Read Pochuri Naga ATÜTSAR 49 Bible Online

ATÜTSAR 49 - Pochuri Naga bible

ATÜTSAR 49

¹Jüti sanü Jacob nüh ma tsari ji kheh taji, thuotüvü mowa nohri vü ru naveh ünüh hi nüh küza naveh, tinü nohri sehzhuh kheh luo:

²Ra sezhuh khe nü künaluo, O Jacob tsari, nohri apa Israel zhü künaluo.

³Reuben, noh thuoüji eh tsa küwuo khuwa, eh kükrü, thi eh kükhra aviri pokhuwa, eh küthola kümhietsawa, thi eh kükhra kümhietsawa.

⁴Ajuh nüh ape müküütoh kümjie, noh tü kütholah küpehwa nyu, küpakenühnyunü noh nüh noh pa ze vü küwa kenüh, noh nüh jüma sakümnem, noh nüh eh ze küju wa küju ken!

⁵Simeon thi Levi masü tü jününyi; küzorie senyusevi tü masü nyuchuri.

⁶O eh sietse, masü mütu nü küjüle vü müru tümluo; eh sietse, masü azhievü mütse tümluo; küpakenühnyunü masü arüküshu vünüh nyiri zothe kheh kümthuoh kenüh, thi masü müküketera kütsosü vünüh shüvotsa ajih saküüwi.

⁷Masü rüküshu tü müzü kümwa saluo, küpakenühnyunü jüma tü kükrü pehküveh kenüh, thi masü rükümtho nga, küpakenühnyunü jüma tü aro msüküm kenüh! Hi nüh masü Jacob azhievü saküüsuom naveh, thi Israel vü saküvoriem naveh.

⁸Judah, noh thuoüji noh jienüri nüh siake naveh; noh ke tü noh mükünongüra ku rügivü peh naveh; noh pa atsari nüh noh tüvü küngie tsuo naveh.

⁹ Judah thuoüji amiewuowa tsa; vitsa nta zhekütsewa vünüh, eh tsa, noh tü tekuothuoh. Ma tü kükie taji, amiewuowa kümjie rüvü, thi ma tü amiewuo awiewa kümjie, thawa nüh luoveh müzho nü ma saküsühra na lo?

¹⁰Kajikütsüh tü Judah vünüh temwa ra, nyutü takrüwa kütsüh tü ma mpha azhievü nüh temwa ra, ma vü küsieke müjie küruküju; thi anyira zhü küüna tü ma zhü küna naveh.

¹¹Ma rawuhzah rhelivi rhu vü hute, thi ma vühwa rhelivirhu kürükatsawa vü müjie kühute küju nü, ma thsümnyi akhah vünüh rüshü, thi ma kruzhu thi ma münyiri rhelivijuh azüh kümjie küsa vünüh müjie kürüshü küju nü;

¹²Ma notha tü akhah vünüh müru naveh, thi ma hari tü tünüjuh vünüh müji naveh.

¹³Zebulun thuoüji juhküji nato vü rho naveh; ma tü juhieri kenüh kümnyiepe küsü sanaveh, thi ma rüto thuoüji Sidon sanaveh.

¹⁴Issachar thuoüji rawuh küzah kükhrawa, ma tü ape künyi azhievü rüvü naveh;

¹⁵Kümnyiepe mhiem ta ma nüh ngu, thi azhihwa tü lom ta sa; jükenüh vü nta ma safü küngie tsuo, jüti sanü ma tü küüroh vü tükha sa.

¹⁶Dan thuoüji ma nyiri ale sanaveh, Israel kuohri azhievü küsü sanü.

¹⁷Dan tü lehkhuji vü arehsü küsü sanaveh, jinyipe vü kümzhi küvü amüre sanaveh, jüti sanü rawuh mütsehri shü nü ma rügivü pehkütseri tü asevü küluke wa naveh,

¹⁸Hi nü noh küülole huoveh thuoh, OVÜWA.

¹⁹Mükie nü zhekütseri nüh Gad mükie nü zhe naveh, thitü ma nüh chara naveh.

²⁰Asher tü ashie nyirhie naveh, thi ma nüh aküji kümhie küzü tsü naveh.

²¹Naftali thuoüji amüsü ma müshe sanü zhükütse, ma thuoüji atsa kümhie ngu naveh,

²²Josef thuoüji avi khielota küpe tsuonawa, ajuwi nato vünüh avi khielota küpe tsuonawa; ma tsuonari tü azie vü hietawa.

²³Lawih küviri nüh ahemüsü nü ma zhe, ma ka thi müküüzara nüh ma saküsüro sheh;

²⁴jütawie ketünga ma lawih tü müküse wie, ma pie künyi mütsatso nüh Jacob Saküüwuowa Kükhratsawa ake vünüh nyihzhükühuowa jüla peveh, Israel Lokrüwa,

²⁵noh pa Saküüwuowa noh kükratsü na saküvehwa nüh, Saküüwuowa Kükhratsawa nüh rügivü kütsia vi noh tsü naveh, küsaji kükhu küsheh vünüh tsia tsü naveh, atünü thi ashiekuo vü kütsiawa tsü naveh,

²⁶Noh pa kütsiari thuoüji awuhle küju aküzhi kütsia nyiehvü nüh müzho; küsuokürho küju küzhiho küwale vünüh tsü naveh; jümari tü Josef lü rügi vü küpehwa saluo, thi ma jieri nüh sieporie kümwa nokha rügivü nga küpeh luo.

²⁷“Benjamin thuoüji rekütsa rezanyihnyih, rüne vü ma shie jürie nü tsa, thi münüleh vü thuoüji kütsaturi küsuom.”

²⁸Hamari aveh tü Israel akuoh türakünyiri; mari apa nüh mari vü kütsia kütsü vü küphrahte, ma ke vü kümhie küpehwa vi nü mari nyi küsüsü vü tsiatsü.

²⁹Thinü mari apa nüh mari vü azhühzho tsü taji, “Khinyi thuoüji hi tü sühu nü eh nyiri vü wa sezhuh nathuoh. Hitri azhuh Efron lopie vü eh pari vü nyi küüchohwu luo,

³⁰ Makpela azhuh lopie Mamre zhieshu vü Kanan zhih Abraham nüh küsü Hitri Efron azhuh vü rügupe sana küsa vü chohwu luo.

³¹ Mari nüh Abraham, Sara, ma vüvüh Isaac, Rebekah, ma vüvüh, thi Lea jüla chohwu,

³²azhuh thi alopie jülovü küpehwa tü Hitri vünüh sü,” ti küza.

³³ Jacob nüh ma tsari vü azhühzho tsüküm sevü ma jih künyiaze rügivü khake nü ma rütho küsah sehkhe sam, thi ma tü ma nyiri vü tewa sehrü.