Read Pochuri Naga 2 SAMUEL 1 Bible Online

2 SAMUEL 1 - Pochuri Naga bible

2 SAMUEL 1

¹Saul sükümü sevü David tü Amalekri rehthekhehm nü sheleru Ziklag vü rülo künyi pehtewa;

²thi rülo kücheawa tü, halie, nyi küsü Saul kürünape vünüh ma thsümnyi zokhri thi azhih vi ma lü mülo ti sanü ru. Ma tü David vü ru ünü azhihvü küluzeh nü siakesheh.

³David nüh ma vü, “Noh tü khievü nüh tse lo?” ti küna. Thinü ma nüh ma vü, “Israelra kürünape vünüh hi tü mürietetse lie,” ti küza.

⁴Jüti küüzavü David nüh ma vü, “Jütü mokümjie vünüh lo? Hi vü küza luo,” ti khuo. Jüti kükhuo vü ma nüh, “Anyiri tü ariepe vünüh zhütewa khehthuoh, thi anyiri hozake wienga külu nü sütewa khehthuoh; Saul thi ma tsa Jonathan nga sümthuoh,” ti rületsü.

⁵Jüta rülekütsü vü David nüh ma vü küüzawa vizawa vü, “Noh tü Saul thi ma tsa Jonathan tü sümthuoh ta küsa moti thsü lo?” ti küna le.

⁶ Thinü vizawa ma vü küzawa nüh ma vü, “Mükümshemla vünüh hi tü Gilboa küzhi rügivü pehveh, thi Saul tü ma vi rügivü rühngake pehveh ünü; halie, rawuhkhekari thi rawuhnyiri tü ma rügivü shehnyiwa.

⁷Jütiküsa vü ma nüh ma sevü noküze ünü ma tü hi ngu nü ji. Thi hi nüh ma kühu taji, ‘Hi hala pehveh,’ ti rületsü.

⁸Thinü ma nüh hi vü, Noh tü thawa lo? ti küna. Hi nüh ma vü, hi thuoüji Amalekri küsü, ti rületsü.

⁹Thi ma nüh hi vü, ‘Eh nato vü tsie nü hi rehthem luo, ti khuo; küpakenühnyunü amüshe kümnomna nüh hi phehtemthuoh tü eh kürho tü khinyi nga müküse wie,’ ti küza.

¹⁰Jükenüh hi tü ma nato vü tsie nü ma rehthem, hi nüh küthsütoh thuoüji ma nüh küluzehküm sevü ma tü kümsevü ma tü mükürhorawiethuoh kenüh; thi hi nüh ma lü rügi vünüh ma kajilüwe wa thi ma pie vünüh satürü vi ti sanü hi nüh eh vüwa vü hala vitseveh,” ti küza.

¹¹Jüsevü David tü ma thsümnyiri shoh nü jümari zokhrim; thi anyiri ma vü nyipehküvehri aveh nga jü üta sa;

¹²thi mari tü Saul, ma tsa Jonathan; VÜWA nyiri thi Israelri zhehlori kenüh shükheke, krie thi münüleh küju assa sapeh, küpakenühnyunü mari tü anyuchuwa vünüh zothe küzehküm kenüh.

¹³Thinü David nüh vizawa ma vü küüzawa vü, “Noh tü khievü nüh ru lo?” ti küna. Jüti küüna vü ma nüh, “Hi tü priküru Amalekri atsa lie,” ti rületsü.

¹⁴David nüh ma vü, “Noh tü mükrü nüh mokümjie vünüh VÜWA nüh thsekümwa vü noh ke thsuoke lo?” ti küza.

¹⁵Jüti küsa vü David nüh vizari küsü ji taji, “Wa nü ma nete luo,” ti küza. Jüti küüzavü ma nüh ma fethem.

¹⁶Jüti sakümvü David nüh ma vü, “Noh zühwa tü noh lü vü küruwa saluo, ‘Hi nüh VÜWA nüh thse kümwa zothe,’ ta noh pohvü kütsü kenüh ta küüza kenüh,” ti küza.

¹⁷David nüh kürümuo hama vi nü Saul thi ma tsa Jonathan vü sa,

¹⁸ thi ma nüh jüma tü vi nü Judah nyiri vü müsoshieji mümhie ti küza; halie, jüma tü Jashor Lasipha lovü rhüsaveh. Ma nüh:

¹⁹“Noh kütholahthovü, O Israel, küzhiho azhieri vünüh zothemthuoh! kümzhori tü mokümjie külum lo!

²⁰Jüma Gat vünüh müphrahte tüm, Ashkelon lehkhujiri vünüh jüma küzhuhnyuo müsa tüm; Filistin tsavühri nüh nyierakhruo üsü nüh, ahu mkütsiri nüh nyierakhruo üsü nüh.

²¹Nohri Gilboa küzhiri, aküzo nyutü tsohkürü nohri vü müküturu tüm, nyutü kürüku tü müküümsizhu tüm! küpakenühnyunü jüla nüh kümzhowa joh huo tü sakümne küm kenüh, Saul joh huo, vüjuh vi müküüthse.

²²Zothekümra züh vünüh, kümzhowa küthü vünüh, Jonathan lawih tü asevü müshe le, thi Saul nyuchuwa tü rütso nü shele müru.

²³Saul thi Jonathan, küthohmo thi külotsawa! Akürho vü nga thi aküsü vü nga masü tü müporie; masü tü aluomü nyieh vünüh kürhü, masü tü amiewuori nyiehvü nga khra.

²⁴Nohri Israel tsavühri, Saul kenüh krie luo, thawa nüh kümruphieke vünüh athsü küzhuküzü tsü lo, thawa nüh suna thorü vi nohri küütehvü thsetsü lo.

²⁵Arie aza vünüh mokümjie kümzhori tü külum lo! Jonathan tü azhie kümsieri vünüh zothe küzehm.

²⁶Hi tü noh kenüh amüshemnomnam, eh nü Jonathan; noh tü hi vü küloke vünüh ru; hi vü noh külo tü aküngo, nyimzari külo nyiehvü nüh hi vü küzhiluotsü.

²⁷Kümzhori tü mokümjie küluveh lo, thi arie senyuseviri tü pohkaveh lo,” ti sa.