Read Pochuri Naga 2 SAMUEL 23 Bible Online

2 SAMUEL 23 - Pochuri Naga bible

2 SAMUEL 23

¹Hamari tü David sehkhe zhüri: David nüh VÜWA sieküjülepe, Jesse atsa, nyira VÜWA sieküjülepe sakümsiekümwa, Jacob Saküüwuowa thsekümwa, Israel azah küsa kümhiewa nüh.

²“VÜWA Sietse tü hi vünüh küzaveh, ma zhü tü eh mizhi rügivü pehveh.

³Israel Saküüwuowa nüh küzamthuoh, Israel Lokrüwa nüh hi vü küüza: Nyi küsü nüh müsho nü takrü küsa vü, Saküüwuowa kükrü vünüh sasati,

⁴ma nüh mari vü arüne kümjie küthohrie mari vü satsüveh, arüne akülu müküpe vü rünyi kükuoke kümjie, azhihvü aprari atsohrü nü saküüshi kümjie.

⁵Ah, jükenüh eh zheh tü Saküüwuowa vü nyitsiemveh ülo? küpakenühnyunü ma nüh hi sie küsuokürho kütsathuozhü sakümthuoh kenüh, azanyo aveh nga khem ta thi samkümsüra vü samthuoh. Küpakenühnyunü ma nüh eh küükra thi kümngu aveh saküütsarhie kütsüwa nyu ülo?

⁶Thitü künyitsa khuke mükünyieri thuoüji rüzhü kümjie jaküm wiethuoh; küpakenühnyunü mari tü ake nüh müküvira kenüh;

⁷thitü anyi thawa nüh jümari pa naveh ünüh ma mpa nüh amürü thi avihkuoh küvü wiethuoh, thi mari tü anyih nüh tsoküüra sasati,” ti sa.

⁸Anyi hamari tü David vü küpeh anyi kümzhori: Takhemonri Josheb-bashebet; ma tü küchera lehvü ma nüh ma vi vimhie sheh nü küsükeri vünüh anyi müza tüze shüthem.

⁹Kümzho nyiri küche azhievü nüh ma sewa thuoüji Ahohi atsa Dodo atsa Eleazar. Filistinri nüh arie kenüh küsezhuh vü ma tü David vü nyitse, thi masü tü mari nyie, thi Israel nyiri tü asevütseketewa.

¹⁰Ma tü sühra nü ma ke müjie kümno küju nü saküzeh peh huo, make tü anyusuowa müja wiethuoh nüh küjehphoke wie; thi jüma rülovü VÜWA nüh kükhrara küji küüroh sa tsü; thi anyiri tü ma sevünüh ru nü rehthekümra tsokrü fovi.

¹¹Thi ma sewa thuoüji Shama, Agee atsa Hararwa. Filistinri tü azhie Lehi ti küji nyiehlakürha khieloti küpeh azhie küsü vü kürüsezhuh khe, thi anyiri tü Filistinri vünüh zhütewa.

¹²Thitü ma thuoüji azhie jüma zhila vü tsie nü jüma nyuote taji Filistinri rehthe; thi VÜWA nüh akükhra küji küroh tsü.

¹³Jüti küsa vü levü cherake vü nyi küche tü tetsuo nü David vü Adulam lopie vü kümahwie tsotho kümjie vü ru, Filistinri küriehkhuo küsü tü jüma tsotho vü Rephaim nyuo vü kürünape sanü pehveh.

¹⁴Jüti küsa vü David tü shiehku kümzhowa lovü pehveh; thi Filistinra rienyira kürünape tü Bethlehem vünüh sa.

¹⁵David nüh müngu taji, “O Bethlehem kheri kütuoh vü küpeh juhkhre vünüh nyi küsü nüh ajuh vi hi küüzhunchiekele,” ti küza.

¹⁶Thinü anyi kümzho küche nüh Filistinra kürünape vehrieru nü Bethlehem juhkhre akheri kütuoh vü küpehwa vünüh ajuh tie taji jüma vi nü David vü ru. Thitü ma tü jüma müzhuthuoh nüh VÜWAvü küsho tsüm,

¹⁷jüti sanü, “O VÜWA, hi tü hama müküsanüh sana küsa kenüh jüma tü hi vünüh kületsuom luo. Mari kürho vi akükrü vü küthsera züh hi tü zhu üti ülo?” ti küza. Jükenüh ma tü müzhunüh sam. Zanyo hamari tü anyi kümzho kücheri nüh sa.

¹⁸Abishai, Joab anü Zeruia atsanüh chehrake ra levü sa. Thi ma tü ma vi küjehphoke nü anyi müza küche sie saluo taji rehthem taji küchera zhievü anyo kümhie müliera.

¹⁹Ma tü mari cherakeri vü anyo kümhietsawa müliera nü mari sierhüwa sa; thitü ma tü mari küche mpha.

²⁰Thi Jehoiada atsa Benaia Kabzil wa tü luovehkümzohri küsü, küüroh küji küsari; ma nüh Moabri ariekümzho nyi künyi zothe. Jüma nyiehvü nga amüra kütsa rülo vü ma tü aloku lovü nüh amiewuo küsü fethe.

²¹Thi ma nüh Egyptri küviza küsü rehthem, Egypt wa tü ma ke vü avipeh; thi Benaia thuoüji ma ke vü akütsüh vi nü tsuo taji Egyptwa ke vünüh aviwa prü nü ma vi vitaji ma shüthem.

²²Jenoiada atsa Benaia nüh zanyo hamari sanü anyi kümzho küchenyieh vünüh anyo müliera.

²³Ma tü cherake azhievü thora, thitü ma tü mari küche mpha. Thi David nüh ma vi nü ma kühuo anyiehvü sa.

²⁴Joab anü Asahel tü cherakera zhievü küsü; Bethlehemri Dodo atsa Elhanan,

²⁵Harodri Shama, Harodri Elika,

²⁶Paltitri Helez, Tekoari Ikesh atsa Ira,

²⁷Anathothri Abiezer, Hushatri Mebunai,

²⁸Ahohiri Zalmon, Netofari Maharai,

²⁹Netofari Bana tsa Heleb, Gibeahri Ribai atsa Itai Benjamin akuoh vünüh,

³⁰Pirathonri Benaia, Gash Kuzari vünüh Hidai,

³¹Arbatri Abialbon, Bahurimri Azmaveth,

³²Shalbonri Eliaba, Jashen tsari, Jonathan,

³³Hararri Shama, Hirarri Sharar atsa Ahiam,

³⁴Makari Ahasbai atsa Elifelet, Gilori Ahithofel atsa Eliam,

³⁵Karmelri Hezro, Arbitri Parai,

³⁶Zobari Nathan atsa Igal, Gadri Bani,

³⁷Amonri Zelek, Birotri Maharai, Zeruia atsa Joab rietsokrüküvüwa,

³⁸Itri Ira, Itri Gareb,

³⁹Hitri Uriah: Aveh küsaji cherake nü türü.