Read Pochuri Naga 2 SAMUEL 12 Bible Online

2 SAMUEL 12 - Pochuri Naga bible

2 SAMUEL 12

¹Thi VÜWA nüh Nathan tü David vü küze. Ma tü ma vü ru nü mavü, “Anyujiwa vü nyi künyi peh, nyi küsü thuoüji nyirhie thitü küpawa nü mükhuo.

²Nyirhiewa thuoüji anyihnyih thi mieshümiesa khielo ta peh;

³thitü anyi kümkhuowa nü nyihzhüvo süküsa küsüwie küchie nüh zanyo küpa küsü nga münyie. Thi ma nüh jüma tü saküji nü ma thi ma tsari sie khruoküwa wie; jüma tü ma mpa ma shiekütsa, ma huo küzhu, ma tühso rügivü küzeh ti sanü matsavüh küsü kümjie sa.

⁴Jüti küsa vü küzehkütseri küsü tü nyirhiewa zheh vü ru, thi matü ma mpa ma nyihnyih nyutü mieshümiesa vünüh küzehkütsewa ma vü küruwa kenüh zanyo müküchengü nüh sanü anyi kümkhuowa nyihzhüzah vi nü ma zheh vü küru anyiwa kenüh zanyo küche,” ti küza.

⁵Jüta küüza vü David rüküshu tü anyiwa vü khielohti müküüzara nüh juzhutewa nü ma nüh Nathan vü, “VÜWA nüh rhoküveh üta hama saküm anyiwa tü küsüleh wiethuoh;

⁶thi nyihzhüzahwa jüzake müzü satsü naveh, küpakenühnyunü ma nüh nokümze mükünyie kenüh zanyo hama saküm kenüh,” ti küza.

⁷Nathan nüh David vü, “Noh tü anyi jümawa thuoh. VÜWA, Israelri Saküüwuowa nüh hakümjie küzaveh, hi nüh noh tü Israelri kajiwa küsa nti thse saveh, thi hi nüh noh vizhu;

⁸thi hi nüh noh küsosiewa zheh tsü, thi noh küsosiewa vüvüh vi noh tüso rügivü thse tsü, thi Israelri zhehlori thi Judah zhehlori vi noh tsüthuoh, mükütüküzü hamari wienga zülalewie thuoüji hi nüh noh vü jüma nyiehvü nüh thsephre tsü naveh.

⁹Ma notha vü mowa nü müsüveh ünüh sanü mokenüh VÜWA zhükulemthuoh lo? Noh nüh Uriah Hitwa tü anyuchuwa nüh rehthem nü ma vüvüh vi noh vüvüh sa, thi Amonri nyuchuwa nüh ma rehthem.

¹⁰Khinyi jükenüh anyuchuwa tü noh zheh vünüh kükariwa nyuthuoh, küpakenühnyunü noh nüh hi kulem nü Uriah Hitwa vüvüh vi noh vüvüh sakümthuoh kenüh; ti küza.

¹¹VÜWA nüh ha üta küzaveh, halie, noh mpa noh zheh vünüh hi nüh kümsü vizhu nü noh küüsaluo naveh; thi noh notha vünüh hi nüh noh vüvühri vim nü noh zhephruwa tsü taji arünyi nüh künguwa vünüh ma nüh mari sieküüzehm naveh.

¹²Küpakenühnyunü noh nüh jüma küüzhe vünüh küsa kenüh; thitü zanyo hamari tü Israelri aveh tüvü nüh thi arünyi atüvü nüh hi nüh satsü naveh,” ti küza.

¹³David nüh Nathan vü, “Hi tü VÜWA tüvü khiemuomthuoh,” ti küza. Thinü Nathan nüh David vü, “VÜWA nga noh kükhiemuo vijamtüthuoh; tinü noh tü küsüwa nyuthuoh.

¹⁴Jütawie ketünga, hama saküm kenüh noh nüh VÜWA müküchie sajumthuoh nü atsa noh vü wuotsü küsawa thuoüji sümnathuoh,” ti küza.

¹⁵Jüsevü Nathan tü ma zheh vü tewa. Thinü Uriah vüvüh nüh wuo David kütsü atsawa tü VÜWA nüh patsü ünü jüma tü natewa.

¹⁶Jükenüh David nüh atsawa kenüh Saküüwuowa vü khuophohke nü David tü assa sa thi azhehlovü tu nü rüza aveh azhih vü zeh.

¹⁷Thi ma zheh vü kükhruori tü azhih vünüh ma saküsühra nti ma nato vü tsiepeh khe; thitü ma tü küsührawa nyu, nyutü mari sie ashiekütsawa nyu.

¹⁸Rülo türü vü atsawa tü süm. Thi David sieperi tü atsawa sümthuoh ta küsa vi David vü küüza krütewa; küpakenühnyunü mari nüh, “Halie, atsawa rhoküpeh vü hiri nüh ma jüle tü ma tü hiri zhü müküna; jütathuoüji atsawa sümthuoh ta küsa hiri tü mota ma vü küzara na lo? Ma tü ma mpa nüh kümnomna wuori sa mhieveh,” ti küza.

¹⁹Thitü David tü ma sieperi nüh küüzhe vünüh phrahte küvehthsüra nü atsawa tü sümthuoh ta küsa David nüh thsütera nü ma nüh ma sieperi vü, “Atsawa tü sümthuoh ülo?” ti küna. Mari nüh, “Ma thuoüji sümthuoh,” ti rületsü.

²⁰Thinü David tü azhih vünüh sühra nü ajuhke sa, ma mpa nüh vüjuh vi thse thi ma thsümnyi müzhi ti sanü VÜWA zheh lovü wa taji kükhurü sanü ma mpa ma zheh vü tewa; thi ma nüh ashie kükhuovü mari nüh ashie thse ma tüvü sanü ma tü tsa.

²¹Jüti küsa vü ma sieperi nüh ma vü, “Noh nüh saküveh hamatü mowa thuoh lo? Atsawa rhoküveh vü noh tü assa sa thi atsawa kenüh krie; thitü atsawa süm ünü noh tü sühra nü ashietsaveh nü,” ti küza.

²²Ma nüh, “Atsawa rhoküveh vü hi tü assa sa thi krie; küpakenühnyunü hi nüh, VÜWA nüh hi vü lozhisheh nü atsawa tü rhora nga müthsü nü,” ti küsa kenüh.

²³Thitü khinyi thuoüji ma tü sümthuoh; tinü hi tü mokenüh assa sana lo? Hi nüh ma vishelerura naveh ülo? Hi tü ma vü wa naveh, thitü ma nü hi vü shele mürathuoh, ti küza.

²⁴Jüti küsa vü David tü ma vüvüh Bathsheba luoveh sakürüzih tsütaji ma vü tu nü masü zeh taji atsa küsü wuo; thi ma nüh ma nyo Solomon ti ji. Thinü VÜWA nüh ma lo,

²⁵thi Nathan setsaküthsüwa nüh zhühle küsü küze; jükenüh ma nüh ma nyo Jedidiah (mazhünyo VÜWA nüh küthohmo) ti ji, küpakenühnyunü VÜWA zhi küsa kenüh.

²⁶Jüsevü Joab tü Amonri Rabbah sie saluo nü anyuji aküjiwa vitera.

²⁷Jüti küsa vü Joab nüh azhühvüri David vü küze taji, “Hi nüh Rabbah sie saluothuoh; jüma nyiehvü nga hi nüh ajuhri nyujiwa vimthuoh.

²⁸Jükenüh, khinyi thuoüji, anyi küpari aveh jizhuh nü anyujiwa vü kürünape sataji jüma vi luo; hi nüh anyujiwa vitera nü eh nyo vünüh müji nüh sana küsa kenüh,” ti küza.

²⁹Jükenüh David tü anyiri aveh jizhuh nü Rabbah vü wa taji jüma sie saluo nü vitera.

³⁰Jüti sanü ma nüh mari kajiwa kajilühwewa ma lü rügi vünüh vimtü; jüma küüzho thuoüji suna küüto cherake nü münga kümjie, thi jüma lovü aloh amekürhe küsü peh nü jüma tü David lü rügivü sa. Thi ma nüh anyujiwa vünüh zheküvira hozake amevi nü shuhru.

³¹Anyujiwa küpeh nyiri nga vi shuhru nü mari vi thsohkürhovühri mürü sühari thi mürü müvüri vi nü küüroh, thi mari viküveloh nyithü vü küüroh khe; hakümjie ma nüh Amonri nyujiri aveh vü sa kheh. Jüti sanü David thi anyiri aveh tü Jerusalem vü sheleteru kheh.