Read Pochuri Naga 2 SAMUEL 22 Bible Online

2 SAMUEL 22 - Pochuri Naga bible

2 SAMUEL 22

¹David tü VÜWA nüh ma mükünongüri thi Saul ke vünüh küvizhurülo vü azah zhühtho hamari VÜWA vü küza.

²Ma nüh, VÜWA tü eh lokrü, eh shiehkuwa thi hi vizhukütsüwa,

³eh Saküüwuowa, eh lokrü, ma vünüh eh kümnyipe künguwa, eh joh huo thi eh küülole rütsüwa, eh shiehku kümzhowa thi eh kümnyipewa eh küülolewa; küzorie vünüh noh nüh hi külole tsütsüti.

⁴Hi nüh VÜWA ji, ma tü küsiaketsewa, thi hi tü eh mükünongüri vünüh külolethuoh.

⁵Aküsü küüshüh nüh hi kümkieshe kenüh, küluohzhe ajuhküülowa nüh hi ro;

⁶aküsü kuli nüh hi kürüte, aküsü piehjü tü hi vü nyihtoke.

⁷Eh müshekümnomna vünüh eh VÜWA ji; Eh Saküüwuowa vü hi nüh ji. Ma kükhurüzheh vünüh ma nüh eh jikhi künatsü, thi eh kükrie tü ma khüna vü teru.

⁸Thinü azhihwa tü küze thi küzhüh; thi atülü juperi tü kheketa küshüh thi küzhüh, küpakenühnyunü ma nüh arüküshu kenüh.

⁹Ma nyaku lovü nüh nyikhushu nü arügivü wa, thi ma po vünüh küzorie nyih shuru; ma vünüh nyihie küjuphierake azhu shuru.

¹⁰Ma nüh atülüri saküüngie, thi saji teru; küzomthsüthsü ma mpha kükhu vü peh.

¹¹Ma tü asa küsaküpewa rügi vü tse, thi prü; ma tü mürhü küsa rügivü nüh ngu.

¹²Ma nüh aküzo ma saküümkieshe ma kuruoküziete, akülu aküsa, ajuh küsezhuh.

¹³Ma tüvü küwierake vünüh anyihie nyihzhu shuru.

¹⁴VÜWA nüh atülü vünüh atsohshi, thi kümsietsawa nüh ma jikhi saküze.

¹⁵Ma nüh ma shüchu küze, thi mari sariekütsü, atsorie, thi jümari prürieküze.

¹⁶Jüti küsa vünüh juhküji gulehri tü nguteru, azhihwa jupe tü fokürütsomtü, VÜWA nüh küphra vünüh, ma nyaku lovü nüh rühtho küthorie küru.

¹⁷Ma nüh kümsie vünüh rhahzhuoke nü hi vi, ajuh hozake vünüh ma nüh hi shohzhu.

¹⁸Eh mükünongü kükhra vünüh ma nüh hi vizhu, hi kümrhüri vünüh, mari tü eh kenüh kümzho le kenüh.

¹⁹Eh küsü rülo vü mari tü hi vü jokeru; thitü VÜWA nüh hi vü küpehwa satsü.

²⁰Ma nüh hi sie azhie kümza vü ru; ma nüh hi vizhu, küpakenühnyunü ma tü hi nokülo kenüh.

²¹Eh künyitsa müzhe nü VÜWA nüh eh jisuo satsü; eh ke kümtse müzhe nü ma nüh hi noshele tsü,

²²küpakenühnyunü hi nüh ma lehkhujiri küsa kenüh, thi khukekümsü vünüh hi tü Saküüwuowa vünüh karitemwa.

²³Küpakenühnyunü ma rüleh khonyori tü eh tüvü küpeh kenüh, thi ma rülehzhüri vünüh hi tü nahto vü küreletemwa.

²⁴Hi tü ma tüvü kümte mükünyie sa, thi hi tü hi mpa nüh müküleh vünüh kiehtuo.

²⁵Jükenüh eh künyitsa müzhe nü VÜWA nüh hi vü noshele tsü; ma notha vü eh kümtse müzhe taji.

²⁶Künyitsasheh vünüh ma nüh noh mpa nüh künyitsasheh kütsa; kümtemkünyie anyiri vünüh noh mpa nüh kümtemkünyie kütsa;

²⁷latha vünüh noh mpa nüh latha kütsa, rühlieküükhuh vünüh noh mpa nüh müküükhekünyi kütsa.

²⁸Noh tü anyi azhüküzhüri vizhuzhuti, thitü müsheküüjiri vituru na küsa kenüh noh notha tü mari vü peh.

²⁹Ah, noh tü eh latiwa, O VÜWA, thi eh Saküüwuowa nüh eh küzowa saküwietsüveh.

³⁰Ah, noh vünüh hi tü ariekhuori kücheriera; thi eh Saküüwuowa vünüh hi tü azie joriehra.

³¹Saküüwuowa hamatü ma lehkhuji jum; VÜWA nüh küphrahzhu tü zhütsa ta kütoh; ma vünüh kümnyiri aveh thuoüji ma tü joh huo.

³²Küpakenühnyunü thawa nü Saküüwuowa lo, thi thawa nü alokrü küsü lo, hiri Saküüwuowa mpa nüh nyu ülo?

³³Saküüwuowa hamatü eh kümnyipe kükhrawa, thi eh lehkhuji sakümhie tsü.

³⁴Ma nüh eh mpha tü asühvori mpha kümjie satsü, thi hi tü kümsieri vü sakütoke tsü.

³⁵Arieküsa kenüh ma nüh eh ke tü sakümtetsü, jüüta küsa vünüh eh pie künyi tü sahwuo lawih hehra naveh.

³⁶Noh nüh noh küülole joh huo vi hi tsüthuoh, thi noh küükra nüh hi saküjitsüthuoh.

³⁷Noh nüh eh kükhu vü eh lekha kenüh azhie kümza vi hi tsü, thi eh mpha tü münyicho.

³⁸Hi nüh eh mükünongüri zhewa nü mari zoriejara, thi mari müküzorie kheh nü shele müru.

³⁹Hi nüh zoriejum, hi nüh mari müzhu kükhari kheh, jükenüh mari tü müsührara nüh sam; mari tü eh mpha kükhu vü küluzehtewa.

⁴⁰Küpakenühnyunü arie kenüh ma nüh akükhra vi hi kütseketü kenüh, noh nüh hi küroteri tü eh kükhu vü reküüzemtü.

⁴¹Noh nüh eh mükünongüri tü mari seru hi vü saküüprüke, hi mürhükümri, thi hi nüh mari zoriejam.

⁴²Mari nüh no, thitü nyi küsü nga nüh küülole münyie, mari nüh VÜWA vü zie, thitü ma tü mari rüle mütsü.

⁴³Azhih zhitho kümjie hi nüh mari fe kümnyatsü, lehkhujiri vü anyisa kümjie hi nüh mari tohkümnya, thi mari nyinya khetsü.

⁴⁴Anyiri sie küsaluo vünüh ma nüh hi vizhutsü; noh nüh hi tü akuoküjira lüwa kümjie vünüh hi tü sa; anyi hi nüh mükükthsüri nüh eh kütsü sa.

⁴⁵Alienyiri nüh ru hi vü khotsütsuo; mari nüh eh zhüküüza vü, mari tü eh zhü küna.

⁴⁶Alienyiri tü luoveh zahtewa, thi azheji vünüh mari tü khekheta küshüh nü shuhru.

⁴⁷VÜWA rhoveh; thi eh lokrüwa tü kütsia küvüwa saluo, thi eh Saküüwuowa tü phraküümsiewa saluo, eh küülole lokrüwa,

⁴⁸Saküüwuowa tü eh müthoh sakütsüwa thi anyiri vituru eh kükhu vü küthsetüwa,

⁴⁹ma tü hi mükünongüri vünüh vizhukütsüwa; noh nüh hi küwuluowa nyiehvü hi sakümsietsü, noh nüh zanyoküvürieri vünüh hi vizhutsü.

⁵⁰“Hama kenüh hi nüh noh khaketsü naveh, O VÜWA, akuoküjiri azhievü, thi noh nyo vü küsiake zah sanaveh.

⁵¹Ma nüh ma kajiwa vü kükhrara küji tsü, thi thsekümwa vü mükükhaphrü khale küümze kütsa, David vü, thi ma küthsoküzhiri vü küsuokürho,” ti sa.