Read Pochuri Naga 2 SAMUEL 6 Bible Online

2 SAMUEL 6 - Pochuri Naga bible

2 SAMUEL 6

¹Jüsevü nga David tü Israel anyi kürükari aveh anyie cherake jizhuhlehü.

²Thi David tü sühra nü Balejuda vünüh ma siepehküveh nyiri avehsie nü Saküüwuowa kütsathuozhü küthseku viru nti wa, jüma tüVÜWA kürhosa kajipe rügivü shuküpehwa nyo vünüh ji.

³Thi Saküüwuowa kütsathuozhü küthseku tü mari nüh akhekhe kürütheküsü vünüh vü taji vi küzhiho vü küpeh Abinadab zheh vü ru; thi Abinadab atsa Uzzah thi Ahio masü nüh akhekhe kürüthewa küre,

⁴Saküüwuowa kütsathuozhü küthseku vü taji; thi Ahio thuoüji kütsathuozhü küthseku tüvü tewa.

⁵David thi Israelri zhehlori aveh tü kükhra aveh thse nü azah sa, topito, atakhu, Siethokhrizah, arürü thi küüchirükhu, ti sa.

⁶Jüti küsa vü mari tü Nekon hie kütohpe vü ru ünü Uzzah tü ma ke Saküüwuowa kütsathuozhü küthseku vü thsuowa nü jüma pate, küpakenühnyunü shüvotsa tü atüwuoh kümshü kenüh.

⁷Thinü VÜWA rüküshu tü Uzzah vü tsozhutewa nü ma nüh kütsathuozhü küthseku küpa kenüh Saküüwuowa kütsathuozhü küthsekunato vünüh süm.

⁸Thi VÜWA nüh Uzzah rügivü zorieküm kenüh David tü arüshu; jükenüh azhie jüma tü Perez-Uzzah (mazhünyo Uzzah rügivüzorieküm) ta nosü küju nga jiveh.

⁹David tü jüma rülovü VÜWA krü taji ma nüh, “Khiela nüh VÜWAkütsathuozhü küthseku hi vü rura na lo?” ti küza.

¹⁰Jükenüh David tü VÜWA kütsathuozhü küthseku vi nü David nyujiwa vü mütungü nüh sa, David nüh jüma vi anatovü Obededom Gitwa zhehvü viwa.

¹¹Jüti sanü VÜWA kütsathuozhü küthseku tü Obededom zhehlo vü saküche sam; thi VÜWA nüh tsia Obededom thi ma zhehlori tsü.

¹²Jüma vi nü kajiwa David vü küza taji, “VÜWA nüh Obededom zhehlori thi ma zanyori aveh vü Saküüwuowa kütsathuozhü küthseku kenüh tsiatsü,” ti küza. Jükenüh David tü wa nü Obededom zhehvünüh Saküüwuowa kütsathuozhü küthseku vi nü külozheti David nyujiwa vü teru;

¹³VÜWA kütsathuozhü küthseku kükhari tü jikha türo tseketewa ünü ma tü shüvotsa küsü thi mieshüzah küülie küsü ti vi nü küsahthuosa.

¹⁴Thi David tü mürilothsü navükruzhu küsü vi tseke nü VÜWA tüvüma kükhra aveh vi taji tsih.

¹⁵Jükenüh David thi Israel zheh aveh tü zie thi arütsü khu nüVÜWA kütsathuozhü küthseku khateshuhru.

¹⁶VÜWA kütsathuozhü küthseku David nyujiwa vü ru ünü Saul tsavühwa Maikhal mürhülehpie vünüh noküze, thinü kajiwa David tü VÜWAtüvü jo thi tsih ti sanü kütse küngu vü ma luoveh lovü nüh ma matewa.

¹⁷Jüti sanü mari nüh VÜWA kütsathuozhü küthseku vituru nü jüma kenüh David nüh juhthsüzheh khakeküsawa lovü ma pe vü sa; thi David nüh kütso kükhurü thi luoveh kürüzih kükhurü VÜWA tüvüsa.

¹⁸Thi David nüh kütso kükhurüri thi luoveh kürüzih kükhurüri jum ünü VÜWA nyo vünüh tsia nü anyiri tsü,

¹⁹ thi nyimzari nga lohse küsüsü thi asa sükhri küsüsü thi müsaküveh küsüsü ti küsuotsü. Jüsevü anyiri aveh papa zheh vü tewakheh.

²⁰Thi David nü ma zhehlori tsiatsü nti sheletewa. Thitü Saul tsavühwa Maikhal tü David mütu nti alievü shuru taji, “Israel kajiwa tü nosü küzake ma mpa ma siakeveh lo, ma nüh nosü masiepera siepevühri notha vü nga hiete mütsethuoh, küüphroküphriehri küsü nüh müzükrü nüh ma mühiete nüh kütse khe wiethuoh,” ti sa.

²¹David nüh Maikhal vü, “Jümatü VÜWA tüvü ma nüh noh pa nyieh vünüh thi ma zhehlori aveh nyieh vünüh ma nüh hi rüka nü VÜWAnyiri Israelra kajitsawa küsana küsa kenüh hi küchieke sa nta sa, jükenüh hi nüh VÜWA tüvü loküzhe sanaveh.

²²Hi nüh hi mpa nüh hama nyiehvü nüh momakütalo sawie ngü naveh, thi hi tü noh nothavü saküsajim naveh; thitü rülavüri noh nüh küphrahteri vünüh hi tü küsiake peh ra naveh,” ti küza.

²³Jüti küsa vü Saul tsavühwa Maikhal tü ma sühleh küju atsa münyie nüh sam.