwu nthe, tinü Egypt vünüh hi vü wanü mari küchohwu pe vü chohwu luo,” ti küza. Thinü Josef nüh ma vü, “Noh nüh küüza kümjie hi nüh sa wie naveh,” ti rületsü.

³¹Thinü ma nüh Josef vü, “Hi vü keküshie wie” ti khuo, thinü ma nüh ma vü küshie. Jüti küsa vü Jacob tü ma mpa ma chelü vü küngie tsuo.