Read Pochuri Naga ATÜTSAR 48 Bible Online

ATÜTSAR 48 - Pochuri Naga bible

ATÜTSAR 48

¹Jüsevü tsotho pike pehveh ünü Josef vü, “Halie, noh pa tü naveh lie,” ti küza küru; thinü Josef tü ma tsa Manase thi Efraim masü sie nü wa.

²Jüti küsa vü Jacob vü, “Noh tsa Josef tü noh vü tse lie,” ti küza, thinü Israel tü ma mpa rüzho sühra ma ze rügi vü shupeh.

³ Jüti sanü Jacob nüh Josef vü, Saküüwuowa Kükhratsawa tü Kanan zhih Luz vünüh hi vü ru nü tsia hi tsü,

⁴Ma nüh hi vü, “Halie, hi nüh noh vi saküpesheh thi saküzhitsü naveh, hi nüh noh vünüh anyiri riehkhuo khielota küüshu naveh, thi hi nüh noh sevü nga noh tsatori vü tsü nü küsuokürho mari zhi küüsanaveh,” ta küza.

⁵Tinü Reuben thi Simeon masü kümjie hi Egypt vü müjieküru tüvü nüh küwuo künyi Efraim thi Manase masü thuoüji eh zhi.

⁶Thi masü sevü nüh küwuori thuoüji noh zhi sanaveh, mari jisuo mari nüh küngulehri thuoüji mari ajie Efraim thi Manase vünüh thoh naveh,

⁷ küpakenühnyunü hi Padan vünüh kütse vü, aletsa vü Kanan zhih Efrat müjie küjusheh vünüh Rachel tü eh loküru vünüh süm nü Efrat (Bethlehem vü) vü küwa leh vünüh chohwuküm kenüh.

⁸Israel nüh Josef atsari ngu ünü, “Hamasü tü thari lo?” ti küna.

⁹Jüti küüna vü Josef nüh ma pa vü, “Hamasü tü eh tsathuoh, Saküüwuowa nüh Egypt hala nüh hi kütsü,” ti rületsü. Jüti kürülevü Jacob nüh Josef vü, “Hi nüh noh vü khuoveh tinü masü hi vü sieraluo, jüti sanü hi nüh tsia masü küütsüluo,” ti küza.

¹⁰Israel tü khruokümthuoh kenüh ma notha künyi tü küphrüm nü müngura nüh sa. Jükenüh Josef nüh masü sie shehnyi wa nü Jacob nüh masü kümetsü thi masü kheke.

¹¹Jüti sanü Jacob nüh Josef vü, “Hi tü noh tso ngule na küsa müshe müru, thitü halie, Saküüwuowa nüh noh tsari wie nga hi saküünguthuoh,” ti küza.

¹²Thinü Josef nüh ma tsa künyi ma pa thüchi künyi vünüh anato vü küruokem nü ma nyieh azhih vü küngie tsuo.

¹³Jüsevü Josef nüh masükhürü küruo nü, Efraim thuoüji ma ke azhie wuovü nüh küruo nü Israel ake azhu wuovü küprüke, thi Manase thuoüji ma ke azhu wuovü nüh küruo nü Israel ake azhie wuovü küprüke ti sanü masü sie ma kütuoh vü wa.

¹⁴Jüti küsa vü Israel nüh ma ke azhie wuovü thsuoru nü atsa kürünguowa Efraim lü rügi vü pa thi ma ke azhu wuovü thsuoru nü Manase lü rügivü pa, ma ke wuorü nü thsuoke, küpakenühnyunü Manase nüh kükhruowa küsa kenüh.

¹⁵Jüti sanü ma nüh tsia Josef tsü taji, “Saküüwuowa, khanavü eh pa Abraham thi Isaac masü nüh atüvü kütsewa, Saküüwuowa, eh kürho aveh vü sie nü nosü ru küjuwa,

¹⁶Kümsü aveh vünüh hi külole kütsü rügizhülewa nüh tsia atsa hamasü tsüluo; thi masü vünüh eh nyo, eh pa Abraham thi Isaac nyo tü mükütuo nüh küwa wa saluo! thi azhih hama rügivü rhoküwa vü ashieji sa rhoküwa saluo,” ti tsiatsü.

¹⁷Josef nüh ma pa ake azhie wuovü Efraim lü rügi vü thsuoke kümvü ma lo müra nü satewa nü ma pa ake azhie wuowa shohwa nü Manase lü rügi vü thse.

¹⁸Jüti sanü Josef nüh ma pa vü, “Jüta nyu, eh pa, küpakenühnyunü ma nüh küwuo khu kenüh noh ke azhie wuovü ma lü rügivü thsuoke luo,” ti küza.

¹⁹Thitü ma pa nüh kulem nü ma vü, “Hi nüh thsüveh eh tsa, hi nüh thsüveh; ma anyi sara wie naveh, ma nga jira wie naveh; müle nüh ma nü nüh ma jie nyiehvü nüh ji naveh, thi ma tsatori tü akuoküji khielota zhi wie naveh,” ti küza.

²⁰ Jüti sanü jüma rülovü ma nüh masü tsiatsü nü küüza, “Israelri tü nosü anyo vünüh kütsia zhü phrahte taji, ‘Efraim thi Manase vü sakütsü kümjie Saküüwuowa nüh noh sakütsüwa saluo,’ ta phrahte naveh,” ti küza; jüti sanü ma nüh Manase atüvü Efraim kütsie.

²¹Thinü Israel nüh Josef vü, “Halie, hi tü süna sa vehthuoh, tinü Saküüwuowa mpa nüh noh siekütsewa saluo, thi ma nüh noh sie shele noh para zhih vü küwa wa saluo.

²²Jüma nyiehvü nga hi nüh noh jieri nyiehvü nüh asuope küsü küütsa eh nyuchuwa thi eh lawih vi nü Amorri vünüh küvirawa aküzhi küsü vi noh tsümthuoh ünüh,” ti küza.