Read Pochuri Naga 2 SAMUEL 24 Bible Online

2 SAMUEL 24 - Pochuri Naga bible

2 SAMUEL 24

¹Jüsevü nga Israelri vü VÜWA rüküshu tü juzhuteru lehü nü ma nüh David küchü nü mari vü küüsaluo taji, “Wa nü Israel thi Judah kürüh luo,” ti küza.

²Jükenüh kajiwa nüh Joab thi thopahiri sierhüri vü, “Israelra kuohri aveh vü Dan vünüh Birsheba küju wa nü hi nüh anyiri küürüh thsü na küsa kenüh anyiri kürüh luo,” ti küza.

³Thitü Joab nüh kajiwa vü, “Eh vüwa kajiwa ngu küpeh küju nü mari nüh küzake pehveh ünüh jüma nyiehvü müzakeri VÜWA noh Saküüwuowa nüh thsephre kütsüwa saluo; thitü eh vüwa kajiwa tü zanyo hama vü khiela nüh nokülo sana lo?” ti küza.

⁴Thitü kajiwa nyuchuwa tü Joab thi thopahiri sierhüri nyiehvü küsarasa. Jükenüh Joab thi thopahiri sierhüri tü Israel nyiri kürüh nti kajiwa tüvü nüh tsezhutewa.

⁵Mari tü Jordan kakewa nü Aroer vünüh sate, thi anyuo azhila, jüma tü anyujiwa vünüh Gad thi Jazer wuovü.

⁶Jüsevü mari tü Gilead, thi Hitri azhih Kadesh vü ru, thi Dan vüru, thi Dan vünüh Sidon vü küzülewa,

⁷thi jüti sanü Tair shiehku kümzhowa vü thi Hivri thi Kananri nyujiri aveh vü ru; thi mari tü Beersheba vü Judah kuoh Negeb vü wa.

⁸Jükenüh mari tü azhih aveh vü wa kümvü asa tüguawa sehkhe vü thi rülo mükeke vü mari tü Jerusalem vü ru.

⁹Thi Joab nüh nyiri küpeh küürüh wa vi kajiwa tsü: Israelri vü anyi luovehkümzoh anyuchuwa küvi 800,000 thi Judah nyiri 500,000.

¹⁰Thitü David nüh anyiri kürüh kümsevü ma luoveh tü tietieti khatewa. Jüti küsa vü David nüh VÜWA vü, “Hi nüh mowa sanüh jümawa vü khiemuo jishehmthuoh. Thitü khinyi thuoüji, VÜWA, hi nüh noh vü khuoveh, tinü noh siepewa müküleh küsa vijamtüluo; küpakenühnyunü hi nüh zhe nü sakümthuoh kenüh,” ti küza.

¹¹Thi David tü arüne küsühra vü VÜWA zhü setsaküthsü Gad vü ru nü, David setsazhüküphrawa nüh,

¹²Wa nü David vü, VÜWA nüh ha üta küzaveh, hi nüh zanyoküche noh tsüveh; jüma hi nüh nohri vü satsü na küsa kenüh jümari küchevü küsü rüka luo, ti küza üti küza.

¹³Jükenüh Gad tü David vü ru nü ma vü, “Mahvi küche kümkhuojih tü noh vü, noh zhih vü ru naveh ülo? Nyutü noh noküümaküshiri nüh noh küzhe asa küche atüvü nüh tela nathuoh ülo? Nyutü sahna rülo küche noh zheh vü peh naveh lo? Jükenüh hi tü hi küüzewa vü mowa rüle tsü naveh ünüh müshe thi kürathuolaluo,” ti küza.

¹⁴Thinü David nüh Gad vü, “Hi tü amüshe na shehmthuoh; tinü kürü VÜWA ke vü tetu ünüh raluo, küpakenühnyunü ma nüh külohna tü jim; thitü hi tü anyira kevü mükütu tümluo,” ti küza.

¹⁵Thinü VÜWA nüh Israelri vü arüne vünüh atsotho küteke küsaküju kükhosahna küze nü Dan vünüh Beersheba küju nyiri anyierürake süm.

¹⁶Thi rügi zhühlewa nüh Jerusalem zorie nta ma ke jümawa vü thsuoke küwa vü VÜWA nüh kümsüwa kükhaphrülem nü anyiri azavü küzorie küüroh sa nta saküveh rügizhühlewavü, “Jü walethuoh; noh ke viketewaluo,” ti küza. Jüti küsa vüVÜWA rügizhühlewa tü Arauna Jebuswa mütha kütsipe vü pehveh.

¹⁷Thinü ma tü rügizhühlewa nüh nyiri zothe küveh ngu nü David nüh VÜWA vü küza taji, “Halie, hi tü khiemuomthuoh, hi tü khuke müsü sheh nü samthuoh, thitü nyihzhü hamari tü mowa samthuoh lo? Hi nüh noh vü khuoveh, tinü noh ke tü hi thi ehpa zhehlori sie küüsaluom luo,” ti küza.

¹⁸Thi Gad tü jüma rülovü David vü ru nü ma vü, “Khru nü Arauna Jebus wa mütha kütsipe vünüh kükhurüpe küsü VÜWA vü khake luo,” ti küza.

¹⁹Jükenüh David tü VÜWA nüh azhükütsü üta Gad azhü müzhe nü khru.

²⁰Jüti küsa vü Arauna nüh no kütsuo ünü kajiwa thi ma sieperitü ma wuovü kütse ngu; thi Arauna tü tsezhuwa nü ma nyiehvü küngietsuo nü kajiwa vü siakesheh.

²¹Thi Arauna nüh, “Mokenüh eh vüwa kajiwa tü ma siepewa vü rulo?” ti küna. David nüh, “Mütha kütsipe noh vünüh sü tajiVÜWA vü kükhurüpe küsü satsü nü anyiri vünüh sahnawa tü küüle na küsa kenüh,” ti küza.

²²Thinü Arauna nüh David vü, “Eh vüwa kajiwa nüh vi nü ma vü mowa nü mhieveh ünüh kükhurü küsaluo; hala shüvotsari akütso kükhurü kenüh pehveh, thi athsohwa kenüh shüvotsa akhuo thi ma khuonyih hala pehveh.

²³Hama aveh, O kajiwa, Arauna nüh kajiwa vü tsüveh,” ti küza. Jüta küüzavü Arauna nüh kajiwa vü, “VÜWA noh Saküüwuowa nüh noh küviwa saluo,” ti küza.

²⁴Thitü kajiwa nüh Arauna vü, “Nyu, thitü hi nüh ame vi noh vünüh süwie naveh; eh kenüh mame mükünyie vi nü hi tü VÜWAeh Saküüwuowa vü kütso kükhurüri küsawa nyu,” ti küza. Jükenüh David nüh mütha kütsipe thi shüvotsari ti rakasa tünyieke nüh sü.

²⁵Jüti sanü David nüh jüla nüh kükhurüpe küsü sanü VÜWA tsütaji kütso kükhurü thi luovehkürüzih kükhurü satsü. JükenühVÜWA nüh azhihwa nüh küzhiekeri künatsü nü sahnawa tü Israelri vünüh küreletewa.