Read Pochuri Naga ATÜTSAR 8 Bible Online

ATÜTSAR 8 - Pochuri Naga bible

ATÜTSAR 8

¹Thitü Saküüwuowa nüh Noah thi ma sie ajuhie lovü tü küveh asa ri aveh thi ase-ashuhri müshe peh. Thi Saküüwuowa nüh azhih nyieh vü amürhü saküümrhü nü ajuhwa tü rhiehtewa;

²Juwi küshu aküshehri thi atülü vünüh ajuh saküji küveh lehpieri tü khemtü, thi tsokürüwa tü atülü vünüh khete tewa,

³Thi ajuhwa tü mükütuo wiethuoh nüh kürhiehkürhieh tewa. Rülo müzake nü tünyieke sevü thuoüji rhiehküm sa;

⁴Thi asa türüawa rülo türatürü rülo vü ajuhiewa tü Ararat küzhiho rügi vü rake.

⁵Thi asa türawa küju ajuh tü kürhiehkürhieh tewa, asa türawa rülo küsü vü thuoüji aküzhi kümsieri thuoüji nguteküru sa.

⁶Rülo zürake jum ünü Noah tü ma nüh küsa ajuhiewa mürhülehpie sa,

⁷Jüti sanü ma nüh awuo küsü prüküzeno, thinü awuowa tü ajuh müjie küüweh küju nü prüleprüza peh.

⁸Jüsevü nga azhih anyieh vünüh ajuh tü rhiehtewa thuoh ünü nyu nüh ti küsa thsü nti küsa kenüh mükhrietü küsü prü küzeno le hü;

⁹Thitü mükhrietüwa tü ma jih wa azhih vü nyi na küsa küüweh müküngura kenüh prüshele ma vü, ajuhie lovü teru, küpakenühnyunü ajuh tü azhih nyieh vü pehküm wie kenüh. Jükenüh ma ke thsuoküze nü mükhrietüwa alovü vitetule.

¹⁰Jüti sanü ma tü rülo türü huole nü mükhrietüwa ajuhie lovü nüh alie vü prüküüze müte le hü;

¹¹Thinü mükhrietüwa tü Olive nyawa küsü ma po vünüh sih nü münüleh vü sheleteru; jüti küsa vü ajuhwa tü azhih nyieh vünüh rhiehtewa thuoh ta küsa Noah nüh thsüra.

¹²Jüsevü ma nüh rülo türü huo la nü mükhrietüwa prü küüzeno lehü; thitü mükhrietüwa tü ma vü shele müru wiethuoh nüh sam.

¹³Noah mahvi müzatüro khruoküm sevü, mahvi pokhuwa asa pokhu vü rülo pokhuwa vü ajuhwa tü azhih vünüh küwehtewa; thinü Noah nüh ajuhie soteküsawa sajam nü noküze, jüti küsa vü halie, azhih nyieh vü tü küwehküm ngura.

¹⁴Asa künyiawa rülo mükeke nü türü vü azhihwa tü küwehphake tewara.

¹⁵Jüsevü Saküüwuowa nüh Noah vü,

¹⁶“Noh, noh vüvüh, noh tsari thi noh tsara vüvüh ti sie nü ajuhie lovü nüh shuwaluo.

¹⁷Noh kütuoh vü zanyo rhoküveh asa aveh, amüwari, asari thi azhih vü lehleh ta küzhu aveh siezhuraluo, mari nüh azhih vü khielota küüjeshie naveh, avi küüpe thi azhih nyiehvü saküüzhi naveh,” ti küza.

¹⁸Jüti küsa vü Noah tü ma thi ma tsari, ma vüvüh thi ma tsara vüvühri sie nü alievü shuwa.

¹⁹Thi asa aveh lehleh ta zhukütse aveh, amüwa aveh thi azhih vü küngah kütse aveh atharuo vünüh ajuhie lovü nüh shuwa.

²⁰Jüti sanü Noah nüh VÜWA vü kükhurüpe küsü sanü asa kümtse aveh thi amüwa kümtse aveh vi nü kükhurüpe vünüh kütso kükhurü sa.

²¹Jüti küsa vü VÜWA nüh arheküüngu kürhekera nü ma mpa ma luoveh lovü nüh phrahte taji, “Anyiri kenüh hi nüh piketü azhihwa kümzülewa nyuthuoh, küpakenühnyunü anyira luoveh tü ma kürünguo vünüh müsüküm kenüh; jü mpa mükünyu hi nüh nosü küzorie kümjie akürho zanyori küzoriewa nyuthuoh.

²²Azhihwa küpeh küju nü mahtsü küzhuh tsotho nga thi kümahwie tsotho nga peh wie naveh, aküso nga aküsa nga, thi müzhü nga thi akie nga, arülo nga, arüza nga müpeh nüh küsawa nyu,” ti küza