Read Pochuri Naga 2 SAMUEL 19 Bible Online

2 SAMUEL 19 - Pochuri Naga bible

2 SAMUEL 19

¹Jüti küsa vü wuori nüh Joab vü, “Halie, kajiwa thuoüji Absalom kenüh krie thi shükhekeveh lie,” ti küza.

²Jükenüh jüma rülovü akükhrawa tü anyiri aveh kenüh küshükhekevü tetu; küpakenühnyunü jüma rülovü anyiri nüh küünara, “Kajiwa tü ma tsa kenüh shükhekeveh,” ta küünara kenüh.

³Thi anyiri nüh arie vünüh zükrü nü arievü küte kümjie jüma rülovü anyiri tü müchieluo nüh anyujiwa vü tetu.

⁴Kajiwa tü ma nyieh tieh nü krie ajikhi zie taji, “O, eh tsa Absalom, O, Absalom, eh tsa, eh tsa,” ti sa.

⁵Jüti küsa vü Joab tü kajiwa zhehvü turu taji, “Noh tü nosü küzükrü nüh noh sieperi, nosü noh kürholi, noh tsa nyimpari kürholi, noh tsavühra kürholi, noh vüvühra kürholi külolekütsüri anyieh tiehtetsüthuoh,

⁶küpakenühnyunü noh tü noh kümrhüri thuoüji lo thi noh kürholi thuoüji mürhüm. Nosü noh kenüh sierhüri thi asieperi thuoüji moma küsa kenüh; nosü hi nüh küthsü, mükütüküzü Absalom nü rho thi hiri aveh thuoüji sümti thuoüji noh nü lozhe nanü.

⁷Khinyi jükenüh sühra taji tsezhu wa nü noh luoveh kürünyi vünüh sieperi jühle luo; küpakenühnyunü hi nüh VÜWA vünüh küshiewie vehthuoh nü noh nüh mükütüküzü müwa thuoüji sütavü anyi küsü nga noh vü küpeh wa nyu; thi hamatü noh küviza vünüh nosü küju noh vü kümsü küru aveh nyiehvü nüh müsüm naveh,” ti küza.

⁸Jüti küüza vü kajiwa tü sühra nü akheri vü peh. Thinü anyiri aveh nüh, “Halie, kajiwa tü akhri vü shupehveh lie,” ti küzakheh; thi anyiri aveh tü kajiwa tüvü ru. Israelri tü mari aveh nga mari mpa papa zheh vü zhüteküwa kheh kenüh.

⁹Thi Israelri akuoh aveh vü anyiri aveh tü küsaluo vü pehtaji, “Kajiwa nüh hiri mükünongüra ke vünüh hiri vizhutsü nü Filistinra kenüh hiri küloletsüthuoh; thi khinyi thuoüji ma tü Absalom azhihwa vünüh zhütewathuoh.

¹⁰Thitü Absalom, hiri nüh ma hiri nyiehvü küünewa tü arie vünüh sümthuoh. Jükenüh khinyi nohri tü kajiwa siesheleru naküsa kenüh mokenüh zanyoküsü nga müphrahte lo?” ti küza.

¹¹Thinü kajiwa David nüh Zadok thi Abiathar navü künyi vü zhühle hama küze taji, Judah kükhruori vü küza luo, ‘Israelri aveh azhü kajiwa vü teruküm nohri tü mokenüh kajiwa sie azheh vü sheleküru asekhe sana lo?

¹²Nohri tü eh küshukürari, nohri tü eh rü thi eh sa; tinü mokenüh nohri tü kajiwa sie sheleru naküsa asehkhe sana lo,’ ti küza.

¹³Thi Amasa vü, “Noh tü eh rü thi eh sa nyu ülo? Saküüwuowa nüh hivü jüüta satsüthuoh, thi jüma nyiehvü nga satsü, mükütüküzü nosü vünüh tuvü Joab müthoh vünüh eh thopahiri sierhüwa ngu thuoüji,” ti küza üti, ti küza.

¹⁴Thi ma nüh Judah vü anyiri aveh luoveh küsü sanü nyiküsü luoveh kümjie sa tsü; jüti küsa vü nüh mari nüh kajiwa vü azhüküze, “Nohsü khürü thi noh sieperi aveh sheleteraluo,” ti küza.

¹⁵Jükenüh kajiwa tü shele Jordan vü teru; thi Judah tü kajiwa mütu nta thi kajiwa sie Jordan vü sieteküru nta Gilgal vü ru.

¹⁶Jüti küsa vü Benjaminwa Gera atsa Shimei tü Bahurim vünüh pre nü Judah nyiri sie taji kajiwa David mütu nti tseturu;

¹⁷thi Benjamin nyiri anyie küsü ma sie nü ru. Thi Saul zhehlo vünüh asiepewa Ziba tü ma tsa nyimpari türamnga thi ma sieperimükeke ti sie nü kajiwa tüvü nüh pre taji Jordan vü teturu,

¹⁸thi mari tü kajiwa zhehlori Jordan sie kakewa nti thi ma külozhe santi akeka vünüh kaketewa. Ma Jordan kakewa na saküveh vü Gera atsa Shimei tü kajiwa tüvü küngietsuo zeh,

¹⁹nü kajiwa vü, “Eh vüwa tü hi vü müküleh vünüh mükümshe tümluo, nyutü eh vüwa kajiwa nüh Jerusalem jam nü teküwa rülo vü noh siepewa nüh müküleh sa küm mümshe tümluo; kajiwa tü jümavi nü amüshe lovü müküsa tümluo.

²⁰Küpakenühnyunü hi nüh khiemuomthuoh ta küsa noh siepewa mpa nüh thsüveh ünüh; jükenüh, halie, nosü hi tü hala tse, Josef tharuo aveh vü apokhuwa sanü eh vüwa kajiwa mütu nti tse,” ti küza.

²¹Jüti küüza vü Zeruia atsa Abishai nüh, “Hama kenüh Shimei tü küüsüwa nyu ülo, küpakenühnyunü ma nüh VÜWA nüh thsekümwa müzüküm kenüh?” ti rületsü.

²²Thitü David nüh, “Nohri Zeruai tsari, nosü nohri nüh hi siemkünoluongüri küsü sana küsa hi tü nohri sie nü mowa sanathuoh lo? Nosü Israel vü anyi küsüküsü nga küüsü vü thsemnathuoh ülo? küpakenühnyunü hi tü nosü Israelri nyiehvü kaji saveh ta küsa hi nü thsümveh ülo?” ti küza.

²³Thinü kajiwa nüh Shimei vü, “Noh tü küsüwa nyu,” ti küza. Thi kajiwa nüh ma küüshie zhü ma vü tsüm.

²⁴Jüti küsa vü Saul tsa Mefiboshet tü kajiwa mütu nti tseturu; kajiwa teküwa rülo vünüh ma kümhie ta sheleküru rülo küju matü ma jih nga mükhrü, ma khane nga mümjie nyutü ma thsümhi nga mürüshü.

²⁵Thi ma tü kajiwa mütu nti Jerusalem vünüh küru vü kajiwa nüh mavü, “Noh tü mokenüh hi vü nyi müwa lo, Mefiboshet?” ti küna.

²⁶Thinü ma nüh, “Eh vüwa, O kajiwa, eh siepewa nüh hi müramizhiküm kenüh; küpakenühnyunü noh siepewa nüh ma vü, Hi tü kajiwavü rawuh rügi vünüh nyiwa na küsa kenüh rawuh küsü küche nü hi tsüluo,” ti küza. Küpakenühnyunü noh siepewa tü ajih jiküm kenüh.

²⁷Eh vüwa kajiwa vü ru na küsa ma nüh noh siepewa müroküzehm. Thitü eh vüwa kajiwa thuoüji Saküüwuowa rügizhühleri kümjie nü; jükenüh noh kenüh mowa nü mhieveh ünüh saluo.

²⁸Küpakenühnyunü eh pa zheh aveh eh vüwa kajiwa tüvü nüh anyiri nüh zorie nü zothem nta sa; thitü noh nüh noh siepewa vi nü noh shiekütsape vü kütsari azavü sa. Hi nüh kajiwa vü krie na küsawie küchie nüh jüma nyiehvü mowa eh kümsho pehveh lo? ti küza.

²⁹Kajiwa nüh ma vü, “Noh tü mokenüh noh zhühle küza lehü veh lo? Hi nüh küürathuo thuoüji noh thi Ziba tü azhih küsuo luo,” ti küza.

³⁰Mefiboshet nüh kajiwa vü, “O, eh vüwa kajiwa tü kümhie ta azheh vü ruküjuthuoh kenüh ma mpa aveh küüvikhehm luo,” ti küza.

³¹Jüti küsa vü Barzilai, Gileadwa tü Rogelim vünüh turu nü Jordan küju ma sie wa nti Jordan küju ma tü kajiwa nyina sawa.

³²Barzilai tü khruo sheh nü ma mahvi zerakeküm sa; kajiwa nüh Mahanaim vü küpeh vü ma tü ashie ma küütsa; küpakenühnyunü matü nyirhieri küsü küsa kenüh.

³³Jüti küsa vü kajiwa nüh Barzilai vü, “Hi vü nyishuhru luo, hi nüh Jerusalem vü noh vo satsü naveh ünüh,” ti küza.

³⁴Thitü Barzilai nüh kajiwa vü, “Hi tü mahvi küzake rholehü nanü hi tü kajiwa sie Jerusalem vü nyi khru na lo?

³⁵Hi tü khinyi mahvi zerake khruomthuoh; tinü hi tü mowa nü akülo thi mowa nü mükülo nüh thsüküpara naveh ülo? Noh siepewa tü ma nü mowa tsaveh thi mowa zhuveh ünüh müpora naveh ülo? Hitü khinyi nga nyimpari nüh thi nyimzari nüh azah küsa jikhi künara naveh ülo? Jütathuoüji noh siepewa tü mokenüh eh vüwa kajiwa vü küsüro küthsephre sana lo?

³⁶Noh siepewa tü kajiwa sie nü lehkhuji pike Jordan tuwuovü küwa mpa sanaveh. Mokenüh kajiwa tü hi vü ajisuo jüüta noshele na lo?

³⁷Noh siepewa nüh khuoveh, tinü noh siepewa tü küüshelem luo, jüti sanü hi mpa eh nyujiwa vünüh eh pa thi eh zah rüku kütuoh vünüh küüsüm luo. Thitü hala noh siepewa Khimham pehveh, tinü matü eh vüwa kajiwa vü nyiküüwa nü noh kenüh mowa nü mhieveh ünüh ma kenüh satsüluo,” ti küza.

³⁸Jüti küüza vü kajiwa nüh, “Khimham tü hi vü nyi kükhru sanaveh; thi noh kenüh mowa nü mhieveh ünüh hi nüh ma kenüh satsünaveh, thi noh tü hi vünüh mowa münguveh ünüh hi nüh noh kenüh satsü naveh,” ti küza.

³⁹Jüti küsa vü anyiri aveh Jordan karitewa, thi kajiwa nga tewa; thi kajiwa nüh Barzilai kümetsü thi tsia ma tsü, jüti sanü ma mpa mazheh vü sheleteru.

⁴⁰Kajiwa tü Gilgal vü tsetewa thi Khimham nga ma vü nyi tsetewa; Judahnyiri aveh thi Israel nyiri küzhila ti kajiwa sie nü ma leh vü ru.

⁴¹Jüti küsa vü Israel nyiri aveh kajiwa vü ru nü kajiwavü, “Mokenüh hiri jienüri, Judah nyiri tü noh rühutewa nü kajiwa, ma zhehlori thi David nyiri aveh ma sie nü Jordan karitetselo?” ti küna.

⁴²Judah nyiri aveh nüh Israel nyiri vü, “Küpakenühnyunü kajiwa tü hiri vü küshuküra küüshehnyi kenüh. Thinü mokenüh nohri tü hama kenüh arüshuveh lo? Hiri tü aveh vü nga kajiwa nüh ameküüshu vünüh tsamthuoh ülo? Nyutü ma nüh hiri vü aküte tsü ülo?” ti rületsü.

⁴³Thinü Israel nyiri nüh Judah nyiri vü, “Hiri tü kajiwa vü suope türake pehveh, thi David vü nga hiri tü nohri nyiehvü nüh pehveh. Thinü mokenüh nohri tü hiri rüveh lo? Hiri kajiwa siesheleruna küsa hiri nüh apo müphrahte ülo?” ti rületsü le. Thitü Judah anyira zhü tü Israel nyira zhü nyieh vünüh krükhre.