Read Pochuri Naga 2 SAMUEL 21 Bible Online

2 SAMUEL 21 - Pochuri Naga bible

2 SAMUEL 21

¹Jüti küsa vü mahvi küche David tsotho vü kümkhuojih mükütuowiethuoh nüh teru; thi David tü VÜWA atso phah. Thinü VÜWAnüh, “Saul vü thi ma zhehlori vü azühmküleh pehmthuoh, küpakenühnyunü ma nüh Gibeonri tü aküsü vü thseküm kenüh,” ti küza.

²Jükenüh kajiwa nüh Gibeonri ji. Gibeonri tü Israel nyiri nyu, thitü Amorri kümto, Israel nyiri nüh mari tü küzothekhehwa nyuta phrahteke sa wie ketünga Israel nyiri thi Judah kenüh ma kütsaza sanü mari rehthe nti phah.

³David nüh Gibeonri vü, “Hi tü nohkeri nüh moti sana lo? Thi nohri tü VÜWA aka tsietsü na küsa kenüh hi tü mokümjie vünüh müküleh küsawa thuona lo?” ti küza.

⁴Gibeonri nüh ma vü, “Saul nyutü ma zhehlori thi hiri azhievü rakasa nyutü suna zhühnyo vünüh nyu; nyutü hiri tü Israel vü anyi wuori küsüm nti küsa kenüh nga nyu,” ti küza. Thinü ma nüh, “Mokenüh noh tü hi nüh satsü naveh ti küsaküzaveh lo?” ti küza.

⁵Mari nüh kajiwa vü, “Israelri natonahuori vü hiri tü azhiemüküüngu nta küsa kenüh anyiwa tü hiri zorieju tsü nta thi sakümiejum nta kümshe thse,

⁶ma tsa nyimpa türüri tü hiri vü tsüm luo, jüti sanü VÜWAKüzhi Gibeon vü VÜWA tüvü nüh hiri nüh mari huthuom naveh ünüh,” ti küza. Kajiwa nüh, “Hi nüh mari vi nü tsü naveh,” ti küza.

⁷Thitü kajiwa nüh Saul tsa Jonathan tsa Mefiboshet küürho, küpakenühnyunü masü azhievü David thi Saul atsa Jonathan masü azhievü VÜWA küüshiewa kenüh.

⁸Kajiwa nüh Rizpa Aia tsavühwa atsa nyimpa künyi, Saul vü wuokütsüwa, Armoni thi Mefiboshet; thi Merab, Saul tsavühwa atsa nyimpa müngari, ma nüh wuo nü Barzilai Meholatwa atsa Adriel vü wuokütsüwa;

⁹thi mari nüh mari vi Gibeonri kevü thsem nü mari nüh VÜWA tüvü aküzhi vünüh mari huthuom taji mari türü küsükeri vünüh kümiem. Mari küzothe tü kümahwie rülo pokhuwa; khuozhikürümieh kümahwie tsotho vü zothem.

¹⁰Thinü Aia tsavühwa Rizpa tü nyirüthsü vi nü ma mpa ma kenüh aloh rügivü shieke, kümahwie tsotho pokhu vünüh sate nü atülü vünüh atsorü mari vü küturu küju; thi nyimzawa nüh arülovü nga rügivü prükütse müwari, tü mari kümo vü müküru, nyutü kükrükhre asari tü arüza vü mari kümo vü müküru nüh sa.

¹¹Aia tsavühwa Rizpa, Saul müsüvühwa nüh mowa sanüh wuori nüh David vü küüza vü,

¹²David tü wa nü Saul arü thi ma tsa Jonathan arü ti Jabesh, Gileadnyiri, Betshan ta küsa müza rieji, Filistinri nüh masü kühuthuope Filistinri nüh Gilboa vünüh Saul küfethe rülo vü masü rühuteküwa vünüh viteru;

¹³thi ma nüh jüla nüh Saul arü thi ma tsa Jonathan arü ti vishuhru; thi huthuokümra rü nga mari nüh vizhuh.

¹⁴Jüti sanü mari nüh Saul thi ma tsa Jonathan arü Benjamin azhih Zelavü ma pa Kish rüku lovü chohwum; thi mari tü kaji wa nüh azhü kütsü aveh sa kheh. Jüti küsa se vünüh Saküüwuowa nüh azhih kenüh küzhieke aveh künatsü.

¹⁵Filistinri tü Israelri sie arie sa, thi David tü ma sieperi siekürüküsü sanü tsuo taji mari tü Filistinri siesaluo; thinü David tü thasütewa.

¹⁶Jüti küsa vü kürajirasuori küthsoküzhi küsü Ishbibenob, masahwuo vi küüzho tü küüto küche nü küzhila thi anyuchu kürütheküsü pe ti sanü David zothe nti müshe.

¹⁷Thitü Zeruia atsa Abishai tü ma kükra nti ru nü Filistinri prü taji ma zothem. Jüti küsa vü David nyiri tü ma vü zhiephohkenü, “Noh tü Israelri lati zokünemji sü nü noh thuoüji hiri sienü arie vü müwalerathuoh,” ti küza.

¹⁸Jüma sevü nga Gob vünüh Filistinri sie arie sa le taji Hushatwa Sibekai nüh Saf rehthem, ma tü kürajirasuori küthsoküzhiriküsü.

¹⁹Jüsevü nga Gob vünüh Filistinri sie nü arie sa le nü Bethlehemwa, Jareoregim atsa Elhanam nüh Git kürajirasuowa rehthem, ma vihkuoh tü atakha kümjie.

²⁰Jüma sevü nga Gat vünüh arie sa le, thi jüla tü anyi akru küjiküsü, ma ke awuowuo vü tüjü türoro thi ajih tüjü türoro, küsaji mükeke nü müzü küpe peh; ma nga arajiri küthsoküzhiri.

²¹Ma nüh Israelri kürünyie vü Shimei atsa Jonathan, David anü nüh ma rehthem.

²²Hama müzüri tü Gat vü arajira küthsoküzhiri kheh; thi mari aveh nga David thi ma sieperi ake vünüh sükhehm.