Read Pochuri Naga ATÜTSAR 7 Bible Online

ATÜTSAR 7 - Pochuri Naga bible

ATÜTSAR 7

¹Thinü VÜWA nüh Noah vü, “Hama wuhle vü noh tü eh tü vü nyitsa küm hi nüh ngura thuoh, tinü noh thi noh zhehlori aveh juhie lovü tu kheh luo.

²Asa kümtse aveh awieluo türü, avo thi ma sie küsü küsa; asa mükümtse awieluo küsü, avo thi ma sie küsü küsa;

³Thi amürhü vü prükütse amüwari nga awieluo türü, nyimpa küsü thi nyimza küsü, mari küthseluo azhih anyieh aveh vü küürho sana küsa kenüh,

⁴küpakenühnyunü rülo türü vünüh hi nüh azhih vü rülo zürake thi rüza zürake atsoh rüküüru naküveh kenüh; jüti sanü hi nüh saküsa rhoküveh zanyo aveh hi nüh azhihwa nyieh vü nüh zoriem naveh,” ti küza.

⁵Thinü VÜWA nüh azhü momowa Noah vü tsü nüh jümari aveh sakheh.

⁶Azhih nyiehvü ajuh jiküru vü Noah kürho mahvi tü müzatüro khruo vehthuoh.

⁷Ajuh küjiwa karina küsa kenüh Noah, ma tsa nyimpari, ma vüvüh thi ma tsara vüvüh tü ajuhie lovü tetu.

⁸Asa kümtseri nga, mükümtseri nga, amüwari nga thi azhih nyieh vü küzhuri aveh,

⁹künyinyi vünüh, nyimpa nga thi nyimza nga aveh Saküüwuowa nüh azhü kütsü kümjie Noah sie nü juhie lovü tu kheh.

¹⁰Rülo türü sevü ajuh küji atsohwa tü azhih vü rüteru.

¹¹ Noah kürho mahvi müzatüro, asa künyiawa, rülo türatürüawa vü rühgu küsheh juwi aveh puzhuteru, thi atülü mürhülehpie aveh sariem.

¹²Thi azhih vü atsoh rüküturu tü mükütuo nüh rülo zürake thi rüza zürake rü.

¹³Jüma rülo vü khemti Noah thi ma tsari: Shem, Ham, Jafet, Noah vüvüh thi ma tsa küchera vüvüh,

¹⁴mari thi asa papara küthse, ase-ashuh mari mpa mari küthse, azhih vü leleh ta zhukütse papara küthse, amüwa aveh papara küthse thi amüwa küzaküji aveh juhie lovü tetu.

¹⁵Asa akürho rütho küsah aveh künyinyi vünüh Noah sie nü juhie lovü tetu.

¹⁶Asa nyimpa thi nyimza juhie lovü küturi aveh tü Saküüwuowa nüh azhükütsü müzhe nü tu kheh, thi VÜWA nüh alovü khekem.

¹⁷Juhküjiwa tü mükütuo wiethuoh nüh rülo zürake ji, thi ajuh tü küzhiküzhia sa ru nü ajuhiewa küshüh ke, jüti sanü azhih nyieh vü külüwute tewa.

¹⁸Ajuh tü küzhiküzhia shehtewa thi azhih nyieh vü müküüzara nüh ji shehtewa, thi ajuhiewa tü ajuh nyieh vü kürhu peh.

¹⁹Thi ajuhwa tü azhih nyieh vü khielota sheh nü atülü kükhu vü aküzhi kümsie aveh külüwutewa;

²⁰ajuh tü sheh nü aküzhiho nyieh vü külüwute teküwa apie türamnga shehtewa.

²¹Jüti sanü asa azhih nyieh vü zhukütse: amüwari nga, ase-ashuhri nga, rezasari nga, ashieji sanü azhih vü prükütseri nga, anyiri aveh;

²²thi azhih küüweh vü anyaku vünüh rühtho sah nü akürho pehkütseri aveh sü khehm.

²³Azhih nyieh vü rhokütse zanyo aveh: anyiri, asa ri, zhukütse thi amürhü vü prükütse amüwari, Noah thi ajuhie lovü ma siekütseri küchie nüh küpari aveh thuoüji ma nüh zothekhehm.

²⁴Thi ajuh tü azhih nyieh vü rülo müzake nü tünyieke külüwute peh.